Mathais 22:41-46
Nqe cim:
“Tus timtswv teb hais tias, Vaj Ntsujplig tus Dawbhuv yuav los rau saum koj, thiab Vajtswv lub hwjchim yuav roos koj. Vim li no sawvdaws thiaj yuav hu tus metub uas dawbhuv uas yuav yug los ntawd hais tias, nws yog Vajtswv tus Tub.” (Lukas 1:35)
Lus nug rau sawvdaws xav:
– Cov neeg Falixais teb li cas thaum Tswv Yexus nug lawv txog Yexus Khetos yog leejtwg?
– Tus Tswv qhia rau lawv li cas?
– Peb ua neej li cas thaum paub tias Tswv Yexus yog Vajtswv Leej Tub?
Tom qab uas teb tus xibhwb qhia Vajtswv txoj Kevcai hais tias hlub Vajtswv thiab hlub neeg yog nqe kevcai tseemceeb uas Mauxes thiab cov cevlus qhia, Tswv Yexus thiaj nug cov neeg Falixais tias: “Nej xav li cas txog tus Mexiyas? Nws yog leejtwg tus tub?” Cov neeg Falixais teb tus Tswv tamsim tias “Nws yog Daviv tus tub”, vim keebkwm ntawm cov neeg Yudais yeej qhia tias tus Mexiyas yog Daviv xeebntxwv (Malakaus 12:35). Los ntawm qhov kev xam pom li no, cov neeg Falixais tsuas saib tus Cawmseej yog ib tug neeg tseemceeb xwb.
Tswv Yexus qhia paub qhov uas tsis tseeb nyob hauv lawv cov lus qhia, yog tus Cawmseej tsuas yog ib tug neeg pheej tshaj, yug los ntawm Daviv cajces xwb, ua li cas hauv Phau Ntawv Nkauj 110:1 qhia tias Vajntxwv Daviv tau Vaj Ntsujplig tshoov siab muab tus Cawmseej hu ua tus Mexiyas uas yog tus Tswv: “Tus Tswv hais rau kuv tus tswv…” Vajntxwv Daviv qhia rau peb paub txog Mexiyas tus yamntxwv, “Tus Tswv hais rau kuv tus Tswv hais tias, koj cia li los zaum ntawm kuv sab xis mus txog thaum kuv muab koj cov yeebncuab los rau koj tsuj.” (nqe 44). Tus Mexiyas zaum ntawm Vajtswv lub zwmtxwv sabxis, txhais tau tias Nws nrog Vajtswv muaj vajhuam, hwjchim, tshwjchim sib luag zos. Tus Mexiyas loj dua Vajntxwv Daviv thiab Nws yog Vajtswv tus Tub, yog li Vajntxwv Daviv thiaj txhawb nqa qhuas thiab cia tus Tswv kav nws.
Cov neeg Falixais tsuas ntseeg tus Mexiyas muaj yamntxwv neeg, yog Vajntxwv Daviv tus tub raws li keebkwm hais, lawv tsis paub Vajtswv Txojlus qhia txog tus Mexiyas muaj yamntxwv Vajtswv. Lawv tsuas tos tus Mexiyas los tawmtsam cov nomtswv Loos thiab ua vajntxwv kav cov neeg Yudais. Thaum Tswv Yexus qhia paub tej lus uas cov Falixais qhia tsis tseeb txog tus Mexiyas, ces “tsis muaj leejtwg teb taus Yexus ib los li. Txij li hnub ntawd los, tsis muaj leejtwg kam nug Yexus li lawm” (nqe 46).
Nimno, cov neeg uas tsis tau ntseeg Tswv Yexus kuj muaj qhov kev paub tsis tau yog txog tus Tswv, tiamsis peb twb yog cov uas lees hais tias peb ntseeg Yexus, ces yuav tsum paub meej txog tus Tswv, vim qhov kev zeem paub tus Tswv yuav ua rau peb muaj tus cwjpwm zoo rau tus Tswv. Thaum peb zeem paub tus Cawmseej Yexus yog Vajtswv tus Tub, peb yuav paub ua Nws tsaug, rau qhov Nws xaiv, cawm, pub koob hmoov rau peb tau los ua Nws cov menyuam, thiab tau mus nyob hauv Vajtswv lub tebchaws hnub uas Yexus Khetos rov qab los. Qhov kev paub no, yuav ua rau peb pehawm, nrog tus Tswv sib raug zoo, nquag nyeem thiab kawm Vajtswv Txojlus kom peb ua lub neej zoo li tus Tswv ua, thiab kam fij lub neej ua Nws haujlwm thiab ua rau Nws tau ntsejmuag.
Thov Vajtswv,
Tswv Yexus tus uas yog Khetos, yog Vajtswv Leej Tub, thov Koj pab kom nyuam yaus paub cia Koj los tswj kav lub neej, kev xav thiab tej haujlwm nyuam yaus ua kom haum Vajtswv Koj lub siab nyiam thiab ua rau Koj tau ntsejmuag. Nyuam yaus tuav Tswv Yexus lub npe thov, Amees
.
Ib tsoom mloog uas hmov thiab tshua,
Raws li sawvdaws xav, Yexus Khetos yog leejtwg tus tub? Peb twb ua neej ib yam li Vajtswv Txojlus qhia rau peb paub lawm tau?
Nyeem Vajluskub hauv peb xyoo: Yelemis 38
Kênh Youtube BHKTHN:
