Tơdrong Pơđơ̆k 26:1-3
“Tơdrong pơyom ưh kơ lăp hăm lu bơngai bơlŭk. Thoi prĕl bơyan phang, thoi ‘mi bơyan kĕch.” (Tơdrong Pơđơ̆k 26:1)
Nơ̆r jet tơchĕng pơwao:
– Yua kơ kiơ ưh kơ gơh pôk pơ-ư kơ lu bơngai bơlŭk?
– Yua kơ kiơ lu bơngai bơlŭk kuă kơ chu iŏk tơdrong đe bơtho?
– Dang ei bơ̆n kăl kơ apinh Kră Yang tơgŭm bơ̆n tơplih tơdrong kiơ?
Lu bơngai kơtul noh bơngai ưh kơ hli yom kơ Kră Yang ‘Bok Kei-Dei, areh kơ tơdrong gơh hơgei păng areh kơ tơdrong đe bơtho pơhrăm (Pơđơ̆k 1:7). ’Nâu bơih lu bơngai khan hlôh wao mă-lei lăp ‘bơ̆r pơma đĕch ưh kơ yua iŏk lăm chăl arih wă pơyua lăm tơdrong jang Kră Yang kư̆m ưh kơ pơyua ăn kơ bơngai nai mơ̆n. Tơdrong pôk pơ-ư kơ minh ‘nu bơngai kơtul thoi noh ưh kơ lăp ôh, thoi prĕl bơyan phang, thoi ‘mi bơyan kĕch (trong 1), ưh kơ đei pơyua kiơ mă-lei pôm pơrăm kơ lu hla ‘long ‘nhĕt ‘nhot. Lu bơngai kơtul, dah đe pôk pơ-ư, lui ngeh na pơjao ăn kơ lu sư tơdrong jang tih, tơdrong jang ‘lơ̆ng, lei‘noh kơnh gô ba ăn tơdrong răm kơ kon pơlei,na bơngai kơtul noh kư̆m pŭ iŏk tơdrong tơdrong răm.
Đơ̆ng noh dơ̆ng, mă khan bơngai kơtul hiap bơngai to, hiap ngôi kư̆-kă tơdrong kơđei, bơngai mă sư hiap noh ưh kơ đei răm ôh, tơdrong sư hiap noh ưh kơ yua kiơ (trong 2). Dôm nơ̆r hiap kư̆-kă noh ưh kơ phara kiơ kơ lu sem, păr tơ âu tơ to, thoi sem pleng păr juang suang plơ̆ plĕch,noh wă pơma tơ’blŏk kơ tơdrong pơtih gia lu sem mă ưh kơ đei jur pơdơh, ưh kơ đei pơdơh ‘bơ̆t anih ayơ,ưh kơ đei năm truh tơ yơ, ưh kơ đei tơdrong kiơ truh, thoi noh ưh kơ đei pơrăm kơ bu ôh
Tuch luch âu, bơngai kơtul, bơ̆n kăl kơ gơ̆t sư, chông anhăk sư (trong 3). Tơnguĕt yua teh aseh wă kơ sư năm trŏ kơ trong, bơngai wei yua tơnguĕt wă teh aseh, na ‘long băl ‘măn kơ teh kơdŭ rŏng lu bơngai kơtul, pơjuăt,bơtho tơ’bôh wă kơ lu sư yak trong tơpăt,yak trong tơdrong‘lơ̆ng.
Bơwei tơdrong‘lơ̆ng lăm chăl arih wă kơ lu sư huay kơ pơm tơdrong kơnê̆, kư̆m huay kơ hơpoh truh tơ tơpôl, păng akâu kơdih lu sư huay kơ pŭ iŏk tơdrong răm.
Dang ei, đei lơ bơngai kiơ̆ kơ tơdrong tơpôl arih kư̆-kă, pơjăm lu bơngai bơtho ră roi tơdrong arih pơm ‘lơ̆ng. Đei lu bơngai mơ’nah hli kơ bôl buăl pơjăm, weh ataih, na rơih iŏk tơdrong arih đe kơnê̆ liơ bơ̆n thoi ‘nei mơ̆n. Lơ bơngai pôk bơnê, pơ-ư kơ lu bơngai kơtul arih thoi noh na ‘bôh lu sư đei hla bơar pơsĭt đêl sư hŏk lăm tih anih kơjung păng kư̆m pơjao ăn kơ lu sư tơdrong pơgơ̆r. Lu bơngai ‘nâu băt pôm pơang kơ sư đei hla bơar pơsĭt kơ sư hŏk lăm tih noh đĕch, mă-lei kơtul lăm tơdrong arih, pơm kơnê̆ ‘mê̆ ‘mach, kơnê̆ sư noh hơpoh tơ bơngai tơpôl bôl buăl jih ‘ma dơ̆ng, hơrui ba lơ bơngai arih rok kiơ̆ tơdrong kơnê̆, pơang. Lu bơngai kơtul thoi noh, lu sư kuă kơ mơ̆ng nơ̆r đe bơtho, ưh kơ yom tơdrong đe tơ’bôh, weh ataih đơ̆ng mĕ ‘bă, yă ‘bok, weh đơ̆ng khul bơngai lui, arih rơngei kiơ̆ kơdih wă lăm tơdrong yoch kơnê̆ na đơ̆ng noh pŭ iŏk tơdrong răm kơ chăl arih sư dang ei păng ưh kơ đei tơdrong rih ling-lang đơ̆ng Kră Yang ăn noh.
Apinh Kră Yang ăn kơ bơ̆n arih hlôh wao, đĭ jơhngơ̆m hli yom kơ Kră Yang păng chu kiơ̆ nơ̆r Sư wă kơ băt mơn đei tơdrong pŭn hiôk đơ̆ng Kră Yang ăn dang ei păng chăl đơ̆ng rŏng ei kơnh. Mă khan bơ̆n chu iŏk pơmat đơ̆ng lu bơngai kơtul blah bơ̆n, mă-lei nơ̆r Kră Yang pơkă khan: “Lê̆ lu sư blei hiap mă-lei Ih ăn pŭn hiôk, Layơ lu sư iung blah lu sư gô mơlâu, Mă-lei gah lu đĭch đam Ih gô chơt hiôk”(Hơriso109:28)
Kơkuh kơ Ih Kră Yang,inh bơnê kơ Ih mơnat bơih tơdrong yoch inh.
Apinh Yang Bơhngol Ih hơtŭt jơhngơ̆m inh, bơtho inh pơtơ̆p pơjuăt gah tơdrong arih gah bơhngol,wă kơ inh hlôh wao, arih pơm kơ Ih lăp đon,Ih ăn pŭn hiôk. Inh krao khan yua anăn Kră Yang Yêsu Krist, Amen!
Lu bơ̆n tam đĭ jơhngơ̆m hli yom kơ Kră Yang păng arih pơtơ̆p pơjuăt arih kiơ̆ kơ nơ̆r Kră Yang bơtho ưh?
Đŏk Sơ̆p Hla bơar Nơ̆r ‘Bok Kei-Dei lăm pêng sơnăm: Hôsia 14
Kênh Youtube BHKTHN:
