Klei Aê Diê Blŭ: Rôm 10:13-15
Êlan kliăng: “Snăn yơh, akâo bĕ kơ Pô hma brei Ñu tiŏ nao phung wiă” (Y-Mathiơ 9:38)
Klei êmuh ksiêm mĭn: Ya klei kñăm kơ dŭm klei êmuh Khua ƀĭng kna Y-Pôl bi êdah? Ya klei Aê Diê leh anăn Phung Sang Aê Diê srăng ngă hŏng phung mnuih wĭt lač klei Khua Yang iêô? Ya klei drei dôk wah lač leh anăn ya kdrêč drei bi mguôp kơ bruă hiu hưn Klei Mrâo Mrang Jăk?
Khua ƀĭng kna Y-Pôl brei thâo “Hlei pô iêô kwưh kơ anăn Khua Yang srăng tlaih” (êlan 13), leh anăn ñu dưm dŭm klei êmuh čiăng kơ pô dlăng hră ñu mâo klei bi mĭn. “Iêô kwưh kơ Anăn Khua Yang” jing klei akâo, tui duah klei bi mtlaih mơ̆ng Khua Yang. Leh anăn sĭt yơh, klei anăn amâo dưi truh ôh hŏng pô ka đăo. Ƀiădah si sa čô dưi đăo kơ Khua Yang Yêsu tơdah diñu ka tuôm hmư̆ kơ Ñu ôh? Leh anăn si diñu dưi hmư̆ tơdah amâo mâo pô mtô ôh? Leh anăn si mnuih dưi mtô tơdah arăng amâo tiŏ nao diñu ôh? (êlan 14-15). Khua ƀĭng kna Y-Pôl hưn mdah klei yuôm kơ bruă Khua Yang tiŏ nao mnuih hiu hưn Klei Mrâo Mrang Jăk kơ mnuih mkăn. Ñu kñăm, brei drei nao hiu hưn kơh dưi mâo mmông găl bi tuôm leh anăn hưn Khua Yang kơ mnuih mkăn. Tơdah hmư̆ leh Klei Mrâo Mrang Jăk, snăn kơh diñu dưi đăo leh anăn iêô kwưh kơ Anăn Khua Yang. Ñu hrêč mă klei blŭ khua pô hưn êlâo hlăm Y-Êsai 52:7: “Siam jăk yơh ti dlông čư̆ jơ̆ng phung ba klei mrâo mrang jăk, phung hưn klei êđăp ênang, phung ba klei mrâo mrang kơ klei jăk, phung hưn klei bi mtlaih, phung lač kơ ƀuôn Siôn, ‘Aê Diê diih dôk kiă kriê!’ ” tơdah amâo mâo ôh jơ̆ng phung mnuih kăp nao hiu hưn, amâo srăng mâo ôh mnuih dưi hmư̆ Klei Mrâo Mrang Jăk bi mtlaih.
Snăn hlei pô srăng tiŏ nao phung mnuih hlăm kdrăn hma hiu hưn klei mrâo mrang jăk? Sĭt nik Aê Diê yơh Pô srăng tiŏ nao (Y-Mathiơ 9:38), leh anăn Khua Yang khăng yua Phung Sang Aê Diê mơĭt digơ̆ nao msĕ si Phung Sang Aê Diê ti ƀuôn Antiôs tiŏ nao leh Khua ƀĭng kna Y-Pôl leh anăn Y-Barnabas hlăm gưl digơ̆ hiu hưn Klei Mrâo Mrang Jăk (Bruă Phung Khua Ƀĭng Kna 13:1-3). Anei jing bruă Aê Diê; amâo mâo dưi dlăng hơăi mang kơ bruă anei ôh. Aê Diê tiŏ nao phung dĭng ktang leh anăn Ñu hơêč hmưi kơ digơ̆, mbĭt hŏng klei Phung Sang Aê Diê tiŏ nao phung dĭng ktang, phung đăo ăt hrăm mbĭt bi mguôp ai hlăm bruă hiu hưn Klei Mrâo Mrang Jăk hŏng klei wah lač brei leh anăn klei myơr. Leh anăn kyua wĭt lač kơ klei Khua Yang iêô yơh digơ̆ myơr klei hdĭp kơ bruă hiu hưn Klei Mrâo Mrang Jăk, kăp wĭt lač mtam hŏng Khua Yang msĕ si khua pô hưn êlâo Y-Êsai snei: “Tinei kâo, tiŏ nao kâo bĕ!” (Y-Êsai 6:8).
Rôm 10:14-15 jing klei iêô mthưr hiu hưn klei mrâo mrang jăk bŏ hŏng klei bi mđĭ ai, jing sa hlăm lu mta klei iêô mthưr yuôm hlăm Klei Aê Diê Blŭ kyuadah bruă hiu hưn Klei Mrâo Mrang Jăk jing sa klei mtă prŏng Khua Yang pioh kơ jih jang phung anak ƀuôn sang Ñu brei ngă. Anăn jing bruă jao kơ grăp čô drei jing phung mâo leh klei bi mtlaih. Phung Sang Aê Diê leh anăn grăp čô pô đăo brei wah lač lu kơ bruă hiu hưn Klei Mrâo Mrang Jăk, akâo Khua Yang tiŏ nao leh anăn kčŭt ai tiê lu mnuih čiăng nao hiu hưn Khua Yang Yêsu kơ phung mnuih ka mâo klei bi mtlaih. Brei drei uêñ mĭn leh anăn wah lač jêñ jêñ kơ phung arăng tiŏ nao. Năng ai drei pô jing pô Khua Yang iêô jing dĭng ktang pioh nao hưn Klei Mrâo Mrang Jăk kơ phung riêng gah.
Si ngă drei wah lač mơ̆ čiăng mâo lu mnuih nao hlăm kdrăn hiu hưn klei mrâo mrang jăk?
Wah lač: Ơ Khua Yang, đru kâo thâo uêñ mĭn lu hĭn kơ bruă hiu hưn Klei Mrâo Mrang Jăk, leh anăn jih ai tiê wah lač čiăng mâo lu hĭn mnuih arăng tiŏ nao. Brei kâo kăp wĭt lač kơ klei Khua Yang iêô mthưr čiăng jing pô wiă hlăm hma mdiê ksă leh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Čŏk Hia 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
