2 Vajntxwv 6:8-14
Nqe cim:
“Cov neeg ruam pheej xav hais tias,“Yeej tsis muaj Vajtswv li!”
(Ntawv Nkauj 14:1a)
Lus nug rau sawvdaws xav:
– Yam dabtsi tshwm hauv npluav rog ntawm cov Xilias thiab cov Yixalayees?
– Vajntxwv Xilias tau muaj tus cwjpwm zoo li cas?
– Peb xav li cas rau vajntxwv Xilias thiab nws tus cwjpwm?
Zaj xwm hauv zaj kawm hnub no yog tshwm muaj nyob hauv ib npluav rog ntawm cov Xilias thiab cov Yixalayees. Cov Xilias tus vajntxwv twb tso tub rog tuaj vij thiab tav kev cov Yixalayees tas lawm, tiamsis los ntawm tus cev lus Elisas “Vajtswv tus neeg” tshaj xov qhia ua ntej rau cov Yixalayees tus vajntxwv, nws thiaj li zam dhau cov Xilias kev vij tos ntau zaus. Cov Xilias tus Vajntxwv xav hais tias, muaj tus ntxeev siab tau coj tej xov no mus tshaj qhia rau cov Yixalayees tus vajntxwv, tiamsis vajntxwv ib tug tub rog qhia rau nws paub hais tias yeej tsis muaj leejtwg ntxeev siab tuaj tshaj xov rau cov Yixalayees tus vajntxwv li, tiamsis yog vim tus cev lus Elisas paub vajntxwv lub tswvyim thiab tshaj qhia ua ntej rau cov Yixalayees tus vajntxwv paub. Hnov li ntawd, cov Xilias tus vajntxwv thiaj coj tub rog tuaj rau ntawm Dauthas ntes tus cev lus Elisas.
Thaum nyuam qhuav mloog dhau, cov Xilias tus vajntxwv txoj kev txiav txim siab yeej yog, vim yog tua tau tus cev lus Elisas lawm ces yeej tsis muaj leejtwg yuav tshaj xov qhia rau cov Yixalayees tus vajntxwv paub ntxiv lawm. Tiamsis vajntxwv tsis nco tej uas nws tus tub rog hais rau nws hais tias: “Elisas uas yog tus cev Vajtswv lus qhia rau cov Yixalayees tus vajntxwv paub xwb, txawm yog koj hais twjywm hauv txaj xwb los nws yeej paub thiab muab qhia rau nws tus vajntxwv huv tibsi” (nqe 12). Vim li ntawd, coj tub rog mus ntes Elisas yog ib txoj kev txiav txim siab ruam kawg li, vim hais tias yog tus cev lus Elisas twb paub tej uas nyob zais nkoos, nws txawm yuav tsis paub qhov vajntxwv txib neeg tuaj ntes nws lov!
Yog li ntawd, tej lus zais nkoos uas raug tshwm tawm, tsis yog muaj neeg ntxeev siab tiamsis yog ib tes haujlwm ntawm txujci tseemceeb. Tus cev lus Elisas tsis xwb tim paub cov Xilias tus vajntxwv tej kev tuav tswvyim, tiamsis nws yog “Vajtswv tus neeg” (nqe 9). Vajtswv yog tus paub tagnrho neeg tej kev xav thiab neeg lub siab, Nws tau qhia rau Elisas paub (Yelemis 17:10). Paub tseeb hais tias cov Xilias tus vajntxwv paub Elisas yog “Vajtswv tus neeg” dhau ntawm tej txujci tseemceeb uas Elisas tau ua, tshwjxeeb yog thaum Na-amas tau kho zoo mob ruas. Tsis tas li ntawd xwb, yog kiag vajntxwv cov tub rog los kuj hais tias Elisas yog “ tus cev Vajtswv lus hauv cov Yixalayees” (nqe 12). Txawm li ntawd los, vajntxwv yeej tseem tso siab rau kev muaj zog ntawm nws cov tub rog, thiab tsis ntseeg hais tias tus cev lus Elisas tau Vajtswv qhia txhua yam ua ntej lawm. Cov Xilias tus vajntxwv xav hais tias Vajtswv kuj zoo ib yam li lwm tus vajtswv lossis zoo li tej mlom, “…muaj qhovncauj, tiamsis tsis txawj hais lus; muaj qhovmuag, tiamsis tsis pom kev; muaj pobntseg, tiamsis tsis hnov lus; muaj qhovntswg, tiamsis tsis hnov ntxhiab; muaj tes, tiamsis tsis txawj kov dabtsi, muaj kotaw, tiamsis tsis txawj tshais ruam; tej mlom ntawd ua tsis tau suab rov hauv qa tuaj li.” (Ntawv Nkauj 115:5-7).
Cov Xilias tus vajntxwv yog ib tug neeg dig muag sab ntsujplig, sawv cev rau “tus neeg ruam” vim nws xav hais tias “tsis muaj Vajtswv” (Ntawv Nkauj 14:1). Ntawm nws tus kheej txhua tes haujlwm uas neeg ntiajteb muaj peev xwm saib pom thiab txhais tau lub ntsiab thiaj muaj tseeb. Thaum ib tug tibneeg tsis lees muaj Vajtswv ces nws yuav xav hais tias txhua yam teebmeem muaj haukev daws tau thiab yus yuav muaj peevxwm tswj tau lub tsamthawj mus li yus pom zoo. Tus neeg ua neej li ntawd, txawm paub meej hais tias nws cheemtsum tau kev zam txim thiab sab ntsujplig cheemtsum tau kho zoo, los nws yeej tsis los thov Vajtswv pab li.
Thov Vajtswv,
Vajtswv, nyuam yaus ua Koj tsaug uas Koj pub rau nyuam yaus paub pehawm thiab mloog Koj lus. Thov pab nyuam yaus paub vamkhom Koj thiab pheej nyob hauv Koj kev tsomkwm tiv thaiv mus li. Nyuam yaus tuav Tswv Yexus Khetos lub npe thov. Amees.
Peb muaj tus cwjpwm li cas thaum ntsib teebmeem uas peb xav tsis txog?
Nyeem Vajluskub hauv peb lub xyoos: 1 Xwmtxheej Vajntxwv 25
Kênh Youtube BHKTHN:
