Klei Aê Diê Blŭ: Galati 5:13-18
Êlan kliăng: “Ƀiădah kâo lač: Brei Yang Mngăt Jăk kiă kriê klei hdĭp diih leh anăn diih amâo srăng bi mơak kơ klei kđeh čiăng ôh.” (Galati 5:16)
Klei êmuh ksiêm mĭn: Ya klei Khua ƀĭng kna Y-Pôl hưn brei phung đăo Galati răng? Bi msĕ bruă Yang Mngăt Jăk kiă kriê, đăm yua ôh “klei êngiê diih jing êlan brei klei ngă tui si kđeh” hŏng bruă “dôk ti gŭ klei bhiăn”? Si drei dôk brei Yang Mngăt Jăk kiă kriê hŏng bi mguôp hlăm klei khăp?
Êbeh pă kdrêč tal êlâo hră čih mơĭt, Khua ƀĭng kna Y-Pôl kƀĭn hlăm klei mblang kơ klei yap kpă ênô; kdrêč adôk hlăm hră, ñu kƀĭn hlăm bruă hdĭp hlue si klei đăo. Tơdah kdrêč êlâo ñu čih kơ klei êngiê phung đăo mơ̆ng klei mgô̆ khăt klĭt leh anăn klei bhiăn, snăn lu mnuih srăng bi mlih klei mklăk hĭn, jing lač ngă snăn, phung đăo mâo klei êngiê dưi ngă djăp mta bruă pô čiăng, kyua anăn leh anăn ñu mtô kơ klei si ngă srăng yua klei êngiê anăn.
Khua ƀĭng kna Y-Pôl mkŏ čuê kdrêč êlâo leh anăn kdrêč anei hŏng êlan: “Ơ phung ayŏng adei, arăng iêô leh diih kơ klei êngiê, ƀiădah đăm yua ôh klei êngiê diih jing êlan brei klei ngă tui si kđeh, ƀiădah hlăm klei khăp brei diih jing dĭng buăl hdơ̆ng diih” (êlan 13). Mâo dua knuih hdĭp tơdah mâo klei iêô leh kơ klei êngiê: Amâodah mjhua klei êngiê čiăng bi hrăp klei kđeh čiăng; amâodah êbat hlue si klei ktrâo lač mơ̆ng Yang Mngăt Jăk. Tơdah mtô kơ bruă hdĭp hlue si Yang Mngăt Jăk, Khua ƀĭng kna Y-Pôl amâo lač ôh kơ klei bhiăn, ƀiădah lu blư̆ ñu yua boh blŭ “khăp”. Ñu lač “hlăm klei khăp brei diih jing dĭng buăl hdơ̆ng diih”, leh anăn “khăp bĕ kơ pô riêng gah ih msĕ si kơ ih pô” (êlan 13-14). Êngao anăn, ñu lŏ lač kơ “klei Yang Mngăt Jăk čiăng bi kdơ̆ng hŏng klei kđeh čiăng”(êlan 16-17); hdĭp hlue si Yang Mngăt Jăk ăt bi kdơ̆ng hŏng bruă dôk dơ̆ng ƀơ̆ng huă hlue si kđeh čiăng (êlan 13) leh anăn “dôk ti gŭ klei bhiăn” (êlan 18). Dôk ti gŭ klei bhiăn jing hlue ngă tui si klei bhiăn; êbat hlue si Yang Mngăt Jăk jing knang hlăm klei ktrâo atăt mơ̆ng Aê Diê Tlâo Čô Yang. Snăn dưi ƀuh hŏng Khua ƀĭng kna Y-Pôl, êbat hlue si Yang Mngăt Jăk jing hdĭp hŏng klei khăp leh anăn bi mđing hdơ̆ng pô, jing thâo leh anăn hlue ngă ya klei Yang Mngăt Jăk čiăng. Hlue anăn, êbat hlue si Yang Mngăt Jăk mâo wăt klei bi mguôp leh anăn klei khăp. Bi dôk ti gŭ klei bhiăn jing hlue ngă klei bhiăn hŏng klei amâo thâo săng, amâo mđing ôh kơ klei bi mguôp mnuih hŏng mnuih.
Hlue si Khua ƀĭng kna Y-Yôhan, êbat hlue si Yang Mngăt jăk jing “dôk nanao” hlăm Khua Yang leh anăn Khua Yang dôk hlăm drei (Y-Yôhan 15:1-11). Anăn jing klei bi mguôp mâo ktăk mơ̆ng phŭn, jing Khua Yang, ba kơ dŭm adhan kyâo, jing drei, leh anăn boh srăng mâo mơ̆ng bruă “dôk nanao hlăm” ana. Hlăk anăn, jih jang bruă jăk drei ngă jing boh mơ̆ng klei thâo săng ya klei Yang Mngăt Jăk khăp mơ̆ng klei bi mguôp drei hŏng Ñu, amâo djŏ kyua knŏng jing bruă hlue ngă klei bhiăn Aê Diê ƀiădah amâo mâo ôh ya klei bi mguôp hŏng Ñu. Drei mâo leh klei iêô truh kơ klei êngiê anăn brei êbat bĕ hlue si Yang Mngăt Jăk.
Drei dôk êbat hlue si klei Yang Mngăt Jăk čiăng amâodah hlue si kđeh čiăng?
Wah lač: Ơ Khua Yang, ênưih snăk kâo mjing bruă hdĭp hlăm Khua Yang jing êbat hlue si klei bhiăn knuih hdĭp grăp hruê. Akâo kơ Ih đru kâo bi mguôp sĭt suôr hŏng Khua Yang čiăng thâo săng hĭn kơ klei Ih čiăng leh anăn srăng hlue ngă. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 55
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
