Klei Aê Diê Blŭ: I Kôrantô 2:6-16
Êlan kliăng: “Ƀiădah Aê Diê bi êdah leh kơ drei klei anăn hŏng Yang Mngăt Jăk. Kyuadah Yang Mngăt Jăk ksiêm jih jang klei, wăt klei êlam Aê Diê” (I Kôrantô 2:10)
Klei êmuh ksiêm mĭn: Ya dua klei thâo mĭn lač leh tinei? Klei thâo mĭn Aê Diê brei kơ hlei pô? Ya ngă? Ya klei hriăm mñă kơ drei tơdah drei dlăng Klei Aê Diê Blŭ leh anăn mă bruă kơ Ñu?
Lŏ čuê kdrêč bi mklă kơ klei bi kah hlăm Phung Sang Aê Diê hriê kyua ai tiê tui tiŏ klei thâo mĭn, klei thâo blŭ êlam leh anăn klei mblang mơ̆ng lăn ala anei, Khua ƀĭng kna Y-Pôl nao êlam hĭn, msĕ si ñu dôk pŏk dŭm tal čiăng ba phung đăo thâo săng êlam kơ klei mâo. Hlăm trăn Klei Aê Diê Blŭ hruê anei, ăt hŏng klei lač kơ klei mdê plah wah klei thâo mĭn hlăm ênuk anei hŏng klei thâo mĭn mơ̆ng Aê Diê (êlan 6), Khua ƀĭng kna Y-Pôl mñă klă hlei pô mâo klei thâo mĭn anăn. Hŏng klei thâo mĭn Aê Diê, snăn “phung khua kiă kriê ênuk anei” (êlan 8), “Mnuih yang đar amâo mă tŭ ôh klei Yang Mngăt Jăk Aê Diê brei” (êlan 14) amâo srăng thâo săng ôh. Klei thâo mĭn Aê Diê knŏng brei kơ “phung khăp kơ Ñu” (êlan 9), “kơ drei” (êlan 7, 10), klă hĭn jing kơ phung “mă tŭ leh Mngăt Myang mơ̆ng Aê Diê” (êlan 12). Lač mkăn jing, klei thâo mĭn Aê Diê amâo brei kơ phung đăo knang hlăm klei thâo anak mnuih ôh, kyua “Mnuih yang đar amâo mă tŭ ôh klei Yang Mngăt Jăk Aê Diê brei, kyuadah klei anăn jing klei khŏ kơ ñu, leh anăn ñu amâo dưi thâo săng klei anăn ôh” (êlan 14). Knŏng phung mâo Yang Mngăt Jăk kơh dưi thâo săng klei anăn.
Phung ƀĭng kna Khua Yang Yêsu ăt tuôm ênuh ya ngă Ñu yua klei bi hmô čiăng mtô, Khua Yang wĭt lač klei thâo săng brei kơ diñu ƀiădah phung mkăn amâo mâo ôh (Y-Mathiơ 13:10-11), kyua knŏng Yang Sĭt Nik kơh dưi atăt mnuih mâo Yang Mngăt Jăk hlăm djăp klei sĭt nik (Y-Yôhan 16:13). Hlei pô mâo Yang Mngăt Jăk kơh dưi thâo săng leh anăn ksiêm djăp bruă hlue si klei sĭt nik klei hdĭp myang.
Trăn Klei Aê Diê Blŭ anei mjưh ruĕ hŏng êlan: “Kyuadah hlei pô thâo kral leh klei mĭn Khua Yang čiăng dưi bi hriăm Ñu?” Ƀiădah drei mâo klei mĭn Yang Krist”(êlan 16). Ya klei êlam Aê Diê ƀiădah jih jang phung thâo mĭn ăt kăn dưi thâo săng snăn drei dưi thâo săng, kyua drei mâo Yang Mngăt Jăk mtô. Khua ƀĭng kna Y-Pêtrôs jing sa čô trah mă kan amâo mâo klei thâo êlam ôh, ƀiădah lŏ mâo klei mĭn čiăng čih hră mtô hlăm Klei Bi Mguôp Mrâo, leh anăn ñu dưi mtô kơ dŭm êbâo čô mnuih hmư̆ leh anăn đăo kơ Aê Diê. Klei anăn kbiă hriê mơ̆ng klei thâo mĭn mơ̆ng Aê Diê, Pô brei Yang Mngăt Jăk hdĭp hlăm ai tiê phung đăo kơ Khua Yang Yêsu. Drei amâo dưi thâo ôh Aê Diê leh anăn hdĭp djŏ klei kñăm hlăm klei hdĭp pô, ăt msĕ mơh hlăm Phung Sang Aê Diê, tơdah ka mâo ôh Yang Mngăt Jăk Aê Diê hlăm klei bi mklă đăo kơ Khua Yang Yêsu hlăm drei pô.
Hŏng si klei thâo mĭn drei dôk hdĭp leh anăn mă bruă hlăm Sang Aê Diê?
Wah lač: Ơ Khua Yang Yêsu, bi mni kơ Ih brei kơ kâo Yang Mngăt Jăk čiăng mơ̆ng anăn kâo thâo săng klei hdĭp myang. Akâo kơ Ih đru kâo pral thâo hŏng klei Yang Mngăt Jăk mtô leh anăn mñă čiăng hdĭp bi mơak kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
