Klei Aê Diê Blŭ: Y-Mathiơ 22:41-46
Êlan kliăng: “Dĭng buăl jăk lač kơ ñu, “Yang Mngăt Jăk srăng hriê kơ ih, leh anăn klei myang Pô Ti Dlông Hĭn srăng guôm ih; kyuanăn anak doh jăk ih srăng kkiêng arăng srăng pia Anak Aê Diê” (Y-Luk 1:35)
Klei êmuh ksiêm mĭn: Si phung Pharisi lŏ wĭt lač tơdah Yêsu êmuh kơ diñu hlei anak Krist jing? Si ngă Khua Yang mblang leh kơ diñu? Si drei srăng hdĭp tơdah thâo kơ Yêsu jing Anak Aê Diê?
Leh lŏ wĭt lač kơ klei khua klei bhiăn êmuh: khăp kơ Aê Diê leh anăn khăp kơ mnuih yơh jing atur kơ klei bhiăn Y-Môis leh anăn klei phung khua pô hưn êlâo čih leh, Khua Yang Yêsu êmuh kơ phung Pharisi dôk bi kƀĭn jŭm dar Ñu snei, “Ya diih mĭn kơ Krist? Hlei anak Gơ̆ jing?” Phung Pharisi lŏ wĭt mtam kơ Ñu, “Anak Y-Đawit”, kyuadah klei bhiăn phung Yuđa ăt mtô Yang Mêsi jing anak čô Mtao Đawit (Y-Markôs 12:35). Hŏng klei diñu yap anei, phung Pharisi knŏng dlăng kơ Krist jing sa čô mnuih mdê hŏng mnuih mkăn đuč.
Khua Yang Yêsu bi êdah klei amâo mâo djŏ ôh hlăm klei diñu mtô, tơdah Krist jing knŏng sa čô mnuih, kkiêng hlăm găp djuê Mtao Đawit snăn si ngă hlăm Klei Mmuñ Hđăp 101:1 Y-Đawit pô êjai blŭ hŏng klei Yang Mngăt Jăk kčŭt pia kơ Krist, čiăng lač Yang Mêsi jing Khua Yang tơdah lač, “Khua Yang lač kơ Khua Yang kâo…” Mtao Đawit brei drei thâo kơ knuih myang Yang Mêsi anei, “‘Khua Yang lač kơ Khua Yang kâo, dôk gŭ bĕ Ih tĭng hnuă Kâo, tơl Kâo dưm phung roh Ih ti gŭ jơ̆ng Ih’?” (êlan 44). Yang Mêsi dôk gŭ tĭng hnuă kơ jhưng mtao Aê Diê čiăng lač Ñu jing mđơr, sa klei dưi sa klei guh kơang mbĭt hŏng Aê Diê. Kyuadah Yang Mêsi mâo klei mpŭ hĭn kơ Mtao Đawit leh anăn Ñu jing Anak Aê Diê kyuanăn Mtao Đawit hŏng klei mpŭ snăk ñu brei Yang Mêsi jing Khua Yang kơ ñu pô.
Phung Pharisi knŏng đăo kơ knuih mnuih Yang Mêsi jing anak Mtao Đawit tui si klei bhiăn diñu pô, amâo djŏ diñu đăo tui si klei čih leh kơ knuih myang Yang Mêsi hlăm hdruôm hră Klei Aê Diê Blŭ ôh. Diñu knŏng dôk guôn Yang Mêsi hriê ngă klei krŭ kdơ̆ng mdlưh klei kiă kriê Rôm leh anăn jing mtao kơ phung Yuđa đuč. Tơdah Khua Yang Yêsu bi êdah klei amâo djŏ ôh hlăm klei phung Pharisi mtô kơ Yang Mêsi, snăn “amâo mâo sa čô dưi lŏ wĭt lač kơ Ñu ôh, leh anăn dơ̆ng mơ̆ng hruê anăn amâo lŏ mâo pô jhŏng êmuh kơ Ñu sa klei ôh” (êlan 46).
Hruê anei, phung ka đăo ôh kơ Yêsu srăng lač kăn djŏ lei hlei Ñu jing, ƀiădah drei hưn leh drei jing phung đăo kơ Krist, snăn brei drei thâo kral klă Khua Yang, kyuadah klei thâo kral Khua Yang yơh srăng bi kbiă knuih drei hŏng Ñu. Tơdah drei thâo kral Yêsu Krist jing Anak Aê Diê, drei srăng bi mni kơ Ñu kyuadah Ñu ruah leh drei, bi tui drei, brei klei pap kơ drei čiăng kơ drei dưi jing anak Ñu, leh anăn srăng dưn Ƀuôn Ala Mtao Adiê hlăm hruê Krist lŏ hriê. Hŏng klei thâo kral anăn, drei srăng kkuh mpŭ, bi mguôp hŏng Khua Yang, hur har dlăng leh anăn hriăm Klei Khua Yang Blŭ čiăng hdĭp msĕ si Khua Yang, leh anăn myơr jih klei hdĭp mă bruă leh anăn bi guh kơang kơ Anăn Ñu.
Tui si diih, hlei anak Krist jing? Drei hdĭp djŏ tui si Klei Aê Diê Blŭ brei drei thâo kral leh mơ̆?
Wah lač: Ơ Khua Yang Yêsu jing Krist, Anak Aê Diê, akâo Ih jing Khua kơ klei hdĭp kâo čiăng jih klei kâo mĭn leh anăn klei kâo ngă srăng bi mơak kơ Ih leh anăn bi guh kơang kơ Anăn Ih nanao. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yêrêmi 38
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
