Luka 2:1-7
“Ơ Betlehem Eprata, ih jing pơlei iĕ hloh lăm rơbâu pơlei lăm char Juđa, Mă-lei đơ̆ng ih gô tơpŭ ăn kơ inh minh ‘nu Kră Yang Sư gô pơgơ̆r lu bơngai Isơrael; Sư đei đơ̆ng tơm hmơm blŭng-a sơ̆ boih, đơ̆ng adrol kơ đĭ-đăng.” (Mika 5:1)
Nơ̆r jet tơchĕng pơwao:
– ‘Bok Kei-Dei pơm kiơ wă ‘blep trŏ nơ̆r khan lê̆ adrol gah anih đe tơpŭ kơ Kră Yang?
– Đe tơpŭ kơ Kră Yang lăm war rơmo wă ba ăn tơdrong hơmĕng kiơ kơ kon bơngai?
– Lu bơ̆n tơ’bôh jơhngơ̆m bơnê kơ Kră Yang thoi yơ lăm năr ‘blŏk kơ Kră Yang Yêsu Jur Jing Bơngai sơnăm ‘nâu?
Yua kơ tơdrong ‘mêm, ‘Bok Kei-Dei đei pơgơ̆r adrĕch adrung wă ba bre Jôsep Mari truh tơ Betlehem, đơ̆ng pơlei Nasaret bre sư yak năm lăm pêng năr wă kơ kon ‘Bok Kei-Dei đe tơpŭ trŏ kơ anih đơ̆ng Mika ‘bok khan lê̆ adrol đei tơbăt lê̆ bơih (Mika 5:1).
‘Bok Kei-Dei tih hloh, mơsêh đei yua ‘bok Sêsa Ôgut, pơtao tơm đe Rôm pơgơ̆r kơplah jơ noh sơ̆, yua lăm tơdrong jang Kră Yang kơnhăm “Jơhngơ̆m pơtao lăm ti Kră Yang thoi đak glung ro; Sư ăn ro tơ yơ mơ̆ng kơ Sư wă.” (Tơdrong Pơđơ̆k 21:1). Tơlĕch hla bơar wă chih tơmơ̆t anăn rim kon bơngai lăm jơ̆p kơ tơring sư pơgơ̆r. Yôsep yak đơ̆ng pơlei sư kơdih wă năm tơ pơlei Betlehem wă chih tơmơ̆t anăn bre sư tơ lăm sơ̆p hla bơar. Betlehem minh pơlei iĕ kon pơlei pơpôi băl ‘bĕnh lăm pơlei noh kơlih kơ thoi noh na “ưh pă đei anih lăm hnam ‘bĭch tơmoi” ăn kơ bre Yôsep păng Mari, hloh kơ noh dơ̆ng kiơ̆ kơ tơdrong juăt Juđê, minh ‘nu bơngai drŏkăn anăp păng hơiơch kon drŏnglo đe gô jô̆ sư bơngai kơnê̆ (Lêwi 12:2). Thoi noh na bre sư gô ‘bĭch tơ anih lăm war rơmo. ‘Bơ̆t anih noh, Mari tơpŭ kơ minh ‘nu kon kơdră sư, tơsu kơ kon sư minh blah khăn klaih kơ noh tơ’bĭch kơpal ‘nhĕt kro tơ lăm war rơmo. Ưh kơ đei bu oei hơdai sư nguaih kơ ‘bok Yôsep.
Oei lăm tơdrong ‘Bok Kei-Dei, chih tơmơ̆t anăn lăm sơ̆p hla bơar đơ̆ng minh ‘nu pơtao dêh tơmoi athei, ưh pă đei anih ‘bĭch lăm hnam tơmoi, păng tơ’ngla hnam tơmoi lăp đon tơmơ̆t bre Yôsep, Mari tơpŭ kon nge lăm war rơmo, đĭ đăng lu bơngai noh jing tơmam ‘Bok Kei-Dei yua lăm tơdrong jang Sư wă ăn Kră Yang Yêsu jur jing kon bơngai. ‘Bok Kei-Dei bơ̆jang yua kon bơngai wă kơ đei yua lăm tơdrong jang Sư kơnhăm. Anăn mă ‘bar lăm ‘Bok Kei-Dei đơ̆ng anih arih ling lang jur tơ ala teh âu ‘bônh kơ tôch. “Sư Kră Yang atŏ hăm ‘Bok Kei-Dei, mă-lei Sư ưh kơ ‘mêm ôh tơdrong Sư atŏ hăm ‘Bok Kei-Dei noh. Sư iŏk đon ala, păng jur jing thoi kon bơngai, păng chu phep đep yom thoi bơngai đĭch đe.” (Philip 2:6-7). Kră Yang Yêsu iŏk đon ala jur tơ ala teh đe tơpŭ kơ Sư tơ anih ‘mê̆ ‘mach, tơ minh pơlei iĕ Betlehem, păng lôch tang kon bơngai tơ ‘long pơglang. Kră Yang yua đĭ đăng dôm tơdrong noh wă ba ăn tơdrong dŏng pơklaih lu bơngai yoch mă lŭch hloh, păng kơnê̆ krưp dêh, lăm noh đei lu bơ̆n. ‘Blŏk hơdơ̆r kơ ‘năr Kră Yang jur jing bơngai lăm sơnăm ‘nâu, athei tơchĕng gah tơdrong ‘mêm Kră Yang, gah tơdrong dŏng pơklaih đơ̆ng Yang mơsêh wă kơ lu bơ̆n kŭp kơ̆l kơkuh bơnê kơ Kră Yang, păng pơkă arih kơ Kră Yang đĭ chăl arih.
Ơ Kră Yang, inh bơnê kơ Ih Kră Yang Yêsu, Ih lăp đon hăm tơdrong đe tơpŭ kơ Ih tơ anih ‘nhĕt kro lăm war rơmo ‘mê̆ ‘mach tơ pơlei iĕ Belehem sơ̆, wă kơ inh gơh klaih. Apinh Ih tơgŭm inh đĭ jơhngơ̆m arih yua kơ Ih păng ră roi tơdrong dŏng pơklaih kơ lơ bơngai. Yua anăn Kră Yang Yêsu Krist, Amen.
Lu bơ̆n pơkă ‘bơ̆t anăp Kră Yang tơdrong kiơ, kơplah lu bơ̆n akŭm ‘blŏk hơdơ̆r kơ Kră Yang jur jing kon bơngai?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong jang 12
Kênh Youtube BHKTHN:
