I Samuel 8:1-9
“Trong kon bơngai wă tă tơpăt kiơ̆ kơ măt sư kơdih. Mă-lei đei Kră Yang lăng lăm jơhngơ̆m.” (Tơdrong Pơđơ̆k 21:2)
Nơ̆r jet tơchĕng pơwao:
– Kon pơlei Isơrael proh hơmet nơ̆r pơma liơ wă gơh ăn kơ lu sư đei pơtao?
– Bơ̆n khan lăng lu sư proh hơmet nơ̆r pơma wă pơm kiơ?
– Bơ̆n ngăl proh hơmet nơ̆r pơma kiơ ei lei-lăi lu sư noh wă pơma rơđah tơdrong bơ̆n ưh kơ kiơ̆ nơ̆r Kră Yang?
Kon pơlei Isơrael ăn pêng nơ̆r mă lu sư proh hơmet wă kơ ‘bok Samuel pơjing ăn lu sư minh ‘nu pơtao (tr.5). Mă minh, lu sư khan ‘bok Samuel đĭ kră pă kĕ bơih ưh tôm mah jơhngơ̆m pran, ưh pă hơdrăl hơlăng wă pơgơ̆r. Mă ‘bar, bre kon sư ưh đon ‘lơ̆ng ưh pă tôm mah. Mă pêng, lu bơngai dêh char nai đei pơtao pơgơ̆r na kon pơlei Isơrael ‘maih rok lu đe ei.
Bơ̆n kăl kơ ‘blŏk răk minh ‘bar tơdrong ‘nâu hơdrol kơ wă khan đe pơma trŏ dah glăi. Mă minh, kon pơlei Isơrael noh, lu sư wă proh nơ̆r pơma noh lu sư pôm gơnang kơ tơdrong gơh hơgei kơdih đĕch,ưh kơ chă wă kơ băt tơdrong Kră Yang wă ôh. Lu sư wă hơmet tơdrong ei,lu sư lăng đơ̆ng tơdrong anat ‘bơ̆t anăp lu sư đĕch ưh kơ lăng hăm đon lui kơ Kră Yang. Mă ’bar, kon pơlei Isơrael ưh kơ kơnăl kơ kon pơlei Kră Yang hăm kon pơlei dêh char tơmoi nai. Phŏ đei lu tơdrong kiơ kơnh lu tơmoi nai bơngai ưh kơ lui gơh pơm, mă-lei kon pơlei Kră Yang ưh kơ gơh pơm ôh lu tơdrong ‘nei. Lơ bơngai lui bơ̆n đei lu tơdrong kiơ, thoi yơ, pơm kiơ ei đơ̆ng ‘ngoaih, đơ̆ng lu bơngai mă ưh kơ lui noh, chĕp tơmơ̆t lăm Khul lui na pơma tơblang khan yua kơ kiơ bơ̆n ưh kơ tơplih rok thoi tơdrong ‘lơ̆ng mă kon pơlei pơla gơh yua iŏk pơm rok dôm tơdrong đơ̆ng lu bơngai wei kon pơlei pơla lăm teh đak âu mă đei lơi yua tih bơih noh, ưh kơ trŏ kơ Khul Lui bơ̆n ưh kơ tơplih ‘nao dah ưh kơ pơm rok đêl lu bơngai wei kon pơlei pơla jang, pơm mă đei lơi yua bơih noh ôh, mă-lei kăl kơ hơlăng hơdrăl wă gơh kơnăl kơ tơdrong Khul Lui thoi yơ, tơdrong lu kon pơlei pơla ala teh âu thoi yơ. Khul Lui bơ̆n Kră Yang pơdơ̆ng ‘bơ̆t hơnă tơm wă khan nơ̆r ‘Bok Kei-Dei. Yua kơ ‘noh bơih na dôm tơdrong bơ̆n wă pơm, athei đơ̆ng nơ̆r Kră Yang bơtho ngăl.
