II Hơ’mon 36:4-10
“Chă bĕ Kră Yang kơplah bơ̆n oei gơh tơ’bơ̆p; krao khan bĕ kơplah Sư oei jê̆!” (Êsai 55:6)
Nơ̆r jet tơchĕng pơwao:
– Pơtao Jêhôiakim păng pơtao Jêhôiachin bre sư bơngai thoi yơ?
– Bre sư đei sơng iŏk tơdrong kiơ?
– Lu bơ̆n yua iŏk jơ năr tơbral păng awih awăn kơ Kră Yang thoi yơ?
Sơ̆p Hla bơar ‘nâu tơbăt gah tơdrong Pơtao Jêhôiakim păng kon drŏnglo sư pơtao Jêhôiachin pơgơ̆r pơtao, ‘bar ‘nu pơtao ‘nâu đơ̆ng pơtao dêh tơmoi pôk atŏk pơm pơtao. Pơtao Jôhôiakim đơ̆ng pơtao Nêkô dah Êyiptơ pôk pơm pơtao na pơtao Jôhôiakim đơ̆ng Nêbukanessar dêh Babilôn pôk pơm pơtao. Tơpă, đei tơdrong tơplih lăm dêh char đei yŏng pơgơ̆r yua kơ đơ̆ng rŏng kơ pơtao Jêhôiakim pơm pơtao lăm dôm sơnăm na pơtao Êyiptơ tơblah thuơ kơ đe na linh Babilôn puh tơlĕch đơ̆ng pơlei sư, lăm noh đei dêh Juđa hai (II Pơtao 24:7). Pơtao Jêhôiakim chu kơ pơtao Babilôn lăm pêng sơnăm mălei đơ̆ng rŏng kơ noh tơplih đon tơchĕng pơm pơplơ̆ (II Pơtao 24:1). Thoi noh, pơtao Babilôn rôp pơtao Jêhôiakim anhăk ba tơ Babilôn păng pôk Jêhôiachin pơm pơtao.
Lăm lu Hla bơar Pơtao tơbăt pơdah lu tơdrong truh kơ ‘bar ‘nu pơtao lei lăm noh hla bơar Hơ’mon chih kơ đeh ‘biơ̆, mălei tơbăt tơdrong lei lăi băl lăm chăl arih păng pŭ iŏk tơdrong truh kư̆m lei lăi băl. Hla bơar Hơ’mon chih roi kơ sơnăm bre sư kơplah pơm pơtao Jêhôiakim pơm pơtao kơplah sư ‘bar jĭt sơnăm, na Jêhôiachin kơplah mơjĭt tơhngam sơnăm. Đơ̆ng noh dơ̆ng tơbăt Jêhôiakim pơgơ̆r lăm jĭt mônh sơnăm, na Jêhôiachin pơgơ̆r lăp pêng khei mơjĭt ‘bar năr, bre sư tă pơm yoch ‘bơ̆t anăp Kră Yang ‘Bok Kei-Dei (trong 5 păng trong 9). Tuch luch bre sư tă kơ oei lăm hnam phak tơ Babilôn. Hla bơar Hơ’mon pơma hơđăl lu tơdrong âu wă tơ’bôh tơdah ưh kơ wă tơbral na nŏng kơ arih pơm yoch lei gô pŭ iŏk lăm ‘bar tơdrong noh gô hiong đĭ đăng, hiong tơdrong rơngei păng arih pơm đĭch đe.
Ding truh jơ ‘nâu, mă khan ‘Bok Kei-Dei đei yua lơ lu pơtao dêh tơmoi phara băl wă phak lu pơtao Juđa mălei Juđa oei hơmĕng. Yua kơ tơdrong pơgơ̆r Kră Yang, gah adrĕch adrung pơtao Đawit oei đei pơm pơtao. ‘Bok Kei-Dei đei pơkă hăm pơtao Đawit jơ̆ hnam pơtao păng dêh char sư gô kơjăp, mălei kon sâu pơtao dah pơm yoch hăm Kră Yang gô ưh kơ klaih đơ̆ng tơdrong phak (II Samuel 7:12-16). Dah ‘bar ‘nu pơtao tơbral păng chu kơ Kră Yang, lei rŏ lăng lu sư kư̆m huay kơ đei tơdrog gleh truh hơnat. Mălei lu sư tơhiong lê̆ jơ năr tơbral păng hiong tôm tơdrong.
Lăm chăl arih lu bơ̆n hăm đei tơdrong kiơ pơm kơ Kră Yang ưh kơ lăp đon, athei wih brŏk tơ Kră Yang, tơbral păng achăng hŭt hloi kơplah oei đei jơ năr ‘nâu. Kư̆m đĭ jơhngơ̆m ră roi Tơdrong ‘Nao ‘Lơ̆ng kơ lu bơngai tam mă băt kơ Kră Yang lăm jơ năr oei tam ‘nâu. Athei “Yua iŏk jơ năr” athei adrin pơm mă ‘lơ̆ng (Kôlôssê 4:5). Sĭt tơpă tơdrong phak Kră Yang ưh kơ jor ôh.
Ơ Kră Yang, apinh Ih tơgŭm inh huay kơ tơhiong jơ năr tơbral dôm tơdrong yoch lăm chăl arih inh, kư̆m thoi ưh tam mă hiơ̆k kơ bơngai tam mă lui kơ Kră Yang băt tơbral tơdrong yoch păng chơ chă Kra Yang, apinh Ih tơgŭm inh yua iŏk jơ năr pơm tơdrog ‘lơ̆ng kơplah oei đei jơ năr, krao khan yua anăn Kră Yang Yêsu Krist, Amen.
Lu bơ̆n hăm tơhiong jơ năr ayơ ưh kơ tơbral dah mă achăng tŭk nơ̆r Kră Yang krao bơ̆jang kơ Sư ưh? Lu bơ̆n kăl kơ pơm kiơ dang ei?
Đŏk Sơ̆p Hla bơar ‘Bok Kei-Dei lăm pêng sơnăm: Jôel 3
Kênh Youtube BHKTHN:
