Klei Aê Diê Blŭ: Klei Mmuñ Hđăp 116:12-14
Êlan kliăng: “Ya dŏ kâo srăng bi wĭt kơ Yêhôwa, kyua jih klei jăk Ñu ngă leh kơ kâo?” (Klei Mmuñ Hđăp 116:12)
Klei êmuh ksiêm mĭn: Si knuih pô čih bi êdah tơdah thâo kral klei pap Khua Yang brei kơ ñu? Ya dua mta klei sĭt klă, čiăng bi êdah klei thâo hdơr knga kơ Khua Yang? Si drei mă yua jih klei anei?
Thâo kral klei pap Khua Yang brei, pô čih ƀuh brei thâo “bi wĭt kơ Yêhôwa, kyua jih klei jăk Ñu ngă leh kơ kâo”. Sĭt nik pô čih amâodah pô mkăn, amâo dưi ôh “bi wĭt… jih klei jăk Ñu ngă leh”, ƀiădah klei thâo săng anei brei ƀuh ai tiê thâo hdơr knga mơ̆ng pô čih, leh anăn tơdah hŏng jih ai tiê thâo hdơr knga kơ Khua Yang, jih jang drei ăt mâo klei êmuh msĕ snăn mơh. Ñu brei thâo mta klei dưi ngă čiăng bi êdah klei thâo hdơr knga.
Tal sa, bi êdah ai tiê thâo hdơr knga hŏng klei hiu hưn bi lar Khua Yang jing Pô Bi Mtlaih. Rup “atŏ” hlăm êlan 13 jing sa klei mĭn hlăm Klei Bi Mguôp Hđăp khăng yua čiăng lač kơ klei bŏ ênŭm, êbeh dlai, msĕ si hlăm Klei Mmuñ Hđăp 23:5, “Atŏ kâo mnăm bŏ tơl dlai”. “Atŏ” pô čih djă jing “atŏ klei bi mtlaih”, Klei Aê Diê Blŭ hlăm klei blŭ Hêbrơ lač kơ ênoh lu, “Jih klei bi mtlaih”, leh anăn thâo săng djŏ hĭn jing “jih jang klei bi mtlaih”. Kyuanăn, êlan 13 dưi thâo săng msĕ snei: Hlăm Anăn Yêhôwa kâo srăng hưn klei bi mtlaih kbiă hriê mơ̆ng Ñu.
Mta klei tal êlâo hĭn brei ƀuh sa čô thâo hdơr knga kơ Khua Yang jing hiu hưn Klei Mrâo Mrang Jăk, hưn bi sĭt kơ klei pap Khua Yang, leh anăn hưn kơ mnuih mkăn thâo, mâo sa Aê Diê klei jăk. Hlăm Y-Markôs 4:20-21 lač kơ sa čô mnuih mă tŭ sĭt Klei Mrâo Mrang Jăk srăng mâo boh tŭ dưn jing “sa asăr tlâo pluh, năm pluh, leh anăn sa êtuh”, leh anăn Khua Yang Yêsu lŏ lač: “Djŏ mơ̆ arăng ba pui kđen čiăng dưm gơ̆ ti gŭ kčaih, amâodah ti gŭ jhưng pĭt, leh anăn amâo dưm gơ̆ ti gơ̆ng pui ôh?” Klei mtô lač anei mâo dua mta klei mblang yuôm: tal sa, drei mâo klei bi mtlaih čiăng pioh mtrang mngač leh anăn jing sa čô hưn bi sĭt kơ Khua Yang, leh anăn tal dua, hưn Klei Mrâo Mrang Jăk leh anăn hưn bi sĭt kơ Khua Yang, jing klei bi knăl kơ sa čô mnuih mâo klei bi mtlaih sĭt. Drei khăng lač drei khăp kơ Khua Yang leh anăn hdơr knga kơ Khua Yang, ƀiădah hbĭl tal êdei hĭn drei hưn Khua Yang kơ mnuih mkăn, hbĭl tal êdei hĭn drei hưn bi sĭt klei jăk Khua Yang ngă kơ drei? Bi êdah bĕ ai tiê thâo hdơr knga hŏng bruă ngă, hur har hiu hưn Khua Yang Yêsu jing Pô Bi Mtlaih, leh anăn jhŏng hưn bi sĭt kơ klei pap klei jăk Khua Yang brei.
Tal dua, pô čih bi êdah ai tiê thâo hdơr knga hŏng klei “Kâo srăng bi sĭt klei kâo ƀuăn kơ Yêhôwa” (êlan 14). Hlăm ală dlăng mơ̆ng Klei Aê Diê Blŭ, klei ƀuăn hŏng Khua Yang jing klei kkuh mpŭ, leh anăn tơdah thâo kral Pô drei kkuh mpŭ jing Pô dôk kiă kriê ti dlông jih jang mnơ̆ng, jing Pô phat kđi kpă, snăn brei drei răng kơ klei drei ƀuăn. Mâo mơ̆ ya klei ƀuăn drei wơr bĭt leh? Msĕ si klei ƀuăn hlăm klei bi kuôl, ung mô̆ ăt dôk huĭ mpŭ kơ Khua Yang mơ̆ leh anăn dưm êlâo hĭn bruă mkŏ mdơ̆ng klei hdĭp myang? Amâodah klei ƀuăn hlăk myơr anak, ung mô̆ uêñ mĭn mơ̆ kơ klei hdĭp myang anak drei? Đa đa mkăn…
Ya mta klei bi êdah drei thâo hdơr knga kơ Khua Yang nanao?
Wah lač: Ơ Khua Yang, akâo Ih đru kâo hdơr nanao klei jăk Khua Yang ngă kơ kâo, brei kâo thâo snei, kâo mâo klei bi mtlaih čiăng pioh hưn bi sĭt kơ Khua Yang, leh anăn brei kâo sĭt suôr hŏng jih klei kâo ƀuăn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
