Filemoos nqe 13-16
Nqe cim:
“Txawm yog li cas los xij, kuv tsis xav yuam kom koj pab kuv. Yog koj zoo siab pab, koj cia li pab. Txhua yam uas koj tsis pom zoo kuv ua, kuv yeej tsis ua” (Filemoos nqe 14)
Lus nug rau sawvdaws xav:
– Vim li cas Timthawj Paulus thiaj xa Auneximus rov qab mus cuag Filemoos?
– Thaum Filemoos zam txim tiag tiag, nws yuav tau txais dabtsi?
– Vajtswv Txojlus txhawb peb lub zog txaus siab zam txim rau peb cov kwvtij thaum lawv lees txim licas?
Los ntawm kev hlub pub rau tus tub kev ntseeg uas yug hauv tsev lojcuj, thiab xav kom muaj neeg pab tu tus kheej, Timthawj Paulus yeej muaj cai tsis xa Auneximus rov qab mus rau Filemoos. Nws hais tias: “Kuv xav cia nws nrog kuv nyob pab kuv hloov koj chaw thaum uas kuv raug kaw rau hauv tsev lojcuj vim kuv qhia txojmoo zoo” (nqe 13). Tiamsis nws yuav tsum xa Auneximus rov qab, thiab thov kom Filemoos tsis yog tsuas zam txim thiab rov txais yuav Auneximus zoo li ib tug qhev uas tau khiav lawm rov los xwb, tiamsis yuav tsum txais yuav zoo li ib tug kwvtij hauv Yexus Khetos. Timthawj Paulus xav kom Filemoos zam txim tiag tiag rau Auneximus, tsis yog vim kev raug yuam lossis vim saib nws ntsej muag, lossis vim ib yam dabtsi twg.
Hauv lub neej txhua hnub, tibneeg leejtwg los yeej txawj ua yuamkev thiab ua txhaum rau lwm tus, qhov nqi zog uas txais tau yog kev sib raug zoo raug rhuav. Tej kev txhaum uas Auneximus ua tau raug them nqi dhau ntawm qhov uas nws raug khiav tawm ntawm Filemoos thiab txoj kevcai mus; tiamsis Vajtswv muaj cuabkav tswj txhua yam thiab txhua tus kom muaj nqis rau Nws tes haujlwm. Los ntawm Vajtswv txojkev npaj tseg uas zoo, Nws pub rau Auneximus muaj sijhawm nyob nrug deb ntawm Filemoos ib ntus, kom nws tau ntsib Timthawj Paulus thiab ntseeg Tswv Yexus, kom dhau los ua ib tug neeg muaj nqis rau Txojmoo Zoo. Vajtswv kuj siv Timthawj Paulus los pab Filemoos txaus siab zam txim thiab txais yuav Auneximus. Nws hais rau Filemoos hais tias: “Koj tsis txhob suav hais tias, nws yog ib tug tubtxib xwb, nimno nws tsimtxiaj dua ib tug tubtxib, nws los ua koj ib tug kwv, rau qhov nws ntseeg Yexus Khetos lawm. Kuv hlub nws kawg li thiab kuv paub hais tias koj hajyam yuav hlub nws heev dua, rau qhov nws yeej yog koj ib tug tubtxib thiab nws yog ib tug uas ntseeg tus Tswv” (nqe 16). Thaum Filemoos zam txim, nws rov tau tus qhev uas ploj lawm, thiab tshaj qhov ntawd, nws tseem txais tau ib tug kwvtij uas hlub tshua hauv Yexus Khetos.
Vajtswv Txojlus txhawb peb lub zog kom zam txim tiag tiag rau peb cov kwvtij nkauj muam thaum lawv lees txim kawg siab. Yog peb tsis kam zam txim, ces yog peb tsis quav ntsej txog qhov uas Tswv Yexus lubcev raug faib. Tswv Yexus tsis xav pom qhov ntawd. Yog ib tug ntseeg uas tau Tswv Yexus siv Nws txojsia los them nqi, ces kev sib zam txim yog yam uas tsim nyog ua, tsis yog vim raug yuam tiamsis los ntawm kev zoo siab (nqe 14). Yog peb tseem pheej tsis zam txim, ces Vajtswv yeej tswj kav txhua yam hauv Nws txojkev zoo, tiamsis peb yuav plam lub sijhawm uas tau Vajtswv siv los txhim Tswv Yexus lubcev.
Thov Vajtswv,
Vajtswv, nyuam yaus ua Koj tsaug uas txawm yog nyuam yaus tej kev txhaum yuav liab cuag ntshav los Koj kam tuag txhiv kom nyuam yaus tau dawb paug li daus. Thov pub nyuam yaus muaj kev hlub, thiab lub siab dawb paug zamtxim rau cov uas tau ua mob rau nyuam yaus. Nyuam yaus tuav Yexus Khetos lub npe thov, Amees.
Peb zam txim rau tej kwvtij nkauj muam los ntawm nplooj siab zoo licas?
Nyeem Vajluskub hauv peb lub xyoos: I Xwmtxheej Vajntxwv 18
Kênh Youtube BHKTHN:
