Klei Aê Diê Blŭ: Klei Mmuñ Hđăp 100:1-5
Êlan kliăng: “Mŭt bĕ ti ƀăng jang Ñu hŏng klei hdơr knga, leh anăn hlăm wăl sang Ñu hŏng klei bi mni; hdơr knga kơ Ñu bĕ, mpŭ mni kơ anăn Ñu.” (Klei Mmuñ Hđăp 100:4)
Klei êmuh ksiêm mĭn: Ya Klei Mmuñ Hđăp 100 mtô jih jang mnuih brei ngă tơdah nao ti Sang Yang kkuh mpŭ kơ Aê Diê? Hŏng si ai tiê klei mĭn drei dôk kkuh mpŭ kơ Aê Diê grăp hruê kăm?
Klei Mmuñ Hđăp 100 jing sa klei mmuñ iêô mthưr jih jang mnuih dôk ti lăn ala amâo djŏ knŏng hjăn phung ƀuôn sang Israel ôh, mpŭ mni bĕ leh anăn hdơr knga bi mni bĕ kơ Yêhôwa tơdah mŭt hlăm wăl sang Ñu nao ti anăp Ñu (êlan 2, 4). Hdơr knga bi mni kơ Khua Yang jing sa kdrêč yuôm hlăm klei kkuh mpŭ kơ Aê Diê hlăm ênuk Klei Bi Mguôp Hđăp, mbĭt hŏng klei myơr mnơ̆ng ngă yang. Pô čih iêô mthưr jih lăn ala anei, êlâo hĭn brei hdơr knga bi mni bĕ kơ Khua Yang hŏng klei mmuñ bi mni, mpŭ mni (êlan 1, 4). Leh anăn “Mă bruă bĕ kơ Yêhôwa hŏng klei mơak;” (êlan 2). Hlăm êlan 3, pô čih bi mlih boh blŭ yua “drei”, jing klei pô čih blŭ hrăm hŏng Khua Yang, mbĭt anăn ñu čiăng kñăm kơ ai tiê klei mĭn hdơr knga bi mni leh anăn mmuñ bi mni kơ Khua Yang brei nao hrăm mbĭt tơdah mŭt hlăm Sang Aê Diê: “Mŭt bĕ ti ƀăng jang Ñu hŏng klei hdơr knga, leh anăn hlăm wăl sang Ñu hŏng klei bi mni; hdơr knga kơ Ñu bĕ, mpŭ mni kơ anăn Ñu.” (êlan 4).
Bi mni jing bi êdah klei ai tiê drei hdơr knga tơdah mă tŭ klei jăk jĭn Khua Yang brei. Bi mni ăt jing thâo kral amâodah đăo sĭt jih jang klei jăk jĭn drei mă tŭ hlăm klei hdĭp kbiă hriê mơ̆ng Aê Diê sơăi. Năng ênguôt êdi, kyua lu mnuih mă tŭ klei Khua Yang brei ƀiădah amâo thâo kral Khua Yang ôh! Anăn yơh jing phŭn knhal klei pô čih iêô mthưr jih jang mnuih “Brei diih thâo kơ Yêhôwa jing Aê Diê. Ñu yơh mjing drei leh, drei jing dŏ Ñu; drei jing phung ƀuôn sang Ñu, phung biăp hlăm kdrăn rơ̆k Ñu.” (êlan 3). Drei jing mnơ̆ng Aê Diê hrih mjing, Ñu hrih mjing leh anăn răng kriê drei truh kơ hruê anei. Lu mnuih lač snei ya mnơ̆ng Aê Diê ngă kơ kâo čiăng brei kâo kkuh mpŭ, bi mni? Diñu wơr bĭt hĕ: “Čiăng kơ diih dưi jing phung anak Ama diih hlăm adiê; kyuadah Ñu brei yang hruê ƀlĕ kơ phung ƀai wăt kơ phung jăk, leh anăn Ñu brei adiê hjan kơ phung kpă wăt kơ phung wê.” (Y-Mathiơ 5:45). Aê Diê jing Pô jăk brei nanao djăp mta mnơ̆ng yuôm kơ klei hdĭp kơ jih jang mnơ̆ng Ñu hrih mjing, wăt tơdah lu mnuih mă tŭ ƀiădah amâo tuôm hdơr knga bi mni ôh, tơl wăt hngah kơ Ñu mơh! Hlăm êlan 5, pô čih bi êdah phŭn knhal brei jih lăn ala hdơr knga bi mni kơ Khua Yang, kyua Khua Yang jing Pô jăk, klei khăp leh anăn klei sĭt suôr Ñu amâo tuôm mlih ôh.
Lu blư̆ grăp hruê kăm drei nao kơ sang Aê Diê leh anăn lŏ wĭt msĕ si sa klei mưng, amâodah nao kyua čiăng bi tuôm hdơ̆ng găp, mă rup hrăm mbĭt ƀiădah ai tiê amâo mâo dưm phă Khua Yang ôh čiăng kkuh mpŭ kơ Ñu hŏng klei djŏ. Khua Yang čiăng drei kkuh mpŭ kơ ñu hŏng ai tiê hơ̆k mơak, mă bruă, mpŭ mni Khua Yang, thâo hdơr knga kơ jih klei Khua Yang brei. “Mŭt bĕ ti ƀăng jang Ñu hŏng klei hdơr knga, leh anăn hlăm wăl sang Ñu hŏng klei bi mni; hdơr knga kơ Ñu bĕ, mpŭ mni kơ anăn Ñu. Kyuadah Yêhôwa jing jăk, klei khăp Ñu dôk hlŏng lar, leh anăn klei sĭt suôr Ñu ăt dôk hlăm jih jang ênuk” (êlan 4-5). Kkuh mpŭ bĕ kơ Khua Yang, mmuñ bi mni leh anăn wah lač, hŏng ai tiê thâo hdơr knga kơ Ñu.
Si drei bi êdah klei thâo hdơr knga bi mni kơ Aê Diê tơdah nao kkuh mpŭ kơ Ñu?
Wah lač: Ơ Ama! Bi mni kơ Ama kyuadah Ama jing Pô jăk, Pô sĭt suôr, răng kriê kâo nanao! Brei kâo kkuh mpŭ Ama hŏng ai tiê thâo hdơr knga leh anăn mpŭ mni kơ Anăn Khua Yang amâo mdei ôh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
