Chivkeeb 1:20-25
Nqe cim:
“Tus TSWV, koj tsim ib puas tsav yam! Thaum peb saib tej uas koj tsim los ntawd ua rau peb pom hais tias koj yog tus muaj tswvyim! Lub ntiajteb puv nkaus txhua tsav yam uas koj tau tsim tseg” (Ntawv Nkauj 104:24)
Lus nug rau sawvdaws xav:
– Vajtswv tsim txhua yam tsiaj li cas?
– Nyob hauv kev tsim noog saum ntuj, ntses hauv dej thiab tej tsiaj txhu muaj qhov txawv txav li cas?
– Peb tau txais kev txhawb zog li cas thaum pom lub ntiajteb puv nkaus tej uas Vajtswv tsim?
Tom qab uas twb ua kom lub ntuj lub teb puv nkaus tej yam ci saum nruab ntug lawm, ces nyob hauv hnub tsim thib tsib thiab thib rau txuas ntxiv, Vajtswv ua kom lub ntuj, dej hiavtxwv thiab tej av hauv ntiajteb puv nkaus txhua yam muaj txojsia. Nyob saum nruab ntug muaj txhua hom noog ya nrog ntau yam xim zoo nkauj, muaj txhua hom loj thiab me sib txawv tau tsim los. Nyob hauv nruab deg, nruab tiv txwv, Vajtswv tsim txhua yam muaj txoj sia, txij li tej kab me me uas tibneeg qhov muag yuav luag tsis pom, mus txog tej tus ntses choo loj tshaj plaws uas khiav hauv dej. Hos saum nruab nqhuab ces puv nkaus txhua hom tsiaj qus, tsiaj txhu thiab tej tsiaj tawv muaj nplai raws li nyias yam (nqe 21, 25).
Txhua yam uas Vajtswv tsim tsis sib thooj, muaj ntau hom thiab muaj qib quas. Lub ntiajteb tsis yog ib lub chaw tsim khoom loj uas tej khoom raug luam thiab tsim los zoo ib yam nkaus thiab tsis muaj qhov txawv txav. Tiamsis yog ib lub ntiajteb ntuj tsim uas muaj ntau yam, ntau xim, sib txawv uas nyuaj totaub heev nyob sib xyaw ua ke. Vajtswv pub rau txhua yam tsiaj muaj peevxwm yug menyuam kom puv nkaus lub ntiajteb, tsis hais saum nruab ntug thiab hauv nruab tiv txwv (nqe 22). Noog yug noog, ntses yug ntses, tsiaj qus yug tsiaj qus. Txhua yam muaj txojsia tau tsim thiab loj hlob “raws li nyias yam.” Lo lus no tau hais tawm ntau zaus qhia hais tias Vajtswv tau teeb tsa tej cej ciam kom txojsia muaj nyob tsis tu raws li qib quas, ua kom Nws tes haujlwm tsim txhua yam nyob ruaj khov thiab huamvam mus ntxiv.
Thaum saib lub ntiajteb uas puv nkaus tej uas Vajtswv tsim muaj ntau hom xim, ntau hom suab, ntau hom cev nqaij, ntau hom mus kev, peb yuav tsum koom siab nrog tus sau Phau Ntawv Nkauj qhuas Vajtswv Vaj Peb Leeg hais tias: “Tus TSWV, koj tsim ib puas tsav yam! Thaum peb saib tej uas koj tsim los ntawd ua rau peb pom hais tias koj yog tus muaj tswvyim! Lub ntiajteb puv nkaus txhua tsav yam uas koj tau tsim tseg” (Ntawv Nkauj 104:24). Nyob hauv Vajtswv tes haujlwm tsim txhua yam, peb pom ib lub ntiajteb uas muaj ntau hom, muaj txojsia puv nkaus uas Vajtswv npaj txhij rau tibneeg. Peb ntseeg hais tias, Vajtswv twb ua kom lub ntiajteb do dus dhau los ua qhov chaw puv nkaus txojsia lawm, ces Nws yeej yuav ua kom peb lub neej puv nkaus Nws txojsia uas nplua mias. Ib lub neej uas nyob hauv Vajtswv mas tsis yog tsuas tau txojsia xwb, tiamsis tseem tau txojsia nplua mias (Yauhas 10:10).
Thov Vajtswv,
Tus Tswv, ua tsaug rau qhov uas Koj tau ua kom lub ntiajteb no puv nkaus txhua yam uas Koj tsim. Thaum nyuam yaus ntsia tej tsiaj txhu zoo nkauj, sib txawv, ntau hom nyob hauv ntiajteb, nyuam yaus lub siab tsa suab qhuas Koj lub hwjchim, lub tswvyim uas zoo kawg nkaus. Thov kom nyuam yaus lub neej txais tau tej yam nplua mias uas Koj pub, kom nyuam yaus ua neej muaj qabhau thiab txhawb nqa Koj lub npe mus li. Nyuam yaus tuav Yexus Khetos lub npe thov, Amees.
Peb puas ntshaw tau tus Tswv ua kom peb lubneej nplua mias, puv npo thiab puv nkaus txhua yam xim?
Nyeem Vajluskub hauv peb lub xyoos: II Xwmtxheej 26-27
Kênh Youtube BHKTHN:
