Klei Aê Diê Blŭ: Rôm 16:1-2
Êlan kliăng: “Brei diih jum ñu hlăm Khua Yang tui si năng kơ phung doh jăk, leh anăn brei diih đru ñu tui si klei ñu kƀah” (Rôm 16:2a)
Klei êmuh ksiêm mĭn: Ya klei Khua ƀĭng kna Y‑Pôl brei thâo kơ H’Phêbê? “Brei diih jum ñu hlăm Khua Yang” ya čiăng lač? Si ih bi êdah klei thâo uêñ leh anăn bi đru hlăm Khua Yang?
Khua ƀĭng kna Y‑Pôl hưn mdah H’Phêbê jing amai ñu hlăm Khua Yang, jing sa čô amai hlăm Khua Yang kơ phung đăo ti ƀuôn Rôm msĕ mơh. Gơ̆ jing sa čô khua sang yang mniê Sang Aê Diê ƀuôn Sankrê, jing sa boh ƀuôn hlăm anôk arăng mjưh kŭmpăn kbưi mơ̆ng ƀuôn prŏng ƀuôn Kôrantô hlăm brô pluh kilômet tĭng ngŏ. Khua ƀĭng kna Y‑Pôl yap gơ̆ jing sa čô mniê doh jăk, mâo ai tiê kmah đru lu mnuih ti ƀuôn Kôrantô leh anăn đru wăt Khua ƀĭng kna Y‑Pôl mơh hlăm klei hiu hưn Klei Mrâo Mrang Jăk. “Phung doh jăk” lŏ mblang jing “mnuih doh jăk”, čiăng lač jing phung đăo kơ Yêsu Krist, Pô mjing leh digơ̆ jing phung doh jăk. Mơ̆ng klei hưn mdah, drei thâo kơ H’Phêbê jing sa čô mnuih jăk jih jang phung đăo khăp, mpŭ leh anăn knang. Gơ̆ jing sa čô huĭ mpŭ kơ Aê Diê, thâo blŭ, leh anăn hur har hlăm bruă Aê Diê jao leh. Ti ƀuôn Kôrantô, gơ̆ đru lu mnuih, wăt kơ Khua ƀĭng kna Y‑Pôl pô mơh, klei anăn bi êdah kơ gơ̆ jing sa čô mnuih thâo mâo, ƀiădah tơdah gơ̆ truh kơ ƀuôn Rôm, hŏng klei luă gŭ gơ̆ srăng mă tŭ jih klei phung đăo tinei đru tui si klei Khua ƀĭng kna Y‑Pôl hưn mdah leh. Klei anei brei drei ƀuh bruă phung mniê hlăm ênuk Phung Sang Aê Diê tal êlâo jing yuôm bhăn snăk. Digơ̆ jing phung khăp kơ Khua Yang, mdrŏng sah, thâo mĭn leh anăn hur har mă bruă kơ Khua Yang.
Hŏng klei jing sa čô khua gĭt gai klei hdĭp myang, Khua ƀĭng kna Y‑Pôl jing sa čô pô bi mtruh brei, hưn mdah khua sang yang mniê H’Phêbê kơ phung đăo ti ƀuôn Rôm. Ñu bi êdah klei ñu uêñ mĭn kơ pô mă bruă mbĭt hŏng ñu hŏng klei mtă kơ phung ayŏng adei ti ƀuôn Rôm brei digơ̆ jum H’Phêbê hŏng klei năng hlăm Khua Yang. Tơdah thâo kral H’Phêbê jing sa čô anak hlăm gŏ sang Khua Yang, tơdah ƀuh rup Khua Yang hlăm klei H’Phêbê dôk dơ̆ng ƀơ̆ng huă kơh phung đăo ti ƀuôn Rôm dưi jum gơ̆ hŏng klei năng kơ sa čô mnuih doh jăk, si tô hmô bi êdah klei uêñ mĭn, thâo kơ mnơ̆ng gơ̆ kƀah leh anăn kăp đru.
Brei grăp čô phung đăo tui knuih H’Phêbê hlăm klei hur har mă bruă kơ Khua Yang, thâo kơ klei kƀah leh anăn kăp đru phung ayŏng adei hlăm klei đăo. Klei đru anăn tăp năng jing klei drei dôk hmư̆ klei digơ̆ yăl dliê bi êdah, đru wah lač brei, yua Klei Aê Diê Blŭ bi mđĭ ai, đru mtrah prăk kăk kơ digơ̆ tơdah digơ̆ kƀah sĭt… Tơdah drei đru phung ayŏng adei hlăm Khua Yang, Khua Yang srăng yap klei drei ngă anăn jing ngă kơ Ñu yơh (Y‑Mathiơ 25:31-40).
Si ngă drei kăp bi đru hdơ̆ng drei tui si klei H’Phêbê bi hmô leh mơ̆?
Wah lač: Ơ Khua Yang, lač jăk kơ Ih bi mtlaih kâo leh, brei kâo dưi jing jơ̆ng kngan hlăm asei mlei Ih. Đru kâo mâo klei sĭt suôr leh anăn hur har yua jih jang mmông găl pioh mă bruă kơ Ih, thâo jum leh anăn đru phung ayŏng adei hlăm klei đăo bi leh bruă Ih jao leh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Êphêsô 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
