Mathais 22:15-22
Nqe cim:
“Yam uas yog Xixas li, cia li muab rau Xixas thiab yam uas yog Vajtswv li, cia li muab rau Vajtswv.” (Mathais 22:21b)
Lus nug rau sawvdaws xav:
– Cov neeg Falixais thiab Helauj cov tubtxib tuaj nug Tswv Yexus yam dabtsi? Vim li cas?
– Tus Tswv teb lawv zoo li cas?
– Peb tabtom ua tiav feem xyuam pub rau Vajtswv, pub rau lub tebchaws zoo li cas?
Tom qab uas Tswv Yexus hais txog peb zaj lus pivtxwv ntsig txog Vajtswv txojkev txiav txim rau cov neeg Yudais uas tsis ntseeg, tawv ncauj, ces cov neeg Falixais thiab Helauj cov tubtxib txawm koom siab nrhiav tswvyim nkaug Yexus tej lus. Txawm yog ob pab neeg no yeej muaj qhov tsis sib haum los lawv saib Tswv Yexus zoo li ib tug txaus ntshai yog li lawv thiaj koom siab txov Tswv Yexus. Lawv qhib ncauj qhuas tus Tswv tias Nws yog tus ncaj ncees thiab lawv ntseeg tias Yexus yeej qhia qhov tseeb. Lawv txawm nug Yexus: “Yog peb them se rau Xixas puas txhaum peb txoj kevcai los tsis txhaum?” (nqe 17). Lub sijhawm uas cov Loos kav cov neeg Yudais, lawv sau ntau yam se xws li se av, khoom ua rau cov neeg Yudais pluag tas, yog li ntawd lawv ntxub cov neeg Loos heev. Pab neeg no lo lus nug yog ib lo lus ua nyuaj rau Tswv Yexus. Yog tus Tswv teb tias yuav tsum them se lossis tsis teb, ces Nws yuav raug cov neeg Yudais rhuav tsis ntseeg Nws qhia, tiamsis yog tus Tswv hais tias tsis them se, ces Tswv Yexus yuav raug cov nomtswv Loos ntes vim tawmtsam nomtswv.
Tswv Yexus paub cov neeg nug Nws lub siab xav phem, tus Tswv muab lawv hu ua “cov neeg ntsejmuag ncaj siab nkhaus”, txhais tau tias tsis ua li lawv hais, lawv tsuas txhob txwm tuaj ntxias tus Tswv ua txhaum xwb (nqe 18). Tus Tswv kom lawv muab lub nyiaj uas lawv them se rau Nws saib, lawv txawm muab lub nyiaj uas yog cov neeg Loos cov nyiaj rau Yexus. Tus Tswv nug lawv txog tus duab thiab lub cim no yog leejtwg? Lawv teb tias yog Xixas li. Tswv Yexus teb lawv lo lus nug sim Yexus rau lawv, tus Tswv muab ib tug lw rau lawv daws qhov teebmeem no: “Yam uas yog Xixas li, cia li muab rau Xixas thiab yam uas yog Vajtswv li, cia li muab rau Vajtswv.” (nqe 21). Hais txog sab nqaij tawv, lawv tabtom nyob qab tswj hwm ntawm cov neeg Loos kav, yog li yuav tsum ua tiav feem xyuam rau Xixas; hais txog sab ntsujplig, lawv tabtom pehawm Vajtswv yog li kuj yuav tsum ua tiav feem xyuam rau Nws thiab. Lawv xav tsis thoob thaum hnov cov lus ntawd ces lawv txawm mus tsev.
Cov ntseeg Yexus tamsim no yog pejxeem rau ib lub tebchaws, yog li peb yuav tsum ua tiav feem xyuam ua ib tug pejxeem rau lub tebchaws. Yog li ntawd, peb kuj yog pejxeem nyob saum ntuj ceebtsheej, yog li peb kuj yuav tsum ua kom tiav feem xyuam rau Vajtswv thiab Nws Pawg Ntseeg, tsis tau cai ua txog tog muab tso tseg lossis saib tsis taus. Txawm li ntawd los, muaj ntau leej thaum tabtom ua kom haum tej vajntxwv hauv ntiajteb no siab, txawm cia li tsis nco ua lossis saib qis qhov ua haum tus Vajntxwv uas nyob saum ntuj siab lawm. Tsis txhob hnov qab feem xyuam ua tus pejxeem saum ntuj ceebtsheej los ntawm qhov kev pehawm, fij khoom nyiaj txiag, rau siab ntso ua tus Tswv haujlwm thiab ua lub neej rau Nws tau ntsejmuag.
Thov Vajtswv,
Tus Tswv, thov pab kom nyuam yaus niaj hnub zeem paub feem xyuam ua rau Koj, rau tebchaws, nyuam yaus thiaj ua tiav feem xyuam ua haum Koj siab dhau los ntawm kev ua neej. Nyuam yaus tuav Tswv Yexus lub npe thov. Amees.
Peb puas tabtom ua tiav feem xyuam rau tus Tswv thiab rau lub tebchaws?
Nyeem Vajluskub hauv peb lub xyoo: Yelemis 3
Kênh Youtube BHKTHN:
