Blŭng a 1:20-25
“Ơ Kră Yang, tơdrong jang Ih lơ tơpă. Hăm tơdrong gơh hơgei Ih pơjing tôm tơmam. Kơpal teh ‘bĕnh ‘bang kơ tơmam Ih.” (Hơriso 104:24)
Nơ̆r jet tơchĕng pơwao:
– Kră Yang ‘Bok Kei-Dei đei bơjing dôm lu tơmam thoi yơ?
– Kră Yang đei pơjing sem păr kơ pal plĕnh, ka lăm đak dơsĭ, hăm dôm lu sem dơrong pơpơ̆ đei tơdrong hlĭch kiơ?
– Lu bơ̆n pơchŭt thim tơdrong lui thoi yơ kơplah lăng bôh dôm tơmam đơ̆ng ‘Bok Kei-Dei pơjing?
Đơ̆ng rŏng kơ Kră Yang pơjing ‘bĕnh kơ sơngŏng kơ pal plĕnh, lăm tơdrong ppơjing năr 4 păng năr 5 Kră Yang ‘Bok Kei-Dei đei pơjing dôm tơmam arih. Lăm kơ pal plĕnh dôm kơ lu sem păr ‘lơ̆ng rŏ dêh, păng dôm tơmam mă tih mă iĕ đei pơjing noh. Lăm glung krong, dơnâu, đak dơsĭ Kră Yang đei pơjing dôm kơ tơmam arih mă khan dôm lu tơmam tih dah tơmam iĕ, mă khan đơ̆ng tơmam mă khan lăng păng măt bơ̆n hơnat kơ ‘bôh dah mă Ka Rôih tih dêh lăm đak dơsĭ. Kơpal teh kŭm đei ‘bĕnh bla kơ tơmam arih nhen thoi kơ sem bri brah, tơmam kon bơngai rong kiơ̆ kơ adrĕch (trong 21,25)
Tơdrong ‘Bok Kei-Dei pơjing noh pha ra ngăl, păng lơdêh păng đei tơdrong tơproh. Teh đak ưh kơ trŏ kơ tơdrong pơjing lei lăI lei lăi đĕch ôh. Mă lei dôm tơdrong đêl Kră Yang pơjing noh ‘lơ̆ng dêh păng lơ lap ưh kơ jĕ jô̆ dôm tơdrong ‘lơ̆ng dêh đơ̆ng Sư pơjing. Kră Yang ăn kơ dôm sem dơrong đei chek lar char kon wă kơ bĕnh blai jơ̆p kơ teh đak, lăm kơpal plĕnh mă khan lăm đak dơsĭ (trong 22). Sem pơjing kơ sem, Ka pơjing ka, sem dơrong pơjing sem dơrong. Dôm kơ tơmam đơ̆ng ‘Bok Kei-Dei pơjing păng chek lar “kiơ̆ kơ khul”. Nơ̆r âu đei pơma hơđăl kơ bơ̆n ‘Bok Kei-Dei đei hơgăt lê̆ wă kơ tơdrong arih đei jơnoi păng tơproh, wă kơ dôm tơdrong đơ̆ng ‘Bok Kei-Dei đei pơjing na chek lar rôi hloh.
Lăm kơpal teh đei ‘bĕnh blai kơ dôm tơmam đei pơjing lơ tơdrong pha ra, nơ̆r bơ̆n kơ tơ̆ng re, dôm tơdrong mă bơ̆n ‘bôh păng măt, dôm tơdrong đei yak năm, lu bơ̆n kŭm kăl kơ hơdai hăm bơngai đei chih lăm Hơriso đei ư-ang kơ Pêng Anăn Yang ‘Bok Kei-Dei: “Ơ Kră Yang, tơdrong jang Ih lơ tơpă. Hăm tơdrong gơh hơgei Ih pơjing tôm tơmam. Kơpal teh ‘bĕnh-‘bang kơ tơmam Ih.” (Hơriso 104:24). Lăm tơdrong mă Kră Yang đei pơjing lơ dêh hlich chrơp dêh noh wă ba ăn kơ kon bơngai. Lu bơ̆n lui ngeh, kơplah Kră Yang đei pơjing ‘bĕnh kơ tơmam lăm teh đak âu đơ̆ng tơdrong ưh kơ đei, na thoi noh mơ̆n Kră Yang gô tuh ăn rim kơ chăl arih bơ̆n tơdrong mah rơkah rơ kai đơ̆ng sư mơ̆n. Rim kơ chăl arih bơ̆n lăm Kră Yang ưh kơ trŏ hơdrô̆ bơ̆n đei tơdrong arih đĕch mă lei kư̆m đei tơdrong arih ‘lơ̆ng rŏ păng hiôk jơnap (Yôhan 10:10)
Ơ Kră Yang, kon bơnê kơ Ih yua kơ Ih đei pơjing ‘bĕnh ‘blai kơ tơmam lăm kơpal teh âu. Kơplah Inh đei lăng dôm tơmam mă ‘lơ̆ng dêh đơ̆ng Kră Yang pơjing jơhngơ̆m inh ư-ang kơ tơdrong pơjing ‘lơ̆ng rŏ hlĭch chrơp Ih. Apinh chăl arih Inh đei mơn kơ tơdrong tuh ăn đơ̆ng Kră Yang rim năr, wă kơ inh đei arih đei yua lăm tơdrong ư-ang anăn Ih. Yua anăn Kră Yang Yêsu Krist. Amen
Lu bơ̆n hăm đei rơhing kơ tơdrong đơ̆ng ‘Bok Kei-Dei tuh ăn lăm chăl arih bơ̆n tơdrong tôm mah lăm ‘lơ̆ng rŏ đơ̆ng Sư ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: II Hơ’mon 26-27
Kênh Youtube BHKTHN:
