Loos 16:1-2
Nqe cim:
“Kuv thov nej tos txais nws ntawm tus Tswv lub npe, kom tsimnyog qhov uas peb yog Vajtswv haivneeg, thiab tej uas nws xav tau, nej cia li pab nws” (Loos 16:2a)
Lus nug rau sawvdaws xav:
– Timthawj Paulus qhia paub dabtsi txog Fenpes?
– “Tos txais nws ntawm tus Tswv lub npe” txhais tau li cas?
– Peb qhia tshwm txojkev hmov tshua sib pab hauv tus Tswv zoo li cas?
Fenpes tau Timthawj Paulus qhia tias yog nws ib tug muam ntseeg hauv tus Tswv, kuj yog cov ntseeg nyob hauv lub nroog Loos ib tug muam hauv tus Tswv thiab. Nws yog ib tug pab ua Vajtswv haujlwm nyob hauv Pawg Ntseeg Keekhale-as, nyob ze ib lub tshav nkoj thiab nyob nrug deb lub nroog Kauleethaus kwvlam li kaum xya kilumev mus rau sab hnubtuaj. Fenpes tau Timthawj Paulus qhia paub tias yog Vajtswv haivneeg, nws muaj lub siab dav pab cov ntseeg ntau tus nyob hauv Kauleethaus thiab pab Timthawj Paulus ua tes haujlwm qhia Txojmoo Zoo. “Vajtswv haivneeg” txhais tau tias yog “neeg dawbhuv”, yog hais txog tus neeg ntseeg Tswv Yexus. Cov ntseeg Yexus tau suav hais tias yog Vajtswv haivneeg tsis yog qhov uas lawv ua tau zoo tiamsis yog txojkev ntseeg Tswv Yexus, tus uas ua rau lawv dawbhuv. Los ntawm Paulus cov lus qhia, peb paub tias Fenpes yog ib tug neeg zoo, tau cov ntseeg hlub, saib taus thiab ntseeg siab. Fenpes yog ib tug neeg hwm Vajtswv, tau koob hmoov hais lus, nquag ua tej haujlwm tau txib. Nyob hauv nroog Kauleethaus, nws twb pab cov ntseeg thiab pab Timthawj Paulus, qhov no qhia paub Fenpes yog ib tug neeg muaj, tiamsis thaum tuaj txog hauv lub nroog Loos, Fenpes txaus siab hlo txais yuav lawv tej kev pab dhau los ntawm Timthawj Paulus cov lus thov. Qhov xwmtxheej no kuj qhia paub lub luag haujlwm ntawm cov pojniam hauv thawj pawg Ntseeg kuj tseemceeb. Lawv yog cov neeg hlub Vajtswv, muaj peevxwm, txawj ntse thiab nquag ua tus Tswv haujlwm.
Timthawj Paulus nyob rau lub meejmom ua tus thawjcoj sab ntsujplig, nws ua tus choj tuam xa Fenpes mus rau cov ntseeg nyob hauv lub nroog Loos. Paulus qhia tawm lub siab hlub tshua txog cov neeg koom tes nrog nws ua haujlwm, Paulus hais kom cov ntseeg hauv lub nroog Loos tos txais Fenpes kom tsimnyog hauv tus Tswv. Thaum zeem paub Fenpes yog ib tug nyob hauv Vajtswv tsevneeg, ntsia pom tus Tswv tus duab nyob hauv nws kev ua neej, cov ntseeg hauv nroog Loos thiaj tos txais Fenpes tsimnyog zoo li ib tug neeg dawbhuv, txhais tau tias hmov tshua, pom kev cheemtsum thiab zoo siab pab.
Txhua tus ntseeg Yexus yuav tau xyaum Fenpes tus qauv, lub siab ua Vajtswv haujlwm los ntawm kev paub tshua, zeem pom lwm tus thiab zoo siab hlo pab cov ntseeg raws li txojkev ntseeg. Txojkev sib pab yog siv sijhawm los mloog lwm tus tham, thov Vajtswv, muab Vajtswv txojlus txhawb zog, pab nyiaj thaum muaj kev cheemtsum… Thaum peb pab cov kwvtij ntseeg hauv tus Tswv, tus Tswv yuav sau qhov ntawd hais tias yog peb pab Nws (Mathais 25:31-40).
Thov Vajtswv,
Tus Tswv! Ua tsaug Koj cawm nyuam yaus, pub rau nyuam yaus tau los ua Koj haivneeg. Thov Koj pab kom nyuam yaus rau siab, siv txhua lub sijhawm los ua Koj tes haujlwm, zoo siab txais tos, pab cov kwvtij ntseeg kom ua tiav tes haujlwm Koj txib. Nyuam yaus tuav Tswv Yexus lub npe thov, Amees.
Nyeem Vajluskub hauv peb lub xyoo: Efexus 6
Kênh Youtube BHKTHN:
