Teh Chăt ‘Long Pơle ‘Nhĕt ‘Nhot – 16/8/2025

Blŭng a 1:9-13

 “Kră Yang ‘Bok Kei-Dei khan dơ̆ng thoi âu: Teh athei chăt ‘long pơle, ‘nhĕt ‘nhot; đei găr adrĕch, ‘long plei đei găr, kiơ̆ kơ adrĕch khŭl tơ kơpal teh âu.” Đei hloi thoi noh.” (Blŭng a 1:11)

Nơ̆r jet tơchĕng pơwao:

–               Kră Yang ‘Bok Kei-Dei đei pơjing tơdrong kiơ lăm năr mă pêng tơdrong âu đei kiơ phara hăm ‘bar năr mă adrol?

–             Tơdrong teh chăt ‘long pơle, ‘nhĕt ‘nhot đei tơ’bôh tơdrong kiơ gah Kră Yang păng tơdrong tơdă hơmet Sư?

–               Bơ̆n đei tơdrong pơlung thoi yơ?

Lăm năr pơjing mă pêng Kră Yang ‘Bok Kei-Dei pơm ăn kơ đak tơ ala plĕnh athei akŭm minh anih, na đơ̆ng noh đei teh păng đak dơsĭ. Adrol kơ năr mă pêng, teh  đak âu tơ jơ̆p jang jơ̆ đak ngăl đĕch, mălei đơ̆ng Kră Yang pơm hăm nơ̆r akhan, teh  păng đak dơsĭ gơh đei jing tơproh ‘lơ̆ng wă kơ wei rong tơdrong anih tơ kơpal teh  âu.

Tơdah lăm năr pơjing mă mônh păng mă ‘bar, rim năr Kră Yang  akhan minh nơ̆r đĕch wă pơjing kơ minh tơdrong, lei truh năr mă pêng ‘nâu, Kră Yang akhan lơ hloh, pơjing kơ lơ tơdrong hloh. Blŭng a, Sư pơjing đak dơsĭ păng teh. Pơtrơp dơ̆ng, kơpal teh Kră Yang pơjing ‘long pơle păng ‘nhĕt ‘nhot. Sư athei wă kơ ‘long pơle păng ‘nhĕt ‘nhot chăt rai lơ, ‘long plei đei găr, đei găr kiơ̆ kơ adrĕch khul . Tơdrong ‘lơ̆ng mă Kră Yang ‘bôh lăm tơdrong jang Sư kư̆m rai tŏk thim pơting hăm ‘bar năr mă hơdrol lăm tơdrong pơjing.

Kơplah teh đei pơjing, tơdrong pơjing đơ̆ng Kră Yang, teh chăl ‘long pơle, ‘nhĕt ‘nhot. Păng pơtrơp dơ̆ng đơ̆ng noh, ‘long pơle ‘nhĕt ‘nhot kư̆m chăt rai lơ, đei găr, ‘long đei plei. Jơ ‘nâu, dôm tơmam lăm plĕnh teh ưh kơ sĭ đơ̆ng Kră Yang ‘Bok Kei-Dei pơjing đĕch ôh mă dôm tơmam đơ̆ng Sư pơjing kư̆m wang gơh jang hơdai lăm tơdrong Sư pơjing noh, wă kơ gơh đei dôm tơdrong ‘lơ̆ng trŏ. Tơmam đơ̆ng Kră Yang pơjing gơh jang hơdai lăm tơdrong pơjing mă Kră Yang đei pơjing bơih. ‘Nâu bơih tơdrong tơdă hơmet Sư. Tơdah lăng dơ̆ng dôm tơdrong đei pơjing, blŭng a nhen thoi Kră Yang ưh kơ pơjing lơ. ‘Net ‘net, bơ̆n ‘bôh Kră Yang pơjing lơ hloh, Sư khan lơ hloh, pơm lơ hloh, păng Sư lăp đon tơpă. Hiôk tơpă ưh kơ băt dang yơ kơplah băt kơ Kră Yang ăn gơh jang wă kơ tơmam đơ̆ng Sư pơjing kư̆m gơh pơm dôm tơmam nai păng gơh jang hơdai lăm tơdrong pơjing mă Kră Yang đei pơjing thoi ‘long đei plei găr adrĕch păng chăt đei ‘long plơ̆ng dơ̆ng. ‘Noh kư̆m minh tơdrong mă Kră Yang bơ̆jang lăm chăl arih lơ bơngai. Phŏ phŏ bơ̆n tơchĕng khan nhen thoi Kră Yang ưh kơ bơ̆jang, mălei tơdah bơ̆n lăng hơlen tơpă, Kră Yang bơ̆jang rai đunh rai lơ. Sư ưh kơ đei pơdơh kơ jang ôh. Kơdih Kră Yang Yêsu đei khan: “’Bă Inh oei jang ling lang truh dang ei ưh kơ đei pơdơh na Inh athei jang lei lăi thoi Sư mơ̆n” (Yôhan 5:17). Bơnê  kơ Kră Yang yua kơ Sư kư̆m asong ăn tơdrong gơh hơgei păng kư̆m pơtơm bơ̆n wang jang hơdai lăm tơdrong tơdă hơmet Sư. Apinh Kră Yang ăn kơ bơ̆n đei jơhngơ̆m ‘maih jang lăm tơdrong mă Kră Yang đei tơdăm hơmet.

Kơkuh ư-ang kơ Kră Yang jơ̆ Tơ’ngla pơjing tih tin, bơnê kơ Kră Yang yua kơ Sư oei ling lang ‘mêm mơnat păng asong ăn kơ inh gơh jang hơdai lăm tơdrong jing tih tin Sư. Apinh Ih tơgŭm inh wă kơ inh băt gơnang kơ Kră Yang, đei jơhngơ̆m sơng iŏk tơdrong jang hloi, păng đĭ jơhngơ̆m bơ̆jang  tơdrong jang Sư, wă tơ’bôh tơdrong ‘lơ̆ng Kră Yang ăn kơ teh đak âu. Krao khan yua anăn Kră Yang Yêsu Krist, Amen.

Bơ̆n pơkă pơkăm hăm Kră Yang gô jang tơdrong kiơ lăm tơdrong tơdă hơmet Sư?

Kră Yang Tơ’ngla pơjing hlĭch chrơp

Plĕnh teh să dêh, pă băt dang yơ

Bơ̆jang hơdai Yang ‘Bă

Đei plei găr, ‘long pơkao ‘lơ̆ng tơpă

Đŏk Sơ̆p Hla bơar ‘Bok Kei-Dei lăm pêng sơnăm: Yakơ 1

Kênh Youtube BHKTHN:

https://www.youtube.com/c/bhkthn