Hơriso 100:1-5
“Athei bơnê na mơ̆t lăm ‘măng jang Sư, bơnê ư-ang bĕ na mơ̆t lăm cham Sư. Bơnê bĕ kơ Sư păng hơri ư-ang kơ anăn Sư.” (Hơriso 100:4)
Nơ̆r jet tơchĕng pơwao:
– Hơriso 100 bơtho kơ rim bơngai athei pơm kiơ kơplah năm tơ Hnam ‘Lơ̆ng Rơgoh wă kơkuh kơ Kră Yang?
– Lu bơ̆n oei kơkuh kơ Kră Yang rim giĕng jơhngơ̆m bơ̆n thoi yơ?
Hơriso 100 jơ̆ sơ̆p tơdrong hơri krao đĭ đăng bơngai mă oei lăm teh đak ưh kơ sĭ lăp lu kon pơlei Isơrael đĕch ôh, athe ưang păng bơnê kơ Kră Yang ‘Bok Kei-Dei kơplah năm tơ hnam akŭm dơ̆ng ‘bơ̆t anăp Sư (trong 2, 4). Bơnê kơ Kră Yang ‘noh minh tơdrong gĭt kăl lăm tơdrong kơkuh kơ ‘Bok Kei-Dei lăm chăl Pah so sơ̆ lăm tơdrong pơyơ̆r tơmam soi. Bơngai chih athei đĭ đăng bơngai lăm teh đak ‘nâu, adrol hloh bơnê kơ Kră Yang đơ̆ng lăm tơdrong hơri, ưang (trong 1, 4). Pơtrơp dơ̆ng noh “Bơ̆jang bĕ kơ Kră Yang hăm tơdrong chơt hiôk” (trong 2). Lăm trong 3, bơngai chih yua iŏk dơ̆ng nơ̆r “Lu bơ̆n”, jơ̆ nơ̆r đơ̆ng bơngai chih pơma roi hăm Kră Yang: “Athei bơnê na mơ̆t lăm ‘măng jang Sư, bơnê ư-ang bĕ na mơ̆t lăm cham Sư. Bơnê bĕ kơ Sư păng hơri ư-ang kơ anăn Sư.” (trong 4).
Bơnê ‘noh tơ’bôh jơhngơ̆m bơ̆n băt kơ bơnê, kơplah đei tơdrong pŭn hiôk đơ̆ng Kră Yang ăn. Bơnê noh kư̆m tơdrong mơn dah mă lui ngeh dôm tơdrong pŭn hiôk mă bơ̆n đei lăm tơdrong arih tă kơ đơ̆ng ‘Bok Kei-Dei ngăl. Tơdrong mă sơ’ngon ‘biơ̆ noh lơ bơngai đei tơdrong pŭn đơ̆ng Kră Yang ăn na ưh kơ băt bơnê kơ Sư! ‘Noh bơih yua kơ kiơ mă bơngai chih hla bơar athei rim bơngai “Athei băt Kră Yang jơ̆ ‘Bok Kei-Dei, Sư boih Tơ’ngla pơjing bơ̆n, lu bơ̆n jing tơmam Sư. Lu bơ̆n kon pơlei pơla Sư, jơ̆ kon triu lăm tơmăn ‘nhĕt Sư” (trong 3). Lu bơ̆n tơmam ‘Bok Kei-Dei, Sư pơjing păng wei rong bơ̆n truh dang ei. Lơ bơngai khan ‘Bok Kei-Dei đei pơm kiơ kơ inh na athei chu kơkuh, bơnê kơ Sư? Lu sư hiơt “thoi noh na iĕm gơh jing kon ‘Bok Kei-Dei ‘Bă bơ̆n tơ plĕnh ti, yua kơ Sư kư̆m ‘mêm kơ lu bơngai noh, na Sư ăn măt ‘năr pơchrang hơdah kơ đĭ-đăng bơngai, mă bơngai ‘lơ̆ng mă bơngai kơnê̆. Sư ăn đak ‘mi lei-lăi mơ̆n ưh kơ ‘mêm kơ bu wă pơdê bu ôh.” (Mathiơ 5:45). ‘Bok Kei-Dei ‘mêm ling lang ăn tơdrong kăl wă kơ dôm tơmam Sư mă khan lơ bơngai iŏk mă ưh kơ băt bơnê, na sơngah kơ Sư hloi tăm! lăm trong 5, bơngai chih athei đĭ đăng teh đak athei bơnê kơ Kră Yang, yua kơ Kră Yang ‘lơ̆ng, tơdrong ‘mêm păng tơdrong ‘lơ̆ng tơpăt Sư oei oei ling lang.
Phŏ phŏ lơ wơ̆t bơ̆n năm tơ hnam akŭm đơ̆ng noh wih brŏk nhen thoi tơdrong juăt đĕch, dah mă bơ̆n năm tơ hnam akŭm wă kơ tơ’bơ̆p băl, kuay phim, phĭn rup na jơhngơ̆m ưh kơ lăng tơ Kră Yang wă kơkuh ko Sư mă trŏ. Kră Yang wă kơ bơ̆n kơkuh kơ Sư hăm jơhngơ̆m chơt hiôk, bơ̆jang, ưang kơ Kră Yang, bơnê gah dôm tơdrong Sư ăn “Athei bơnê na mơ̆t lăm ‘măng jang Sư, bơnê ư-ang bĕ na mơ̆t lăm cham Sư. Bơnê bĕ kơ Sư păng hơri ư-ang kơ anăn Sư. Yua kơ Kră Yang ‘lơ̆ng, tơdrong ‘mêm Sư oei oei ling lang. Păng tơdrong ‘lơ̆ng tơpăt Sư dĭng truh tơ ning-mônh.” (trong 4-5). Athei kơkuh kơ Sư, hơri ưang păng krao khan, hăm jơhngơ̆m băt bơnê kơ Sư.
Kơkuh kơ Ih ‘Bă! Inh bơnê kơ ‘Bă yua kơ ‘Bă bơih Yang mă ‘mêm, ‘lơ̆ng tơpăt ling lang wei rong inh! Apinh Ih ăn kơ inh kơkuh kơ Ih hăm jơhngơ̆m băt bơnê păng ưang Anăn Ih ling lang. Krao khan yua anăn Kră Yang Yêsu Krist, Amen.
Bơ̆n tơ’bôh jơhngơ̆m bơnê kơ Kră Yang thoi yơ kơplah kơkuh kơ Sư?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 21
Kênh Youtube BHKTHN:
