Klei Aê Diê Blŭ: Bruă Phung Khua Ƀĭng Kna 4:23-31
Êlan kliăng: “Kyuadah Aê Diê amâo brei ôh kơ drei mngăt blao, ƀiădah mngăt ktang, thâo khăp, leh anăn thâo dôk djŏ hnơ̆ng” (II Y-Timôthê 1:7)
Klei êmuh ksiêm mĭn: Ya klei Phung Sang Aê Diê ngă tơdah dua čô khua ƀĭng kna Y-Pêtrôs leh anăn Y-Yôhan kbiă mơ̆ng war mnă? Ya klei truh tơdah Phung Sang Aê Diê bi mguôp sa ai wah lač? Mơ̆ng klei yăl dliê anei mtrŭt drei hur har ya čiăng ngă kơ Phung Sang Aê Diê hlăm bruă hiu hưn Klei Mrâo Mrang Jăk?
Phung ƀĭng kna tal êlâo hlăk dôk tŭ klei arăng ngă jhat ktang tĭt kyua klei đăo leh anăn klei hiu hưn Klei Mrâo Mrang Jăk. Hăm trăn anei, Khua ƀĭng kna Y-Pêtrôs leh anăn Khua ƀĭng kna Y-Yôhan arăng mă krư̆ hlăm war. Arăng atăt ba digơ̆ dôk ti anăp phung khua kiă kriê phung ƀuôn sang êmuh digơ̆ kơ klei bi hlao sa čô êwiên ti Ƀăng Jang Siam. Digơ̆ dôk găn klei arăng ngă jhat kyua mtô hưn kơ Khua Yang Yêsu (Bruă Phung Khua Ƀĭng Kna 4:1-12). Leh arăng phưi mtam digơ̆ dua nao bi tuôm hŏng phung ƀĭng kna mkăn yăl dliê wĭt jih ya klei truh leh. Êdei anăn, diñu bi mguôp sa ai dơ̆ng wah lač. Mâo lu mta klei hlăm klei diñu wah lač êlâo anăn. Hlăm êlan 29, diñu akâo “Ară anei, Ơ Khua Yang, brei Ih ksiêm dlăng klei diñu arưp aram, leh anăn brei kơ phung dĭng buăl Ih hưn klei Ih blŭ hŏng klei jhŏng”. Blŭ mdê, diñu akâo kơ Khua Yang brei kơ diñu klei jhŏng čiăng đăm dôk kriêp ñăt ôh hlăk êjai arăng arưp aram, amâo jing blao ôh êjai arăng ngă jhat ƀiădah mâo klei jhŏng ktang hĭn hiu hưn Klei Mrâo Mrang Jăk.
Klei phung ƀĭng kna wah lač hưn mdah klei arăng arưp aram leh anăn klei lông dlăng diñu dôk tlă anăp êjai hiu mtô hưn kơ Khua Yang Yêsu. Ƀiădah lĕ, ktang tuôm hŏng lu klei dleh dlan Phung Sang Aê Diê ktang hĭn êjai hlăm klei wah lač leh anăn knang kơ Khua Yang Yêsu ktang hĭn mơh čiăng dưi mâo klei ktang leh anăn klei jhŏng ăt hiu hưn Klei Mrâo Mrang Jăk. Diñu akâo kơ Khua Yang brei kơ diñu klei jhŏng hưn Klei Aê Diê Blŭ, leh anăn ngă bruă yuôm bhăn leh anăn klei bi knăl mdê hŏng Anăn “Dĭng buăl doh jăk Ih Yêsu” (êlan 30). Klei anei bi êdah ai tiê diñu hmăng hmưi čiăng dưi bi leh bruă jao kơ diñu hŏng klei jhŏng êjai tlă anăp hŏng klei bi kdơ̆ng.
Êlan 31 hưn mdah boh tŭ dưn mơ̆ng klei wah lač: “Leh wah lač, anôk diñu bi kƀĭn ktư̆ mgei. Jih jang diñu bŏ hŏng Yang Mngăt Jăk, leh anăn hưn klei Aê Diê blŭ hŏng klei jhŏng”. Găn klei truh myang anei đru diñu hưn Klei Aê Diê Blŭ hŏng klei jhŏng ktang hĭn êjai mơh. Klei “ktư̆ mgei” anôk anei jing klei bi knăl sĭt nik kơ klei myang leh anăn klei Khua Yang dôk mbĭt hŏng diñu. Klei anăn bi êdah klei Khua Yang wĭt lač kơ klei phung ƀĭng kna kwưh akâo leh anăn lŏ bi kjăp klei diñu čuăn ai tiê hiu hưn Klei Mrâo Mrang Jăk.
Anei jing sa trăn blŭ ktang leh anăn bi mđĭ ai kñăm klei yuôm kơ klei wah lač, klei đăo leh anăn klei knang kơ Yang Mngăt Jăk êjai dôk ti anăp klei arăng bi kdơ̆ng. klei anei bi mđĭ ai phung đăo kơ Krist hruê anei wah lač kơ Phung Sang Aê Diê hŏng jih ai tiê hlăm bruă hiu hưn Klei Mrâo Mrang Jăk kơ Khua Yang Yêsu Krist êjai dôk ti krah lăn ala bi kdơ̆ng hŏng klei đăo drei.
Si ngă drei jih ai tiê wah lač kơ Phung Sang Aê Diê mâo klei jhŏng hlăm bruă hiu hưn Klei Mrâo Mrang Jăk mơ̆?
Wah lač: Ơ Khua Yang, akâo Khua Yang brei kâo mâo klei jhŏng leh anăn klei ktang, čiăng kơ kâo amâo huĭ ôh hiu hưn Klei Mrâo Mrang Jăk wăt tơdah arăng bi kdơ̆ng dưn. Akâo Khua Yang brei kơ Phung Sang Aê Diê Ih thâo kral klei myang Yang Mngăt Jăk êjai bi mguôp sa ai wah lač. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
