Klei Aê Diê Blŭ: Y‑Philêmôn êlan 13-16
Êlan kliăng: “Ƀiădah kâo amâo čiăng ngă sa mta klei ôh tơdah amâo mâo klei ih tŭ, čiăng kơ klei jăk ih ngă amâo djŏ hŏng klei mgô̆ ôh, ƀiădah tui si klei êngiê ih čiăng.” (Y‑Philêmôn êlan 14)
Klei êmuh ksiêm mĭn: Ya ngă Khua ƀĭng kna Y‑Pôl ba Y‑Ônêsim wĭt kơ Y‑Philêmôn? Ya klei Y‑Philêmôn mâo tơdah mâo klei pap brei sĭt? Si Klei Aê Diê Blŭ mđĭ ai drei srăng pap brei kơ ayŏng amai adei pô tơdah digơ̆ kmhal klei soh?
Hŏng klei khăp brei kơ phung anak hlăm mngăt hlăk êjai dôk hlăm mnă, leh anăn čiăng mâo mnuih đru pô, năng ai Khua ƀĭng kna Y‑Pôl srăng amâo brei ôh Y‑Ônêsim wĭt kơ Y‑Philêmôn. Ñu lač: “Kâo čiăng snăk kơ̆ng ñu dôk mbĭt hŏng kâo, čiăng kơ ñu dưi mă bruă kơ kâo bi ala kơ ih êjai arăng krư̆ kâo kyua klei mrâo mrang jăk” (êlan 13). Ƀiădah ñu lŏ brei Y‑Ônêsim wĭt leh anăn akâo kơ Y‑Philêmôn amâo djŏ knŏng pap brei leh anăn lŏ jum Y‑Ônêsim msĕ si sa čô hlŭn tlĕ đuĕ leh ôh ƀiădah dlăng msĕ si sa čô ayŏng adei hlăm Khua Yang Pô Bi Mtlaih. Khua ƀĭng kna Y‑Pôl čang hmăng Y‑Philêmôn pap brei sĭt kơ Y‑Ônêsim amâo djŏ kyua arăng mgô̆ amâodah kyua gưt kơ ñu amâodah kyua ya klei mkăn ôh.
Hlăm klei hdĭp hdơ̆ng pô, anak mnuih drei srăng mâo sơăi klei soh leh anăn ngă soh hŏng pô mkăn, ênoh tla kơ klei anăn jing klei bi mguôp kruh hĕ. Dŭm klei soh Y‑Ônêsim ngă leh tla hŏng bruă tlĕ đuĕ kơ Y‑Philêmôn leh anăn klei bhiăn ƀiădah Aê Diê mâo klei dưi gĭt gai djăp mta mnơ̆ng leh anăn grăp čô mnuih čiăng tŭ dưn kơ bruă mbĭt hlăm Sang Aê Diê. Hŏng klei mĭn jăk Aê Diê, Ñu brei Y‑Ônêsim kbưi êjai hŏng Y‑Philêmôn čiăng dưi bi tuôm hŏng Khua ƀĭng kna Y‑Pôl leh anăn đăo kơ Khua Yang Yêsu, jing mnuih tŭ dưn kơ Klei Mrâo Mrang Jăk. Aê Diê ăt yua Khua ƀĭng kna Y‑Pôl đru Y‑Philêmôn srăng pap brei leh anăn dlăng kơ Y‑Ônêsim “amâo djŏ msĕ si sa čô hlŭn ôh, ƀiădah êgao hĭn kơ sa čô hlŭn, jing sa čô adei drei khăp hlăm kđeh leh anăn hlăm Khua Yang, boh nik nak kơ kâo, ƀiădah kdlưn hĭn kơ ih” (êlan 16). Tơdah pap brei, Y‑Philêmôn amâo djŏ knŏng lŏ mâo pô hlŭn luč leh ôh ƀiădah lŏ mâo kdlưn hĭn kơ anăn, mâo thiăm sa čô ayŏng adei khăp hơiêng snăk hlăm Khua Yang Yêsu.
Klei Aê Diê Blŭ mđĭ ai drei brei jih ai tiê pap brei kơ ayŏng amai adei pô tơdah diñu jih ai tiê kmhal kơ klei soh. Tơdah drei amâo dưi pap brei, mđrĭng hŏng klei drei dôk ngơi mang hŏng klei ƀuh asei mlei Krist dôk bi kah mbha. Khua Yang amâo čiăng ôh mâo klei anăn. Jing sa čô mnuih đăo kơ Krist mâo Khua Yang Yêsu tla leh hŏng klei hdĭp Ñu Pô, snăn bruă srăng pap brei hdơ̆ng pô jing klei brei ngă “amâo djŏ hŏng klei mgô̆ ôh, ƀiădah tui si klei êngiê ih čiăng” (êlan 14). Tơdah drei amâo mâo pap brei, snăn Aê Diê ăt mâo klei dưi kiă kriê jih jang klei hlăm klei Ñu čiăng jăk hĭn, bi drei srăng luč mmông găl mâo Aê Diê yua čiăng mkŏ mjing asei mlei Krist.
Drei srăng pap brei kơ ayŏng amai adei pô hŏng si ai tiê?
Wah lač: Ơ Khua Yang, kâo bi mni kơ Ih kyua wăt tơdah klei soh kâo jing hrah huč, Ih ăt djiê hrô čiăng kơ kâo jing kô̆ msĕ si pliêr. Akâo kơ Ih đru kơ kâo mâo klei khăp, jih ai tiê pap brei kơ pô bi êka kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
