Pajlug 25:27-28
Nqe cim:
“Rau qhov tus Ntsujplig uas Vajtswv pub rau peb yeej xav kom peb muaj lub siab tawv. Nws yuav ua haujlwm rau hauv peb lub siab kom peb muaj hwjchim, kom muaj lub siab hlub lwm tus, thiab kom peb paub tswj peb lub siab” (II Timautes 1:7)
Lus nug xav:
– Lo lus “txojkev tswj” lossis “tswj kom tau” muaj lub ntsiab li cas?
– Zaj kawm hnub no hais txog txojkev tswj siab zoo li cas?
– Yuav ua li cas kom peb tswj siab tau txhua seem hauv kev ua neej?
Lo lus “txojkev tswj” lossis “tswj kom tau” raws li hauvpaus lus Kilis yog enkrateia, txhais tau tias yog tswj yus, xwbtim tswj, ceevfaj rawv lossis tswj siab. Ob nqe Pajlug no qhia paub peb yam ntsig txog kev tswj siab ntawm kev ua neej. Zib ntab txawm zoo los noj ntau dhau yuav tsis zoo. Tus kheej rau siab kawm ntxiv yeej zoo, tiamsis yog nrhiav kom tau kev qhuas hauv ntiajteb ces yuav puas. Tus neeg uas tswj tsis tau nws lub siab ces yuav ua rau puas siab, zoo ib yam li lub nroog tsis muaj ntsayeej thaiv, thaiv tsis tau yeebncuab tuaj tua.
Tim ib, nqe lus “noj zib ntab ntau” (nqe 27) xav hais txog txojkev tsis tswj siab, tsis tswj kev noj kev haus. Tswv Yexus qhia tias, tsis txhob cia nej lub siab qaug rau kev noj kev haus (Lukas 21:34). Noj haus ntau, noj tsis txuag qhia paub tus neeg uas tabtom noj tsis muaj kev hmov tshua thiab faib pub rau lwm tus. Hauv Kalatias 5:19-25, Timthawj Paulus qhia txog neeg lub siab nyiam ua thiab tus neeg muaj Vaj Ntsujplig, hauv cov ntawd, “tswj siab” yog ib qhov tseemceeb ntawm Vaj Ntsujplig. Txojkev tswj tau kev ua neej peb totaub tias yog tswj siab, txawv li kev qaug cawv thiab noj haus ntau, yog tej uas hais tawm neeg lub siab nyiam ua. Tim ob, siv zog nrhiav kom tau kev qhuas yuav ua rau peb tsis nco ceevfaj tej kev dag ntxias sab nraud tuaj. Thaum ib tug neeg tswj tsis tau kev ntshaw, lub siab thiab tej kev xav phem ntawm nws, ces kev txhaum yuav tswj tau tus neeg ntawd. Lub homphiaj ntawm cov ntseeg Tswv Yexus tsis yog ua kom tau qhuas nyob ib vuag nyob hauv ntiajteb no, tiamsis yog txojkev ntev rau tus kheej. Thaum kawg, lo lus “tswj tau” kuj muaj lub ntsiab tias yog “ceevfaj”. Tsis muaj kev tswj siab yuav coj mus rau qhov txaus ntshai uas yog tsis muaj zog tiv thaiv yeebncuab sab nraud tuaj, zoo ib yam li lub nroog tsis muaj ntsajyeej thaiv. Timthawj Paulaus ntuas cov ntseeg yuav tsum ceevfaj hnub Tswv Yexus rov los: “Yog li ntawd peb tsis txhob tsaug zog li lwm tus. Peb yuav tsum tsis txhob tsaug zog thiab ceevfaj zov tos” (I Thexalaunikes 5:6). Hauv txhua lub tsamthawj yuav tsum ceevfaj txojkev tawmtsam ntawm txojkev txhaum.
Hais txog cov ntseeg Tswv Yexus, muaj Vaj Ntsujplig lub cim yuav ua tau neeg tswj siab (Kalatias 5:22). Ua raws li Vaj Ntsujplig nyiam yuav ua rau peb tau txais Vajtswv lub hwjchim, ua tau neeg tswj siab. Timthawj Paulus qhia tias: “Nws yuav ua haujlwm rau hauv peb lub siab kom peb muaj hwjchim, kom muaj lub siab hlub lwm tus, thiab kom peb paub tswj peb lub siab” (II Timautes 1:7). Thov Vajtswv pab rau peb txhua tus kom tau lub siab muaj zog, muaj kev hlub thiab tswj tau txhua yam.
Thov Vajtswv,
Vajtswv, ua tsaug uas Koj hlub thiab pub koob hmoov rau nyuam yaus. Thov Vaj Ntsujplig pub kom nyuam yaus kawm paub thiab ua neeg tswj siab rau txhua seem ntawm kev ua neej, thiaj qhia tshwm Koj txojkev hlub thiab ua rau Koj tau ntsejmuag. Nyuam yaus tuav Tswv Yexus lub npe thov, Amees.
Peb puas tau tas siab vamkhom tus Tswv kom peb ua tau lub neej tswj siab rau txhua yam lawm tau?
Nyeem Vajluskub hauv peb lub xyoo: Hauxeyas 7
Kênh Youtube BHKTHN:
