Phau Ntawv Nkauj 100:1-5
Nqe cim:
“Cia li mus hauv nws lub Tuamtsev thiab ua nws tsaug; cia li mus rau hauv tej chav tsev thiab qhuas nws.Cia li ua nws tsaug thiab qhuas nws lub npe.” (Phau Ntawv Nkauj 100:4).
Lus nug rau sawvdaws xav:
– Ntawv Nkauj 100 qhia txhua tus yuav tsum ua dabtsi thaum mus hauv Lub Tuamtsev qhov chaw dawbhuv pehawm Vajtswv?
– Peb pehawm Vajtswv txhua lub thiv ntawm lub siab li cas?
Phau Ntawv Nkauj 100 yog ib zaj nkauj uas caw txhua tus neeg hauv ntiajteb, tsis yog cov Yixayees xwb, cia li qhuas thiab ua Vajtswv tsaug thaum lawv tuaj rau hauv lub Tuamtsev tshwm ntsejmuag rau ntawm Vajtswv (nqe 2, 4). Ua Vajtswv tsaug yog ib feem tseemceeb ntawm kev pehawm Vajtswv nyob rau hauv phau Vajluskub qub thaum lawv fij khoomfij rau Nws. nrog rau kev txi. Tus sau nqua hu thoob lub ntiajteb no, ua ntej cia li ua Vajtswv tsaug dhau los ntawm kev hu nkauj thiab qhuas Nws (nqe 1, 4). Txuas ntxiv, “Cia li zoo siab thiab pehawm tus TSWV” (nqe 2). Hauv nqe 3 tus sau hloov mus siv lo lus “peb”, yog qhia tawm nws lub siab rau Vajtswv, tsis tas li ntawd kuj yog nws qhia meej txog lub siab ua tsaug thiab qhuas Vajtswv yuav tsum mus ua ke thaum mus rau hauv tus Tswv Lub Tuamtsev: “Ciali mus hauv nws lub Tuamtsev thiab ua Nws tsaug; ciali mus rau hauv tej chav tsev thiab qhuas Nws. Ciali ua Nws tsaug thiab qhuas Nws lub npe” (nqe 4 MWW).
Ua Vajtswv tsaug yog ib qho qhia txog peb nco Nws txiajntsig rau tej koob hmoov uas Nws tau pub rau peb. Ua Vajtswv tsaug kuj yog ib qho kev lees paub lossis ntseeg hais tias txhua yam koob hmoov uas peb muaj puavleej yog los ntawm Vajtswv los. Yam uas txaus tu siab yog coob tus tau txais tej uas Vajtswv pub tiamsis lawv tsis lees paub Nws! Ntawd yog qhov vimchiv uas tus sau nqua hu txhua tus tibneeg “Cia li lees hais tias tus TSWV yog Vajtswv. Nws tsim peb” (nqe 3). Peb yog Vajtswv tsim, Nws tsim peb thiab saib xyuas peb txog niaj hnub nom no. Coob leej ntau tus hais tias Ntuj ua tau dabtsi rau kuv ua li cas kuv yuav tsum pehawm thiab ua Nws tsaug? Lawv tsis nco qab hais tias: “Vajtswv ua nws lub hnub ci rau cov neeg ua phem thiab cov neeg ua zoo, thiab tso nag los rau cov neeg ncaj thiab cov neeg tsis ncaj ib yam nkaus” (Mathais 5:45). Vajtswv muaj kev hlub tshua thiab ibtxwm pub yam uas cheemtsum ntawm kev ua neej rau txhua tus uas Nws tsim, txawm yog coob tus tsis ua Nws tsaug, tsis lees paub Nws los xij! Yog li ntawd hauv nqe 5 tus sau thiaj piav txog qhov vimchiv neeg thoob ntiajteb cia li ua Vajtswv tsaug, vim Vajtswv yog tus zoo, Nws txoj kev hlub thiab kev ncaj ncees yeej tsis hloov.
Muaj ntau zaus peb mus tom Tuamtsev txhua lub thiv rov los tsev zoo li ib qho ua swm lawm, lossis peb tsuas tuaj sib ntsib yees duab thaij duab ua ke tiamsis lub siab yeej tsis tig mus pehawm Vajtswv rau qhov uas tsimnyog. Vajtswv xav kom peb pehawm Nws ntawm lub siab xyivfab hlo, ua haujlwm, txhawb nqa Vajtswv, ua Vajtswv tsaug rau tej uas Nws pub. “Ciali mus hauv lub Tuamtsev thiab ua Nws tsaug; ciali mus rau hauv tej chav tsev thiab qhuas Nws. Ciali ua Nws tsaug thiab qhuas Nws lub npe. Tus TSWV yog tus uas zoo; Nws txoj kev hlub nyob mus ibtxhis; thiab Nws txoj kev ncajncees nyob mus ibtxhis tsis kawg” (nqe 4-5 MWW). Cia li pehawm Vajtswv, qhuas thiab thov Vajtswv los ntawm lub siab uas paub nco Nws txiajntsig.
Thov Vajtswv,
Vaj Leej Txiv! Nyuam yaus ua Koj tsaug vim Koj muaj lub siab zoo, thiab ibtxwm ncaj ncees tu saib xyuas nyuam yaus! Thov pab kom nyuam yaus muaj lub siab pehawm Koj ntawm txoj kev qhuas, txhawb nqa, ua tsaug thiab nco ntsoov Koj txiajntsig mus li. Nyuam yaus tuav Tswv Yexus Khetos lub npe thov, Amees.
Ib tsoom mloog uas hmov tshua
Peb qhia tshwm lub siab ua Vajtswv tsaug li cas thaum pehawm Nws?
Nyeem Vajluskub hauv peb lub xyoos: Yelemis 21
Kênh Youtube BHKTHN:
