Klei Aê Diê Blŭ: Klei Bi Hriêng 24:26
Êlan kliăng: “Hlei pô lŏ wĭt lač hŏng klei djŏ, jing msĕ si klei čŭm ti kƀuê” (Klei Bi Hriêng 24:26)
Klei êmuh ksiêm mĭn: Si mblang jing boh blŭ “djŏ”?Ya ngă pô čih hră bi msĕ klei blŭ djŏ hŏng klei čŭm ti kƀuê? Si phung đăo kơ Khua Yang brei bi êdah klei blŭ?
Klei blŭ phung đăo kơ Krist brei kpă ênô. Boh blŭ “djŏ” hlăm klei blŭ Hêbrơ jing kpă ênô, mtăp mđơr, klă sĭt. Klei blŭ djŏ bi êdah klei blŭ jing mnuih kpă ênô leh anăn blŭ klei sĭt. Klei blŭ djŏ mâo pô čih bi msĕ si “klei čŭm ti kƀuê”. Klei čŭm jing sa bruă ngă bi êdah klei khăp plah wah dua čô mnuih. Tui hlue si dhar kreh grăp ala čar, mâo klei bi êdah klei čŭm mdê mdê. Lu ala čar dlông rŏng lăn mâo klei bhiăn bi blŭ hrăm hŏng klei bi sô̆ miêng hdơ̆ng pô. Hlăm dhar kreh mnuih Yuăn, čiăng bi êdah klei khăp mnuih prŏng hŏng hđeh điêt hlăm gŏ sang amâodah êngao gŏ sang, arăng khăng čŭm ti miêng. Ƀiădah bi êdah klei khăp mniê êkei, arăng khăng čŭm ti kƀuê. Klei čŭm ti kƀuê bi êdah klei bi mguôp klei khăp leh anăn tliêr kjăp snăk plah wah dua čô êkei mniê. Pô čih hră bi msĕ klei čŭm ti kƀuê čiăng thâo klei mdê hŏng klei čŭm ti miêng, kyua čŭm ti miêng jing klei blŭ kkuh alum bi klei čŭm ti kƀuê bi êdah klei khăp, sĭr suôr.
Hlăm klei bi blŭ hrăm bi tuôm amâodah mă bruă, lu mnuih tŭ ư kơ klei amâo kpă ênô čiăng bi êka kơ ƀĭng găp amâodah čiăng duah klei tŭ dưn kơ pô. Ƀiădah Klei Aê Diê Blŭ mtô phung wĭt lač kpă ênô, klei sĭt jing ƀĭng găp sĭt. Mơ̆ng êlan Klei Bi Hriêng anei, Mtao Salômôn čiăng mtô anak čô bi êdah ai tiê kpă ênô pô hŏng grăp čô mnuih hlăm klei wĭt lač kpă ênô, amâo luar ôh amâodah mtŭk mtŭl ngă kơ pô mkăn thâo săng čhuai čiăng ba klei tŭ dưn kơ pô.
Khua ƀĭng kna Y-Pôl mñă klă Khua Yang čiăng kơ phung đăo kơ Krist “êjai hưn klei sĭt nik hŏng klei khăp, brei drei hriê kơ prŏng hlăm djăp mta klei hlăm Krist, Pô jing boh kŏ” (Êphêsô 4:15). Drei drei hdĭp kpă ênô kyua Ama hlăm adiê drei jing Pô Sĭt Nik. Phung ƀuôn sang Aê Diê brei êbat hlăm klei huĭ mpŭ kơ Aê Diê amâo djŏ duah djăp mta klei tĭng yap hŏng klei blŭ hiu mplư phung mkăn čiăng mâo klei tŭ jing. Klei čŭm knŏng jing klei bi knăl mơ̆ng klei khăp, wăt tơdah hlăm dhar kreh mnuih Yuăn, drei amâo yua ôh klei čŭm čiăng kkuh, ƀiădah klei khăp leh anăn klei kpă ênô brei jing tur leh anăn jing klei kñăm hdĭp kơ phung đăo kơ Krist. Klei blŭ bŏ hŏng klei khăp ƀiădah amâo sĭt nik jing knuih hdĭp mgưt; bi klei blŭ sĭt ƀiădah amâo mâo klei khăp snăn kƀah klei thâo bi pap brei, kƀah klei bi đru. Akâo kơ Khua Yang đru brei bi blŭ nanao hdơ̆ng pô hŏng klei blŭ djŏ mơ̆ng ai tiê thâo khăp čiăng kơ grăp čô ƀuh drei jing anak mơ̆ng Pô Sĭt Nik, bŏ hŏng klei khăp.
Drei blŭ nanao klei blŭ hŏng klei khăp leh anăn djŏ hŏng grăp čô mnuih mơ̆?
Wah lač: Ơ Khua Yang, kâo bi mni kơ Ih khăp leh kơ kâo, tŭ klei djiê hrô kơ klei soh kâo. Akâo kơ Ama đru kâo hdĭp kpă ênô nanao hdơ̆ng pô leh anăn bi êdah klei khăp, klei blŭ djŏ hŏng grăp čô mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
