Teev Npe 21:4-9
Nqe cim:
“Mauxes tsa tus nab tooj rau saum tus ncej tom tiaj suabpuam li cas, luag yuav muab Neeg Leej Tub dai ib yam li ntawd; yog li ntawd, txhua tus uas ntseeg nws yuav tau txojsia ntev dhawv mus ibtxhis” (Yauhas 3:14-15)
Lus nug rau sawvdaws xav:
– Vim li cas cov Yixalayees raug Vajtswv rau txim?
– Tes haujlwm Mauxes ua tus nab tooj muaj lub ntsiab dabtsi?
– Peb kawm tau ob yam twg ntawm Vajtswv tus yam ntxwv dhau zaj xwm tus nab tooj no?
Cov Yixalayees tabtom nyob rau hauv ntu kev kawg uas mus rau tebchaws coglus. Tom qab uas ntaus yeej vajntxwv Alas, lawv nqis saum roob Haules los rau sab Hiavtxwv Liab zom kev mus kom dhau lub tebchaws Xaudoos. Thaum mus txog tog kev, lawv chim thiab npautaws heev vim tsis muaj dej haus thiab lawv nqhis tej ncuav nram tebchaws Iziv. Txawm yog Vajtswv yeej tseem pub Manas saum ntuj los rau lawv tiamsis lawv hais tias “Peb noj tsis taus tej zaub mov zoo li no lawm!” (nqe 5). Ntawd yog ib lo lus hais tsis muaj kev nco Vajtswv txiajntsig! Tiam tim ob no thaum ntsib kev txomnyem kuj tseem yws Vajtswv tsis txawv ib yam li tiam ua ntej ntawd. Lawv tsuas pom qhov tsis zoo tiamsis tsis pom tias hauv plaub caug lub xyoo, los ntawm Vajtswv txoj kev hlub thiab Nws lub hwjchim, Vajtswv yug tshaj ob lab tus tibneeg tom tiaj suab puam, tsis muaj ib hnub twg lawv tshaib plab! Tshaj qhov ntawd, Vajtswv hais tias “Kuv coj nej hauv tebchaws moj sab qhua tau plaub caug xyoo. Nej tej ris tsho kuj tsis ntuag nej tej khau kuj tsis ntuag hle ntawm nej kotaw” (2 Kevcai 29:5), tseeb tiag ntawd yog txoj kev tsom kwm zoo kawg nkaus!
Ntawm Vajtswv tus yam ntxwv ncajncees, Vajtswv yuav rau txim rau cov neeg ntxeev siab, tsis nco Vajtswv txiaj ntsig, Nws yuav tso tus nab muaj taug, tom mob heev tom coob leej ntau tus tuag. Thaum ntawd lawv yuav lees paub tej kev txhaum uas lawv tau ua tawmtsam Vajtswv thiab yuav thov Mauxes thov Vajtswv rau lawv. Vajtswv yeej tsis rhuav cov nab muaj taug tseg, tiamsis hauv Vajtswv txoj koob hmoov, Nws kom Mauxes ua ib tus nab tooj thiab muab ntsia rau saum ib tug ncej, yog leejtwg raug nab tom los ntawm kev ntseeg nws tsa qhovmuag ntsia tus nab tooj ces nws yuav tau kho zoo.
Tus nab tooj tsis yog ib tug vajtswv uas yuav coj los pe zoo li tom qab no cov Yixalayees ua (2 Vajntxwv 18:4). Thaum Tswv Yexus nrog Nikaudemaus uas yog cov Yixalayees ib tug xibhwb sib tham, Tswv Yexus hais txog kev sib txuas ntawm tus nab tooj uas muab ntsia rau saum tug ncej thiab qhov uas Nws yuav raug muab ntsia rau saum ntoo khaublig (Yauhas 3:14-15). Cov uas raug nab tom, tsuas yog los ntawm kev ntseeg tsa qhovmuag ntsia tus nab tooj ces yuav tau kho zoo. Ib yam li ntawd, tus neeg txhaum tsimnyog tuag, tsis vim ua zoo ntawm tus kheej tiamsis los ntawm kev ntseeg lees txais yuav Tswv Yexus tus uas raug ntsia saum ntoo khaublig, tau tuag theej yus kev txhaum, ces yuav tau zam txim thiab tau txoj sia ib txhis (Efexus 2:8-9; 2 Kauleethaus 5:21).
Zaj xwm tus nab tooj qhia tawm ob yam ntawm Vajtswv tus yam ntxwv. Vajtswv yog Tus ncajncees leejtwg ua txhaum yeej yuav raug rau txim (Exekees 18:20). Lwm seem, Vajtswv yog Tus muaj kev hlub, tus neeg txhaum tas siab tso kev txhaum, tso nws tej kev phem kev qias tseg ces yuav tau Vajtswv zam txim tagnrho huv tibsi rau (Yelemis 31:34b). Kawm paub Vajtswv tus yam ntxwv pab peb ua neej ncajncees thiab muaj kev hlub hauv kev ua neej.
Thov Vajtswv,
Vajtswv, tus uas muaj txoj kev hlub npluamias, thov ntuas nyuam yaus hais tias Koj yog tus uas ncajncees, kom nyuam yaus txhob zais kev txhaum. Thov pab nyuam yaus kev xav, hais, ua txhua yam kom haum Koj siab thiab paub ua neej muaj kev hlub li Vajtswv Koj tus yam ntxwv. Nyuam yaus tuav Tswv Yexus Khetos lub npe thov, Amees.
Peb puas ua neej ncajncees raws li Vajtswv txojlus qhia thiab ua neej sib hlub?
Nyeem Vajluskub hauv peb lub xyoos: Tes Haujlwm 23
Kênh Youtube BHKTHN:
