Blŭng a 2:18-25
“Yua kơ thoi noh na bơngai drŏ-nglo gô tơklah đơ̆ng mĕ ‘bă sư na oei hơdai hăm akăn sư, na ‘bar ‘nu bre sư jing minh sĕch minh akar.” (Blŭng a 2:24)
Nơ̆r jet tơchĕng pơwao:
– Yua kơ kiơ ‘Bok Kei-Dei pơjing bơngai drŏkăn đơ̆ng bơngai drŏnglo?
– Ih athei roi tơdrong pơgơ̆p hnam dơnŏ blŭng a sơ̆ thoi yơ?
– Lu bơ̆n đei pơhrăm iŏk đơ̆ng pơgơ̆p hnam dơnŏ blŭng a lăm tơdrong kơnhăm đơ̆ng ‘Bok Kei-Dei noh tơdrong kiơ?
Kră Yang ‘Bok Kei-Dei ưh kơ wă kơ kon bơngai oei minh ‘nu minh drô̆, mă khan đei anih oei ‘lơ̆ng rŏ nhen thoi lăm pơgar Ê-đen. Thoi noh na ‘Bok Kei-Dei đei pơm ăn kơ ‘Bok A-đam tep blêk na pơjing minh ‘nu bơngai drŏ kăn noh jơ̆ yă Ê-wơ đơ̆ng kơ ting jơmir ‘Bok A-đam (trong 21-22). Tơdrong pơjing bơngai drŏ kăn đơ̆ng kơting jơmir bơngai drŏ nglo noh jơ̆ tơ’bôh kơ bơ̆n măr sư kăl kơ đei tơdrong tơ’bưh dih băl păng kăl wă dih băl, tơdrong tơbưh noh jơ̆ ưh kơ tơklah dih băl.
Tơdrong pơgơ̆p hnam dơnŏ bre ‘Bok A-đam păng yă Ê-wơ noh jơ̆ tơdrong kơnhăm đơ̆ng Kră Yang ‘Bok Kei-Dei. Nơ̆r ‘Bok Kei-Dei đei chih ‘Bok Kei-Dei ba ăn Ê-wơ tơ ‘Bok A-đam, tơdrong noh tơ’bôh kơ bơ̆n tơdrong pơjing hnam dơnŏ ưh kơ trŏ yua kơ đơ̆ng bre măr sư đĕch ôh mă lei bre măr sư noh jơ̆ đơ̆ng Kră Yang đei pre hơmet ăn. lăm pơjing hnam dơnŏ “Yua kơ thoi noh na bơngai drŏ-nglo gô tơklah đơ̆ng mĕ ‘bă sư na oei hơdai hăm akăn sư, na ‘bar ‘nu bre sư jing minh sĕch minh akar” (trong 24). Noh jơ̆ tơdrong pơgơ̆p ăn kơ ‘bar ‘nu bre sư ‘lŏ wơ̆ tơ̆l bơih, măr sư gơh oei hơdrô̆ bre sư păng gơh jang sa bơih. Tơdrong “tơklah đơ̆ng mĕ ‘bă” noh tơbôh ăn kơ tơdrong mă dan tơdrong kăl hloh tơdrong kiơ lăm chăl arih. Kơplah jing hnam dơnŏ, klo kăn jing minh pôm hnam dơnŏ yua kơ măr sư jing minh bơih, păng măr sư ‘nâu jing kăl hloh kơdôm tơdrong nai, hăm bơngai nai. Klo kăn “jing minh” wă khan tơdrong tơbưh, tơklep, minh klo minh akăn đĕch. Hnam dơnŏ pơm ăn kơ ‘bar ‘nu jing minh, noh jơ̆ jing minh lăm sĕch akar, tơdrong hưch wă păng tơdrong gah bơhngol. Ưh pă đei tơdrong tơklah, dah tơdrong ôn kiơ, mă khan măr sư akâu hoh mă lei “măr sư hoei kơ mơlâu” (trong 25), jơ ‘nâu măr sư ưh pă ‘bar bơih măr sư jing minh đĕch.
Đơ̆ng tơdrong pơgơ̆p hnam dơnŏ blŭng a, lu bơ̆n đei ‘bôh tơdrong kơnhăm đơ̆ng ‘Bok Kei-Dei ăn kơ đĭ đăng bơngai lăm teh đak. Tơdrong pơgơ̆p noh ưh kơ trŏ đơ̆ng tơdrong tơchĕng kon bơngai đĕch ôh mă lei tơdrong noh lĕch đơ̆ng tơdrong kơnhăm đơ̆ng ‘Bok Kei-Dei. Ưh kơ đei minh ‘nu bơngai bu gơh tơplih ming tơdrong pơgơ̆p âu kiơ̆ kơ tơdrong pơgơ̆r pha ra kơ ‘Bok Kei-Dei đei kơnhăm lê̆ bơih. Hnam dơnŏ noh jơ̆ pơgơ̆p minh ‘nu bơngai drŏ nglo păng minh ‘nu bơngai drŏ kăn. Minh pôm hnam dơnŏ đei pơgơ̆p bơih athei dan tơdrong kơnhăm hloh kơ đĭ đăng dôm tơdrong nai. “minh sĕch akar” noh jơ̆ tơdrong pơgơ̆p đĭ chăl arih, ưh kơ gơh tơklah, kăl kơ minh pôm klo păng minh pôm akăn. Hnam dơnŏ pŭn hiôk ưh kơ trŏ ba ăn kơ minh tơdrong hnam dơnŏ lăm klo kăn đĕch ôh mă lei tơdrong noh kŭm wă pơma kơ tơdrong tơ’bưh Kră Yang Yêsu Krist hăm khul bơngai lui (Êphêsô 5:25-27).
Kơkuh bơnê kơ Ih Kră Yang, Inh bơnê kơ Ih yua kơ tơdrong kơnhăm mă ‘lơ̆ng đơ̆ng Ih ăn kơ kon bơngai lăm tơdrong pơjing hnam dơnŏ. Apinh Ih ăn kơ inh băt kơ gĭt kơ hnam dơnŏ, kăl kơ đei tơdrong pơyom, ‘mêm mơnat păng bơ̆jang tơgŭm hnam dơnŏ inh kơdih kiơ̆ thoi Ih wă. Apinh Ih ăn kơ hnam dơnŏ Inh tơ’bôh tơdrong ‘mêm tih nhen thoi Kră Yang Yêsu Krist ‘mêm kơ Khŭl bơngai lui kơ Sư.Yua anăn Kră Yang Yêsu Krist. Amen
Hnam dơnŏ bơ̆n dang ei dah tơ hơnăp hăm trŏ thoi tơdrong mă Kră Yang đei pre hơmet lê̆ ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Hơriso 68.
Kênh Youtube BHKTHN:
