Pajlug 25:21-22; Loos 12:17-20
Nqe cim:
“Vajtswv txojlus hais tias, “Yog nej cov yeebncuab tshaib plab, nej cia li muab mov rau lawv noj; yog lawv nqhis dej, nej cia li muab dej rau lawv haus; yog nej ua li no lawv yuav txajmuag.” Tsis txhob cia txojkev phem kovyeej nej, tiamsis nej yuav tsum ua zoo, nej thiaj kovyeej txojkev phem” (Loos 12:20-21)
Lus nug rau sawvdaws xav:
– Sob lus “ib cub thee cig plaws rau saum nws taubhau” (HMOWSV) txhais li cas?
– Vim li cas Vajtswv cov menyuam yuav tsum siv kev zoo kovyeej kev phem?
– Peb yuav tsum coj li cas rau cov neeg uas tawmtsam yus?
Vajtswv cov menyuam yuav tsum coj lub siab zoo, ua neej siv kev zoo kovyeej kev phem, kiag yus cov yeebncuab huv tibsi. Ib tug duab meej uas vajntxwv Xalumoos siv ua lus pivtxwv hais los sib piv txog qhov uas pub yeebncuab noj thaum lawv tshaib plab, pub yeebncuab haus thaum lawv nqhis dej thiab qhov uas rauv ib cub thee cig plaws rau saum nws taubhau.
Sob lus “ib cub thee cig plaws rau saum nws taubhau” pheej muab txhais raws li ob ntsiab lus: Tim ib, “cub thee” hais txog “txoj kev mob vim txajmuag” uas ib tug neeg nws zeem pom tau txais kev ua zoo pauj rau tej kev phem uas nws tau ua. Thiab txoj kev txajmuag ntawm tus neeg phem yog sijhawm rau nws lees kev txhaum thiab tso kev txhaum tseg. Tim ob, “cub thee” hais txog kev rau txim, thiab txoj kev rau txim los ntawm cub thee cig liab ploog yog txoj kev rau txim thaum kawg rau cov neeg uas tsis tso kev txhaum tseg, tsis xav sib haum xeeb, kiag thaum lawv tau txais kev ua zoo pub rau noj rau haus. Hauv Vajluskub tshiab, timthawj Paulus siv ob nqe Pajlug saud los piav hais tias: “Tsis txhob cia txojkev phem kovyeej nej, tiamsis nej yuav tsum ua zoo, nej thiaj kovyeej txojkev phem” (Loos 12:17-21). Siv kev zoo kovyeej kev phem ua haum Vajtswv siab vim peb cia rau Vajtswv mam ua pauj, thiab peb ntseeg hais tias kev ua pauj yog Vajtswv li. Vim li ntawd thaum peb ua neej siv kev ua zoo kovyeej kev phem, peb yuav tau Vajtswv muab nqi zog (Pajlug 25:22).
Vajtswv cov menyuam tsis tsimnyog ua rau lwm tus raws li qhov uas luag ua rau yus, noj ib daim pauj ib daim, tiamsis peb yuav tsum ua raws txoj kev dawbhuv, sib hlub ntawm Tswv Yexus. Tswv Yexus qhia hais tias: “Tiamsis nimno kuv qhia rau nej hais tias, ‘Hlub nej cov yeebncuab thiab thov Vajtswv pab rau cov uas tsimtxom nej,’ yog nej ua li no, nej thiaj yog Leej Txiv tus uas nyob saum ntuj cov menyuam. Rau qhov Vajtswv ua nws lub hnub ci rau cov neeg ua phem thiab cov neeg ua zoo, thiab tso nag los rau cov neeg ncaj thiab cov neeg tsis ncaj ib yam nkaus” (Mathais 5:44-45). Tswv Yexus tuag saum ntoo khaublig los them nqi rau peb txhua tus txoj kev txhaum, tsis yog vim peb ua neej zoo, ncaj ncees tiamsis vim yog Nws hlub peb xwb. Tus ntseeg lub neej txhua hnub yuav tsum dhau mus zuj zus zoo li Tswv Yexus, ua neej dawbhuv, muaj kev hlub. Thov Vajtswv pab kom peb muaj lub neej “siv kev zoo kovyeej kev phem” yuav pab rau cov neeg phem zeem pom lawv txoj kev txhaum, tso lawv kev txhaum tseg thiab los nrhiav Vajtswv kev zam txim. Vajtswv yeej tso nag los rau tus neeg ncaj ncees thiab tus phem tib yam nkaus, Vajtswv xav kom txhua tus tso kev txhaum tseg kom tsis puastsuaj thiab raug rau txim mus ibtxhis. Dhau li ntawd, peb cia li ruaj siab, txhob pom zoo li yus poob ntau heev, chim siab thaum ua qhov zoo rau cov neeg uas tawmtsam yus, vim Vajtswv yuav muab nqi zog rau peb. Cia li ruaj siab!
Thov Vajtswv,
Vajtswv ua Koj tsaug Koj hlub tshua thiab cawm nyuam yaus. Thov pab kom nyuam yaus mloog Koj lus ua zoo rau txhua tus, tsis hais cov uas tawmtsam ua phem rau nyuam yaus huv tibsi. Thov pab nyuam yaus yim hnub yim zoo thooj Koj. Nyuam yaus tuav Tswv Yexus Khetos lub npe thov, Amees.
Peb puas tau ua neej siv kev zoo kovyeej kev phem?
Nyeem Vajluskub hauv peb lub xyoos: Nkauj Quaj Ntsuag 5
Kênh Youtube BHKTHN:
