Klei Aê Diê Blŭ: Y-Luk 2:1-7
Êlan kliăng: “Ƀiădah ih, Ơ ƀuôn Betlêhem Êphrata, wăt tơdah ih jing ƀuôn điêt ti krah phung găp djuê čar Yuđa, mơ̆ng ih srăng kbiă hriê kơ kâo sa čô srăng jing khua gai gĭt hlăm phung Israel, pô mâo phŭn mơ̆ng ênuk đưm, mơ̆ng ênuk hlŏng lar.” (Y-Mika 5:2)
Klei êmuh ksiêm mĭn: Ya klei Aê Diê ngă leh čiăng bi sĭt klei hưn êlâo kơ anôk kkiêng kơ Khua Yang Yêsu? Khua Yang kkiêng ti war êmô ba ya klei čang hmăng kơ anak mnuih? Si drei bi êdah ai tiê hdơr knga kơ Aê Diê hlăm yan bi hdơr kơ hruê kkiêng Khua Yang thŭn anei?
Kyua klei dưi kiă kriê jih jang mnơ̆ng, Aê Diê kiă kriê leh klei hƀuê ênuk čiăng ba Y-Yôsep H’Mari nao ti Betlêhem, kbưi hŏng Nasaret hlăm brô tlâo hruê nao truh tinăn, čiăng kơ Anak Aê Diê dưi kkiêng djŏ anôk Khua pô hưn êlâo Y-Mika hưn leh êlâo dih (Y-Mika 5:2).
Aê Diê Pô ti dlông hĭn, pô mâo jih klei myang yua leh Sêsar Ôgust, mtao mâo klei dưi prŏng hĭn ti Rôm hlăk anăn, jing mnơ̆ng yua čiăng dưi mâo klei Ñu kñăm, “Ai tiê mtao jing msĕ si sa hnoh êa hlăm kngan Yêhôwa, Yêhôwa brei gơ̆ đoh phă anôk Ñu čiăng” (Klei Bi Hriêng 21:1). Sa hdruôm hră brei yap mnuih ƀuôn sang, leh anăn Y-Yôsep ba mô̆ pô wĭt kơ ƀuôn sang Betlêhem čiăng hưn anăn hlăm hdruôm hră anăn. Betlêhem jing sa ƀuôn điêt, phung ƀuôn sang kƀĭn lu snăk kyua anăn “sang jưh amâo djăp anôk” kơ Y-Yôsep H’Mari, hĭn mơh hlue si klei bhiăn phung Yuđa, phung mniê kkiêng anak arăng dlăng jing čhŏ mrŏ (Bruă Lêwi 12:2), kyua anăn diñu dôk hlăm sa war êmô biăp. Tinăn, H’Mari kkiêng leh kơ anak êkei tal sa. Hđeh điêt Yêsu knŏng mâo čhiăm hruôm asei mlei leh anăn mđih ti hip rơ̆k krô. Amâo mâo ôh sa čô pô mkăn êngao kơ Y-Yôsep.
Ti gŭ klei Aê Diê kiă kriê, mơ̆ng sa hdruôm hră mtrŭn mơ̆ng sa čô mtao phung ƀuôn sang tue, truh kơ bruă sang jưh amâo lŏ mâo anôk, leh anăn wăt bruă khua sang jưh sa ai kơ klei brei Y-Yôsep H’Mari kkiêng anak hlăm war êmô biăp sang jưh, jih jang phung anăn jing kdrăp mnơ̆ng Aê Diê yua kơ hdră ba Khua Yang Yêsu hriê ti lăn ala. Aê Diê ngă leh bruă mơ̆ng anak mnuih čiăng ba boh tŭ kơ klei kñăm Ñu. Aê Diê Pô Tal Dua lui ƀuôn guh kơang hlŏng lar hriê ti lăn ala mâo wưng kčah kơ hruê mmông leh anăn wăl anôk. “Wăt tơdah Ñu mâo klei jing Aê Diê, Ñu amâo yap yuôm ôh klei Ñu mđơr hŏng Aê Diê jing klei Ñu djă pioh, ƀiădah Ñu toh hĕ klei anăn, leh anăn tŭ klei jing sa čô dĭng buăl, brei arăng kkiêng kơ Ñu jing mnuih” (Philip 2:6-7). Khua Yang Yêsu bi ti gŭ pô tŭ klei kkiêng ti anôk čhŏ mrŏ, ti sa ƀuôn sang Betlêhem điêt dhiêt, leh anăn djiê hrô kơ anak mnuih ti kyâo bi kal. Aê Diê yua leh jih jang klei anăn čiăng ba klei bi mtlaih kơ phung soh jhat, leh anăn soh jhat hĭn hlăm anăn mâo phung drei. Ƀri yan bi hdơr hruê Khua Yang hriê ti lăn ala, brei drei ksiêm mĭn kơ klei khăp Khua Yang, kơ klei bi mtlaih Aê Diê Pô Myang Hĭn čiăng kơ drei kui kŏ bi mni kơ Aê Diê leh anăn hdĭp kơ Ñu jih klei hdĭp.
Ya klei drei ƀuăn hŏng Khua Yang tơdah nao hlăm knăm bi hdơr hruê Khua Yang hriê?
Wah lač: Ơ Khua Yang, kâo bi mni kơ Khua Yang Yêsu hriê leh ti anôk war êmô biăp điêt dhiêt ti Betlêhem hlăk đưm, čiăng kơ kâo mâo klei pap brei klei soh leh anăn klei bi mtlaih. Akâo kơ Ih đru kâo jih ai tiê hdĭp kơ Ih leh anăn hiu hưn klei pap Ih kơ lu mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
