Mathiơ 22:34-40
“Bơ̆n athei ‘mêm kơ ‘Bok Kei-Dei Kră Yang bơ̆n hăm đĭ jơhngơ̆m klơm klak bơ̆n păng đĭ dôm tơdrong đon bơ̆n tơchĕng. Na tơdrong juăt mă ‘bar thoi âu: ‘Bơ̆n athei ‘mêm kơ bôl buăl thoi bơ̆n ‘mêm akâu kơdih.’ Ưh kơ đei tơdrong juăt ayơ mă kăl hloh kơ ‘bar tơdrong juăt âu.” (Markôs 12:30-31)
Nơ̆r jet tơchĕng pơwao:
– Lu bơngai Pharisi đei jet Kră Yang Yêsu tơdrong kiơ? Yua kơ kiơ lu sư jet thoi noh?
– Kră Yang pơma pơtôm tơdrong juăt Pah so thoi yơ?
– Bơ̆n đei pơhrăm iŏk ‘bai pơhrăm kiơ ăn kơ bơ̆n kơdih đơ̆ng Hla bơar ‘Bok Kei-Dei ‘nâu?
Đơ̆ng rŏng kơ Kră Yang Yêsu “pơjah hăm khul Sađusê jei Sư bơih” (trong 34). Na lu bơngai Pharisi akŭm băl pơđâu chă tơdrong wă jet pơlong lăng Kră Yang. Đei minh ‘nu thây bơtho tơdrong juăt đe Juđê năm jet Kră Yang: “Ơ ‘bok thây, dôm tơdrong juăt ‘Bok Kei-Dei pơkă, tơdrong juăt ayơ kăl hloh?” (trong 36). Kơnhăm thây bơtho tơdrong juăt đe Juđê kơplah sư jet tơdrong âu jơ̆ wă pơlong lăng Kră Yang Yêsu. Wă kơ Kră Yang tơl gah tơdrong juăt thoi yơ. Đĭ đăng lu bơngai Pharisi păng Sađusê tă kơ pơyom kơ ‘bok Môis păng pơđăm Sơ̆p Hla bơar ‘bok Môis chih thoi noh dah Kră Yang khan tơdrong juăt âu dah mă tơdrong juăt to kăl hloh, lei sư gô đei lu bơngai Juđê pơma chrih kơ sư păng pơm kơnê̆ kơ Sư. Kră Yang tơl hloi ưh kơ đei gô tơchĕng ‘mơ̆i ôh. Nơ̆r Sư tơl trŏ lăp ưh kơ sĭ hăm minh tơdrong juăt Môis đĕch ôh. Mălei kư̆m trŏ lăp hăm tơdrong juăt bơngai Juđê sơ̆ kiơ̆ kơ tơdrong juăt Pah so. Mă mônh, “Bơ̆n athei ‘mêm kơ Kră Yang ‘Bok Kei-Dei bơ̆n hăm đĭ jơhngơ̆m klơm klak bơ̆n, păng đĭ dôm tơdrong đon bơ̆n tơchĕng” (trong 37). Kră Yang bơtho kon pơlei Sư athei ‘mêm kơ Sư hăm đĭ akâu jăn, jơhngơ̆m, bơhngol, athei tơ’bôh jơhngơ̆m ưh kơ tơplih păng chu yom Kră Yang ‘Bok Kei-Dei tơpă yua kơ Kră Yang jơ̆ “Kră Yang ‘Bok Kei-Dei tih hloh păng trŏ kơkuh” (Nêhêmi 1:5). Mă ‘bar, “Bơ̆n athei ‘mêm kơ bôl buăl thoi bơ̆n ‘mêm akâu kơdih” (trong 39). Kră Yang bơtho kơ lu kon Sư rai ‘mêm kơ Kră Yang dang yơ lei kư̆m rai ‘mêm băl dang noh. Kră Yang wă kơ bơ̆n pơm tơ’bôh tơdrong ‘mêm băl tơduă lu kon ‘Bok Kei-Dei. ‘Nâu jơ̆ minh tơdrong anat dêh hăm lu bơngai Pharisi păng Sađusê, yua kơ lu sư tơchĕng kiơ̆ kơdih đĕch, hiơ̆k kơ akâu sư kơdih đĕch mă ưh kơ đei layơ tơmơ̆t sư hơdai hăm tơdrong arih lu bơngai nai wa kơ gơh băt ‘mêm mơnat. Kră Yang Yêsu khan kơ thây bơtho tơdrong juăt đe Juđê khan ‘bar tơdrong mă Sư ‘nao pơma noh kăl ngăl, ‘noh jơ̆ tơm kơ dôm tơdrong juăt Môis păng dôm tơdrong lu bơngai pơtruh nơ̆r ‘Bok Kei-Dei chih sơ̆.
Bơngai lui dang ei kư̆m oei kăl kơ pơm kiơ̆ ‘bar tơdrong juăt tih noh jơ̆ ‘mêm kơ Kră Yang păng ‘mêm kơ bôl buăl. Mưh bơ̆n đĭ jơhngơ̆m ‘mêm kơ Kră Yang bơ̆n gô huay kơ druh kiơ̆ păng kơkuh kơ lu rup yang nai, bơ̆n ling lang arih ưang Anăn Kră Yang. Kơkuh kơ Sư tơpă hăm đĭ jơhngơ̆m păng tơnăp, păng mưh đi jơhngơ̆m ‘mêm kơ Kră Yang, bơ̆n kư̆m gô ‘mêm mơnat kơ bơngai nai, gô ưh pă đei dôm “tơdrong tơhil pơma ôr pơret, tơdrong ơh lăm jơhngơ̆m pơma kơnê̆ kơ đe, hăm đĭ dôm tơdrong khĕnh hơwĕng” (Êphêsô 4:31). Bơ̆n gô “pơm băl mă ‘lơ̆ng, băt ‘mêm mơnat kơ bôl buăl, ‘nĕ kơ jô̆ yo dih băl thoi ‘Bok Kei-Dei huay kơ jô̆ yo kơ bơ̆n yua kơ Kon Sư Yêsu Krist lôch tang bơ̆n” (Êphêsô 4:32). Khul bơngai lui ‘mêm kơ Kră Yang păng ‘mêm mơnat dih băl gô jing minh khul thoi lĕ kơ ‘boh wă kơ lu bơngai ala teh âu ‘lơ̆ng ‘biơ̆ thoi lĕ kơ hơdah jơ̆p kơ kon bơngai lăm teh đak, păng pơm kơ Kră Yang lăp đon.
Kơkuh kơ Ih Kră Yang, Inh krao apinh tơdrong ‘mêm Kră Yang pơgơ̆r lăm jơhngơ̆m inh. Apinh Ih tơgŭm inh đĭ jơhngơ̆m ‘mêm kơ Kră Yang păng ‘mêm mơnat kơ ‘nhŏng mai oh jum dăr inh wă kơ tơdrong arih inh ling lang kiơ̆ thoi Ih lăp đon. Yua Anăn Kră Yang Yêsu Krist, Amen.
Bơ̆n hăm ‘mêm kơ Kră Yang păng ‘mêm mơnat dih băl hăm tơdrong ‘mêm Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 37
Kênh Youtube BHKTHN:
