Tơdrong Pơđơ̆k 24:23-25
“Pơma kơ kiơ kơ ‘Bok Kei-Dei Sư gô tơdŏng tơpă lu bơngai mă Sư đĭ rơih boih mă oei krao khan kơ Sư măng năr. ‘Bok Kei-Dei hăm ngê̆ gô đunh ưh? Inh khan kơ iĕm tơpă, ‘Bok Kei-Dei gô tơdŏng hloi lu sư noh.” (Luka 18:7-8a)
Nơ̆r jet tơchĕng pơwao:
– Đei Plei đơ̆ng tơdrong sek tơlang tơpăt ăn kơ lu đê̆ bu?
– Răm ‘băm kơ tơdrong sek tơlang ưh kơ tơpă noh tơdrong kiơ?
– Kơplah lu Kon ‘Bok Kei-Dei sek tơlang tơpăt ba ăn tơdrong lơi yua kiơ?
Đơ̆ng rŏng kơ bơtho kon ‘lơ̆p sư kơdih pơ yom kơ bơngai pơgơ̆r, pơtao Sa-lô-môn tơblŏk ăn kơ kon sư kơdih lăm tơdrong pơgơ̆r kăl kơ sek tơlang tơpăt (trong 23-25), bơngai mă sek tơlang kăl kơ băt tơdrong sư gơh đei tơdrong jang noh jơ̆ lĕch đơ̆ng ‘Bok Kei-Dei lu sư ning mônh kŭm gô đơ̆ng ‘Bok Kei-Dei sek tơlang hăm lu kon pơlei pơla dai mơ̆n. Thoi noh kăl kơ sek tơlang tơpăt wă khan tơpăt hăm rơđah hơđăl. Bơngai đei tơdrong yoch kăl kơ hil kơ sư na bơngai hoei kơ đei tơdrong yoch kăl kơ pĕng bơ̆ng. Kơplah anih sek tơlang đơ̆ng lu bơngai sek noh ưh kơ tơpăt ưh kơ trŏ hơdrô̆ hnam dơnŏ sư đĕch gơ̆p hơreh hơrĕnh mă lei tơdrong noh ‘bơm kơ kon pơlei pơla hiap pơtê̆. Lăm tơdrong pơgơ̆r teh đak, lơ pơtao sek tơlang ưh kơ tơpăt pơm kơ teh đak nai hơreh hơrĕnh, hiĕk kơ chơ̆. Nơ̆r “hiap pơtê̆” lăm trong 24 wă pơma khan bơngai mă gơ̆p sek tơlang ưh kơ hơtŏ noh chang gô Kră Yang Yê-hô-wa tơdrong tơpăt gô pơm tơpă păng hil khan kơ kơ bơngai pơm yoch. Tơplơ̆ kơ lu ‘Bok sek tơlang tơpăt pơm ăn kơ kon pơlei pơla sư lăp đon, păng Kră Yang gô tuh ăn pŭn hiôk kơ lu sư.
Lăm tơdrong pơtih gia kơ minh ‘nu ‘Bok Kuan ưh kơ tơpăt, Kră Yang Yêsu đei pơma pơkă pơkăm hơđăl Kră Yang gô dŏng lu sư kơplah lu sư măng năr oei krao apinh, Kră Yang gô sek tơlang tơpăt ăn kơ lu sư (Luka 18:7-8). Lu bơ̆n bơih kon ‘Bok Kei-Dei lăm anih mă Kră Yang đei dan bơ̆n arih ayơ bơ̆n kă kơ đĭ jơhngơ̆m apinh Yang Bơhngol ‘Lơ̆ng dui ba, ba ăn tơdrong gơh hơgei wă kơ sek tơlang tơpăt. Tơdrong sek tơlang kăl kơ dan ‘bơ̆t hơnă hli yom kơ Kră Yang. Kră Yang gô phak dah hơpah kơ bơngai mă sek tơlang tơpăt. Kăl kơ băt đĭ đăng lu bơ̆n gô dơ̆ng ‘bơ̆t anăp Kră Yang wă sek tơlang lăm năr Kră Yang Yêsu Krist, thoi noh athei đĭ jơhngơ̆m krao khan, pơ’lơ̆ng lăm tơdrong Kră Yang đei pơjao. Khul mĕ ‘bă athei hơlam kơ lu kon hơ’lơ̆p mă tơpăt wă kơ ‘bôh tơdrong tơpăt đơ̆ng Kră Yang. Bơngai chông anhăk khŭl bơngai lui kăl kơ apinh Yang Bơhngol ‘Lơ̆ng tơgŭm wă kơ đei tơdrong sek tơlang tơpăt păng đei jơhngơ̆m ‘mêm mơnat, tơdah sek tơlang đei pơdê gô đei tơdrong tơklah tơklang, đei pơm kơ đei khul âu khul to lăm hnam akŭm tơdrong noh ưh kơ tơiung kơ akâu jăn Kră Yang Yêsu Krist. Bơngai lui mă đei pơjao kơ tơdrong sek tơlang bơngai nai kăl kơ đei tơdrong gơh hơgei păng tơdrong tơpăt wă kơ anăn Kră Yang đei ư-ang. Đơ̆ng sek tơlang tơpăt lăm lu kon Kră Yang, ưh kơ trŏ minh tơdrong bơ̆n đei tơgŭm ba ăn tơdrong tơdŏng băl lăm akâu jăn Khul Bơngai Lui păng rim kơ hnam dơnŏ păng thim ăn tơdrong tơpăt tơ’bôh ăn kơ bơngai ưh tam mă lui hloi mơ̆n.
Kơkuh kơ Ih Kră Yang, Inh bơnê kơ Ih đei ‘mêm kơ Inh, chu lôch dŏng pơklaih inh. Apinh Ih ăn kơ inh tơdrong gơh hơgei, tơdrong ‘lơ̆ng rơgoh wă sek tơlang tơpăt. Apinh Ih yua Inh wă tơ’bôh tơdrong tơpăt, ‘lơ̆ng rơgoh, ‘mêm mơnat đơ̆ng Ih ăn kơ lơ bơngai. Yua anăn Kră Yang Yêsu Krist. Amen
Lu bơ̆n hăm đĭ jơhngơ̆m gơnang kơ Yang Bơhngol ‘Lơ̆ng păng gơnang kơ Sư wă sek tơlang tơpăt lăm dôm tơdrong ưh?
Kră Yang bơih tơngla sek tơlang tơpăt
Sư jơ̆ ‘‘Bok Kuan tơpăt kơ lu bơ̆n
Tơdrong bơngai kơnê̆ wă pơm pơrăm gô weh ataih
Minh jơhngơ̆m đon, tơiung hnam ‘Bok Kei-Dei ling lang.
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: I Pêtrôs 4
Kênh Youtube BHKTHN:
