II Lu Pơtao 6:8-14
“Lu bơngai kơtul khan lăm jơhngơ̆m; Ưh kơ đei Kră Yang ‘Bok Kei-Dei.” (Hơriso 14:1a)
Nơ̆r jet tơchĕng pơwao:
– Tơdrong kiơ truh lăm đe Aram tơblah hăm Isơrael?
– Pơtao Aram sư pơm liơ?
– Bơ̆n băt thoi yơ gah pơtao păng tơdrong sư pơm?
Tơdrong hơ’mon năr ‘nâu đei truh lăm tơdrong tơblah đe Aram păng Isơrael. Pơtao Aram ăn linh pơm kơđông răp lu bơngai Isơrael. Mălei, đơ̆ng Êlisê bơngai khan lê̆ adrol “Bơngai Kră Yang ‘Bok Kei-Dei yua” roi lê̆ adrol na pơtao Isơrael lơ ‘măng weh đơ̆ng lu linh oei răp. Pơtao Aram khan đei bơngai plơ̆ plĕch năm roi kơ pơtao Isơrael, mălei đei minh ‘nu lăm đĭch đam sư tơl khan ưh kơ đei bu plơ̆ plĕch ôh, mălei ‘noh đơ̆ng Êlisê bơngai khan lê̆ adrol, sư băt tơdrong hlơp pơtao na sư roi lê̆ adrol kơ pơtao Isơrael. Kơtơ̆ng thoi noh, pơtao Aram wơh lu linh sư athei năm tơ pơlei Đôthan rôp Êlisê ‘bok khan lê̆ adrol tơchĕng khan, tơdrong pơtao Aram pơm noh trŏ yua kơ mưh đei pơlôch Êlisê bơngai khan lê̆ adrol lei ưh pă đei bu bơih roi ăn kơ pơtao Isơrael. Mălei, pơtao Aram ưh kơ tơchĕng kơ tơdrong mă đĭch đam sư roi kơ sư: “Êlisê, sư ‘bok khan lê̆ adrol mă Kră Yang ‘Bok Kei-Dei yua lăm lu đe Isơrael, sư tơbăt ăn kơ pơtao đe Isơrael dôm nơ̆r ih pơma hơdrô̆ lăm anih tep ih” (trong 12). Thoi noh, chĕp ba linh năm rôp Êlisê, ‘bok khan lê̆ adrol jơ̆ minh tơdrong kơhlôh, yua kơ mưh Êlisê, bơngai khan lê̆ adrol băt dôm nơ̆r pơma lăm anih tơdrong pơtao Aram wơh bơngai năm rôp sư!
Thoi noh, tơdrong mă đei băt ‘noh ưh kơ trŏ đơ̆ng tơdrong plơ̆ plĕch kon bơngai mălei noh tơdrong hlĭch chrơp. ‘Bok khan lê̆ adrol Êlisê kơdih sư ưh kơ băt ôh dôm tơdrong pơtao Aram chă đon wă pơm, mălei yua kơ sư jơ̆ “bơngai Kră Yang ‘Bok Kei-Dei yua” (trong 9), na kơdih Kră Yang ‘Bok Kei-Dei jơ̆ Tơ’ngla băt đĭ tơdrong tơchĕng păng lăm jơhngơ̆m kon bơngai bơ̆n đei ăn kơ Sư băt (Jêrêmi 17:10). Tơpă pơtao Aram băt kơ ‘bok Êlisê jơ̆ “bơngai Kră Yang ‘Bok Kei-Dei yua” ‘bôh dôm tơdrong mơsêh ‘Bok Kei-Dei yua sư, mă loi kơplah ‘bok Naaman gơh klaih đơ̆ng jĭ chin. Hloh dơ̆ng, kơlih lu đĭch đam pơtao kư̆m roi ‘bok Êlisê bơih “bơngai khan lê̆ adrol lăm lu bơngai Isơrael” (trong 12).
Mălei, pơtao Aram oei lui gơnang kơ jơhngơ̆m pran lu linh sư, păng ưh kơ lui kơ Êlisê bơngai khan lê̆ adrol đei Kră Yang ‘Bok Kei-Dei tơ’bôh ăn. Pơtao Aram tơchĕng khan Kră Yang ‘Bok Kei-Dei tơ’bôh ăn. Pơtao Aram tơchĕng khan Kră Yang ‘Bok Kei-Dei kư̆m lei lăi thoi lu rup yang nai mơ̆n, jơ̆ lu “rup man đei ‘bơ̆r, mă pơma ưh kơ gơh. Đei măt, mălei ưh kơ ‘bôh; Đei đon, mă ưh kơtơ̆ng; đei muh mălei ưh kơ băt kơ ‘bâu; Đei ti, mălei ưh kơ gơh pel ‘mơn. Đei jơ̆ng, ưh kơ gơh yơ yak; Dăng hơlŏng ưh kơ đei nơ̆r re (Hơriso 115:5-7).
Pơtao Aram jơ̆ minh ‘nu bơngai măt tol gah bơhngol, tang măt kơ “lu bơngai kơtul” yua kơ tơchĕng khan “ưh kơ đei Kră Yang ‘Bok Kei-Dei” (Hơriso 14:1). Dôm tơdrong hăm sư jơ̆ lu tơdrong mă măt sư ‘bôh đĕch păng tơchĕng kiơ̆ kơ ala teh âu. Kơplah minh ‘nu bơngai khan ưh kơ đei Kră Yang ‘Bok Kei-Dei lei sư gô khan dôm tơdrong anat đei trong gơh hơmet ngăl. Păng bơ̆n gơh wei lăng dôm tơdrong noh. Bơngai mă arih thoi noh ưh kơ layơ băt krao khan hăm Kră Yang mă đơ̆ng ‘bôh hơđăl kăl kơ Kră Yang mơnat ăn păng bơhngol kăl kơ gơh klaih.
Ơ Kră Yang, inh bơnê kơ Ih Kră Yang yua kơ Ih ăn kơ inh băt kơkuh păng chu yom Ih. Apinh Ih ăn kơ inh ling lang gơnang kơ Kră Yang wă kơ inh đei tơdrong wei lăng păng bơwei đơ̆ng ‘Bok Kei-Dei gơh pơm tôm tơdrong. Yua anăn Kră Yang Yêsu Krist, Amen.
Bơ̆n ngăl đei jơhngơ̆m thoi yơ hăm dôm tơdrong anat đei truh kơ bơ̆n?
Khan ưh kơ đei Kră Yang ‘Bok Kei-Dei
Lei jơ̆ bơngai kơtul chăl arih măng mu
Hli yom kơ Kră Yang, Tơ’ngla mơsêh mơyang
Gơnang kơ Kră Yang, Tơ’ngla ling lang wei rong
Đŏk Sơ̆p Hla bơar ‘Bok Kei-Dei lăm pêng sơnăm: I Hơ’mon 25
Kênh Youtube BHKTHN:
