Lukas 23:44-49
Nqe cim:
“Yexus hu nrov nrov hais tias, Txiv, kuv muab kuv txojsia tso rau hauv koj txhais tes! Yexus hais li ntawd tas, nws txawm tuag lawm.” (Lukas 23:46)
Lus nug rau sawvdaws xav:
– Lub sijhawm Tswv Yexus tu siav zoo li cas?
– Tus Tswv lo lus hais thaum kawg muaj nqis dabtsi?
– Cov neeg uas nyob ntawd pom lawv ua li cas?
Hnub rau, Tswv Yexus raug ntsia saum ntoo khaublig. Lub sijhawm kwvlam li thaum tav su mus txog thaum peb sij yav hnub qaij, lub tebchaws txawm tsaus nti (nqe 44). Lub sijhawm tabtom tshav ntuj cia li tsaus ntuj nti, rau qhov lub sijhawm ntawd yog lub sijhawm Vajtswv txiav txim, yog lub sijhawm Nws ua rau tagnrho lub ntiajteb no yuav tsum nyob ntsiag to mloog Nws txiav txim. Nrog rau kev tsaus ntuj, ib qhov kev tshwmsim ntxiv yog daim ntaub dai hauv Tuamtsev ntawm Chav Dawbhuv Kawg Nkaus ntuag rhe, qhov chaw uas tsis pub neeg mus chaws uas suav tau tias yog Vajtswv qhov chaw nyob hauv ntiajteb no ntuag rhe ua ob sab saud los ti nkaus hauv av (nqe 45). Tswv Yexus txojkev tuag rhuav tau tus ntsayeej thaiv Vajtswv thiab neeg, kom cov neeg txhaum mus cuag tau Vajtswv tus uas dawbhuv.
Ua ntej thaum txojsia yuav tu, Tswv Yexus hais lo lus kawg, “Txiv, kuv muab kuv txojsia tso rau hauv koj txhais tes!” (nqe 46). Lo lus no qhia paub Tswv Yexus cia siab thiab muab Nws tus kheej tso rau Leej Txiv thaum lub sijhawm nyuaj kawg nkaus. Dua li ntawd kuj yog lo lus ua timkhawv tias Tswv Yexus ua tiav tes haujlwm Leej Txiv kom ua, Nws npaj siab rov mus cuag Leej Txiv lawm. Txojkev npaj cawm neeg ua tiav. Txhua yam tiav lawm lauj!
Ntsia pom lub sijhawm Tswv Yexus tuag, thawj pab neeg uas yog cov tsimtxom Nws tus thawj tubrog qhuas Vajtswv, lees hais tias Tswv Yexus yog tus neeg ncaj ncees (nqe 47). Tus Tswv txojkev tuag ua rau lawv paub qhov tseeb. Pab neeg thib ob yog cov neeg coob coob, lawv ntaus hauv siab thiab rov mus tsev lawm (nqe 48). Lawv yog cov uas hais kom muab Tswv Yexus “ntsia saum ntoo khaublig”, Tswv Yexus txojkev tuag ua rau lawv tu siab. Pab neeg thib peb yog cov neeg uas paub Tswv Yexus. Lawv nyob deb deb ntsia quaj thiab hlub (nqe 49).
Lub sijhawm uas Tswv Yexus txojsia tu yog lub sijhawm uas ua rau ntau yam hloov, saum ntuj hauv ntiajteb mus txog neeg lub siab. Nov yog lub sijhawm uas txojkev cawm dim ua tiav, thiab tibneeg muaj sijhawm los tshuaj saib yus lub siab. Ntsia pom tus Tswv txojkev tuag, cov neeg muaj ntsejmuag nyob rau hnub ntawd nyias ua txawv lawm nyias, txawm yog tsis tshua meej los puavleej qhia paub ib qhov kev hloov tshiab hauv lub siab. Thov tus Tswv pab kom peb tsis txhob cia hnub ua kevcai koob tsheej nco txog Tswv Yexus raug txomnyem dhau mus yam tsis muaj nqis, tiamsis cia kom peb lub siab tau txais kev paub Nws txojkev tuag theej peb lub txhoj.
Thov Vajtswv,
Leej Txiv tus uas dawbhuv, thov ua Koj tsaug vim muaj Leej Tub los tuag saum ntoo khaublig. Thov Koj pab kom nyuam yaus paub nres, xav txog lub sijhawm uas Tswv Yexus Koj tu siav, kom nyuam yaus muaj lub siab rau siab ntso ua Koj tes haujlwm. Nyuam yaus tuav Tswv Yexus lub npe thov, Amees.
Tswv Yexus txojkev tuag hloov yam dabtsi hauv peb lub siab?
Kênh Youtube BHKTHN:
https://www.youtube.com/c/bhkthn
Nyeem Vajluskub hauv peb lub xyoo: II Vajntxwv 11