Mă pêng, kon pơlei hiơt đĭ bơih ‘bai hŏk hlôi đei bơih sơ̆, tơdrong hnam dơnŏ ‘bok Samuel ‘nâu kư̆m wă lei-lăi thoi tơdrong hnam dơnŏ ‘bok Soi Hêli ki sơ̆ mơ̆n, mă khan lei ră, mă-lei ‘bok Hêli ei, sư ưh kơ chă wă kơ băt tơdrong Kră Yang wă kơ sư pơm kiơ, na Samuel ‘nâu sư oei hơnơ̆ng hli yom kơ Kră Yang,sư krao khan apĭnh hơpơi anăn Kră Yang. Na ‘bơ̆t tơdrong ‘bok Hêli ei,’Bok Kei-Dei ưh kơ ăn kơ lu sư đei pơtao pơgơ̆r ôh, ‘Bok Kei-Dei ăn kơ lu sư minh ‘nu ‘bok sek tơlang noh ‘bok Samuel, sư sek tơlang,pơgơ̆r thoi ‘bok pơtao mơ̆n, lei yua kơ kiơ kon pơlei Isơrael kuă pă lui gơnang,kuă kơ răp gô mơ̆ng kơ Kră Yang hơmet ăn?
Mă puăn, tơdrong kon pơlei blah plơ̆ Kră Yang noh lĕch đơ̆ng jơhngơ̆m lu sư pơang,lu sư ưh kơ dan Kră Yang pơm tơm lăm jơhngơ̆m lu sư (8).Tơdrong lu sư tơchĕng wă noh ưh tơchĕng kơ yang ayơ mă yŏng lu sư; lu sư tơchĕng kơ yang ayơ mă ba ăn lơi yua kơ lu sư. Nơ̆r đei chih “Samuel ưh kơ lăp đon”(6) nơ̆r tơm đơ̆ng nơ̆r Hêbrơ pơma pran dêh wă khan “ tơdrong kơnê̆, Samuel lăng kơnê̆ dêh”
‘Nâu bơ̆n wơ̆t hơlơ̆k dơ̆ng tơ nơ̆r jet: Lu nơ̆r mă kon pơlei Isơrael proh dan noh trŏ dah glăi?
Nơ̆r tơl ăn kơ bơ̆n băt: – Bơ̆n tŏk-bŏk oei dan bu pơm tơm,pơm hơnă kơjăp lăm chăl arih bơ̆n, păng bu tơm lăm tơdrong bơ̆n wă pơm wă jang! Bơ̆n athei ‘blŏk: “Trong kon bơngai wă tă tơpăt kiơ̆ kơ măt sư kơdih. Mă-lei Kră Yang ”bơih Tơ’ngla tơgŭm bơ̆n băt : rơih pơm kiơ ei trŏ, rơih pơm ei glăi.
Bơ̆n athei krao khan tơgŭm hnam dơnŏ păng Khul Lui bơ̆n huay kơ huŏng lăm lu tơdrong yoch glăi thoi kon pơlei Kră Yang sơ̆.
Ơ Kră Yang, apinh Ih pă jô̆ yo dôm tơdrong kơhlôh kơwao inh ‘bơ̆t lơ wơ̆t mă inh pơang khan inh gơh rơih wă pơm tơdrong âu,pơm tơdrong to lăm chăl arih inh, păng ưh kơ kơnăl kơ mưh gơnang kơ Ih pơgơ̆r, bơtho tơ’bôh chông anhăk, ‘mêm mơnat, bơwei noh đei tơdrong pŭn hiôk tih. Inh krao khan yua anăn Kră Yang Yêsu Krist, Amen!
Bơ̆n hăm hơnơ̆ng kơ krao khan tơgŭm hnam dơnŏ păng Khul Lui wă kơ ling-lang rơih iŏk dôm tơdrong wă jang, wă pơm, rơih trŏ thoi Kră Yang wă ưh?
Đŏk Sơ̆p Hla bơar ‘Bok Kei-Dei lăm pêng sơnăm: II Hơ’mon 11
Kênh Youtube BHKTHN:
