Kalatias 5:13-18
Nqe cim:
“Kuv qhia rau nej li no: nej yuav tsum cia Vaj Ntsujplig kav nej lub neej, nej tsis txhob cia nej lub siab kav nej ib zaug li.” (Kalatias 5:16)
Lus nug rau sawvdaws xav:
- Timthawj Paulus ceebtoom cov ntseeg hauv Kalatias txog yam dabtsi?
- Muab qhov uas mus raws Vaj Ntsujplig coj, tsis ua neej raws li neeg lub siab nyiam piv rau qhov uas nyob hauv txoj kevcai qab kev tswjhwm?
- Thaum mus raws li Vaj Ntsujplig coj, peb muaj kev sib raug zoo sib hlub nrog luag lwm tus licas?
Nyob ntawm plaub tshooj thawj hauv tsab ntawv Kalatias, Timthawj Paulus tsom ntsees qhia txog txojkev ncaj ncees los ntawm kev ntseeg; nyob hauv cov tshooj tomqab, nws qhia txog lubneej ntawm tus ntseeg Vajtswv. Yog tias thawj feem nws hais txog kev ywjpheej ntawm cov ntseeg uas dim kev khi ntawm kevcai txiav thiab txoj kevcai, ces coob tug yuav nkag siab yuamkev hais tias yog li ces cov ntseeg tau ywjpheej ua txhua yam uas lawv nyiam. Vim li ntawd, Timthawj Paulus thiaj li qhia ntxiv txog kev siv txojkev ywjpheej ntawd.
Timthawj Paulus txuas feem thawj thiab feem tomqab dhau ntawm nqe lus hais tias: “Cov kwvtij, qhov uas Vajtswv tau xaiv nej cia lawm, twb yog nws xav kom nej muaj kev ywjpheej. Tiamsis nej tsis txhob muab txojkev ywjpheej ntawd ua nej txoj haukev mus ua kev phem kev qias” (nqe 13). Muaj ob txojkev ua neej tomqab uas tau kev ywjpheej: ib yog ntxab ntxawm txojkev ywj pheej mus ua raws li txojkev ntshaw nqaij tawv, ob yog mus raws li Vaj Ntsujplig coj. Thaum qhia txog kev ua neej raws li Vaj Ntsujplig coj, Timthawj Paulus tsis hais txog tej cai lijchoj, tiamsis ntau zaug nws hais txog lo lus “hlub”. Nws hais tias: “Nej yuav tsum sib hlub thiab ib leeg txaus siab hlo pab ib leeg” thiab “hlub koj tej kwvtij zejzog ib yam li koj hlub koj lub cev” (nqe 13-14). Tsis tas li ntawd xwb, nws kuj hais txog “tej uas Vaj Ntsujplig nyiam” txawv “tej uas neeg lub siab nyiam” (nqe 16-17); ua neej raws Vaj Ntsujplig coj kuj txawv ua neej raws li neeg lub siab nyiam (nqe 13) thiab nyob hauv txoj kevcai qab kev tswjhwm (nqe 18). Nyob hauv txoj kevcai qab kev tswjhwm yog ua raws li ntaub ntawv; tiamsis ua neej raws Vaj Ntsujplig coj yog cia siab rau Vajtswv Vaj Peb Leeg txojkev taw qhia. Yog li ntawd, raws li Timthawj Paulus qhia, mus raws Vaj Ntsujplig coj yog ua lub neej sib hlub thiab sib hmov tshua, yog paub thiab ua raws li tej uas Vaj Ntsujplig nyiam. Raws li qhov no, mus raws Vaj Ntsujplig coj yog hais txog kev sib raug zoo thiab txojkev sib hlub. Tiamsis, nyob hauv txoj kevcai tswjhwm ces yog coj nruj raws li tej kevcai xwb, tsis muaj kev sib raug zoo ntawm ib tug rau ib tug.
Raws li Timthawj Yauhas, mus raws Vaj Ntsujplig coj yog “txuas” rau ntawm tus Tswv thiab tus Tswv txuas rau rau ntawm peb (Yauhas 15:1-11). Ntawd yog txojkev sib raug zoo thaum tej dej ntawm lub hauv paus, uas yog Tswv Yexus, tau nqus los rau cov ceg, uas yog peb, thiab tej txiv txi ncw twb yog vim pheej “txuas” rau ntawm tsob hmab. Thaum ntawd, tej haujlwm zoo uas peb ua yog tawm hauv kev totaub tej uas Vaj Ntsujplig nyiam los raws li peb kev sib txuas nrog Nws, tsis yog tsuas ua raws tus Tswv tej kevcai uas tsis muaj ib qhov kev sib txuas nrog Nws. Peb tau nqua hu los nyob ywjpheej, yog li ntawd cia li mus ywjpheej raws Vaj Ntsujplig coj.
Thov Vajtswv,
Tus Tswv uas yog Vajtswv, tej zaum nyuam yaus muab qhov uas ua neej nyob hauv Koj hloov tej kevcai ua zoo xwb. Thov Koj pab nyuam yaus muaj kev sib txuas nrog Koj kom nyuam yaus paub thiab ua raws tej uas Koj nyiam. Nyuam yaus tuav Yexus Khetos lub npe thov, Amees.
Koj tabtom mus raws Vaj Ntsujplig coj, los tseem ua raws sab nqaij tawv coj?
Nyeem Vajluskub hauv peb lub xyoos Yaxayas 55
Kênh Youtube BHKTHN:
