Tes Haujlwm 1:4-14
Nqe cim:
“Thaum nej thov Vajtswv, nej yuav tsum thov nws qhib kev rau peb qhia Txojmoo Zoo uas hais txog Yexus Khetos zaj uas yav tas los tsis muaj neeg paub. Twb yog vim kuv qhia zaj ntawd kuv thiaj raug kaw rau hauv tsev lojcuj no. Thiab nej yuav tsum thov Vajtswv pub tswvyim rau kuv kom kuv txawj qhia tej uas tsimnyog kuv yuav tsum qhia, sawvdaws thiaj yuav totaub zoo.” (Kaulauxais 4:3-4)
Lus nug rau sawvdaws xav:
– Ua li cas Tswv Yexus hais kom cov thwjtim yuav tsum nyob hauv lub nroog Yeluxalees tos?
– Tswv Yexus lolus samhwm rau lawv yog dabtsi, thiab lawv pib li cas?
– Peb tabtom ua tes haujlwm tus Tswv samhwm ntawd li cas?
Tom qab uas Tswv Yexus sawv rov qab los tshwm rau cov thwjtim pom thiab kom lawv nyob hauv lub nroog Yeluxalees tos mus txog thaum uas tau txais Vaj Ntsujplig lub hwjchim uas tawm mus qhia Vajtswv Txojlus. Kx A.B. Simpson piav qhia, “Lub sijhawm tos no cia kom cov thwjtim zeem pom kev cheemtsum, kev tsis muaj qabhau, kev ua tsis tau dabtsi thiab lawv tsuas yog vamkhom lawv tus xibhwb xwb. Lawv yuav tsum ua kom lawv lub siab khoob lug ua ntej uas yuav tau hliv kom puv”. Nthuav dav thiab txhim tsa Pawg Ntseeg cheemtsum kev koom tes ntawm ntau tus neeg kev thov Vajtswv, kev npaj, kev qhia Vajtswv Txojlus… Hauv ntawd kev thov Vajtswv kom tau txais Vaj Ntsujpig lub hwjchim mas yog kauj ruam npaj xubthawj uas yuav tsum muaj. Kx Billy Graham tau hais tseg: “Haukev ua tiav tes haujlwm tshaj tawm Txomoo Zoo yog thov Vajtswv, thov Vajtswv thiab… thov Vajtswv!”.
Tes haujlwm Tswv Yexus cob rau cov thwjtim yog mus thoob plaws qhov txhia chaw qhia Tswv Yexus kev tuag thiab kev sawv rov qab los, pib qhov chaw uas lawv tabtom nyob hauv Yeluxalees thoob plaws ib ncig xeev Yudas, xeev Xamalis thiab mus txog qab ntuj kawg. Tswv Yexus hais kom lawv pib ua Nws tes haujlwm los ntawm qhov uas nyob tos kom tau txais Vaj Ntsujplig lub hwjchim uas Vajtswv yuav pub los. Ua ntej cov thwjtim muaj Tswv Yexus nyob nrog lawv, tiamsis tamsim no Tswv Yexus mus saum ntuj lawm, vim li ntawd qhov uas lawv yuav txuas tau nrog tus Tswv yog thov Vajtswv xwb. Lawv los saum roob txiv ntoo roj los rau hauv Yeluxalees, nyob rau ib chav tsev txheej saud thiab koom siab thov Vajtswv: “Lawv cov no thiab ib co pojniam thiab Malis uas yog Yexus niam thiab Yexus cov kwv pheej tuaj ua ke thov Vajtswv hauv chav tsev ntawd” (nqe 14). Thov Vajtswv yog qhov kev pib xubthawj rau kev tshaj Txojmoo Zoo. Txog hnub Peetekos Vaj Ntsujplig nqis los li tus Tswv hais tseg lawm, cov thwjtim txhua tus txais tau Vaj Ntsujplig lub hwjchim thiab muaj lub siab tawv pib ua tim khawv qhia txog Tswv Yexus tsis ntshai li.
Kev tshaj tawm Txojmoo Zoo yog lus samhwm thiab kuj yog koob hmoov uas Vajtswv cob rau Nws cov menyuam uas coj txoj kev cawmdim mus txog rau ntau tus tibneeg. Peb ua tes haujlwm no hauv Vaj Ntsujplig lub hwjchim, kev thov Vajtswv yog tus yaumsij uas qhib tshwm Vaj Ntsujplig lub hwjchim. Timthawj Paulus zeem paub qhov no zoo nws thiaj thov Pawg Ntseeg thov Vajtswv pab nws: “Thaum nej thov Vajtswv, nej yuav tsum thov nws qhib kev rau peb qhia Txojmoo Zoo uas hais txog Yexus Khetos zaj uas yav tas los tsis muaj neeg paub.…” (Kaulauxais 4:3). Niaj hnub nim no, muaj ntau txoj haukev tshaj tawm Vajtswv Txojlus, peb txhua tus yuav tsum koom tes thiab tas siab thov Vajtswv txhua hnub kom yim hnub yim muaj neeg coob tau txais kev cawmdim.
Thov Vajtswv,
Vajtswv, thov hliv Vaj Ntsujplig lub hwjchim los puv rau nyuam yaus, tshoov nyuam yaus lub siab kom koom tes nrog Pawg Ntseeg tshaj tawm Txojmoo Zoo. Thov Koj hlub tshua txhua tus tibneeg thiab ua kom lawv muaj lub siab muag tig rov los cuag Koj kom tau txais kev cawmdim. Nyuam yaus tuav Tswv Yexus Khetos lub npe thov, Amees.
Peb koom tes yam dabtsi rau kev tshaj tawm Txojmoo Zoo ntawm Pawg Ntseeg thiab lub tebchaws?
Nyeem Vajluskub hauv peb lub xyoos: Nkauj Quaj Ntsuag 2
Kênh Youtube BHKTHN:
