Klei Aê Diê Blŭ: Y-Luk 23:44-49
Êlan kliăng: “Hlăk anăn Yêsu ur kraih ktang, lač, “Ơ Ama, Kâo jao mngăt Kâo hlăm kngan Ih!” Leh blŭ snăn Ñu tuč êwa” (Y-Luk 23:46)
Klei êmuh ksiêm mĭn: Ya klei truh hlăk Khua Yang Yêsu tuč êwa? Klei Khua Yang Yêsu blŭ knhal tuč ya čiăng lač? Si phung ƀuh klei truh leh anei ngă?
Hruê êma, arăng pơ̆ng Khua Yang Yêsu ti kyâo bi kal. Hlăk anăn hlăm brô yang hruê dơ̆ng leh, mâo klei mmăt tar ƀar čar tơl truh tlâo mmông tlam (êlan 44). Tui si djŏ mmông anăn jing mmông mđiă hĭn hlăm hruê ƀiădah jing hĕ mmăt tĭt, kyuadah anăn jing mmông Aê Diê ngă klei phat kđi, jing mmông Ñu brei jih jang lăn adiê dôk ñăt kriêp ti anăp klei Ñu blŭ kđi. Mbĭt hŏng klei mmăt, lŏ mâo sa klei yuôm bhăn mkăn truh msĕ mơh. Čhiăm păng bi kgăn Adŭ Doh Jăk Hĭn hŏng anôk mkăn hlăm sang kkuh mpŭ, amâo brei mnuih mŭt ôh hlăm anôk arăng yap jing jhưng mtao Aê Diê ti lăn ala anei, kơhiêk mdua mơ̆ng dlông phă gŭ (êlan 45). Klei djiê Khua Yang Yêsu bi rai jih mnơ̆ng bi kgăn Aê Diê hŏng mnuih, čiăng kơ mnuih dưi nao ñu pô ti anăp Aê Diê doh jăk.
Êlâo kơ tuč êwa, Khua Yang Yêsu blŭ boh blŭ knhal tuč snei, “Ơ Ama, Kâo jao mngăt Kâo hlăm kngan Ih!” (êlan 46). Klei blŭ anei bi êdah klei đăo leh anăn klei jao jih jang klei hlăm kngan Aê Diê Ama, wăt mnĭt mmông knhal tuč ăt msĕ mơh. Klei blŭ anăn ăt jing klei hưn Khua Yang Yêsu bi leh leh jih jang bruă Ama jao, truh leh mmông Ñu lŏ wĭt kơ Ama. Hdră bi mtlaih bi leh leh, Jih jang bruă ênŭm leh!
Ƀuh klei Khua Yang Yêsu djiê, phung tal sa jing phung bi mdjiê Ñu hlăm anăn mâo sa čô khua kahan, mpŭ mni kơ Aê Diê, leh anăn lač Khua Yang Yêsu jing mnuih kpă ênô (êlan 47). Klei djiê Khua Yang đru digơ̆ thâo kral klei sĭt nik. Phung tal dua jing phung ƀuôn sang, tŭk đah leh anăn đuĕ wĭt (êlan 48). Hrô kơ klei hơ̆k hŏng klei bi mdjiê msĕ si klei diñu akâo leh êlâo tinăn “Pơ̆ng ñu ti kyâo bi kal!”, snăn klei djiê Khua Yang Yêsu ƀuah ai tiê diñu. Phung tal tlâo jing phung thâo kral Khua Yang Yêsu. Digơ̆ dôk kbưi ƀiă, dlăng hŏng klei pap leh anăn ênguôt (êlan 49).
Mmông Khua Yêsu djiê jing mmông ba lu klei bi mlih, mơ̆ng lăn adiê hlŏng kơ ai tiê mnuih. Anăn jing mnĭt mmông hdră bi mtlaih bi leh ênŭm leh, leh anăn brei kơ anak mnuih mmông găl pioh ksiêm kơ ai tiê diñu pô. Jih jang phung ƀuh klei Khua Yang djiê hruê êma hlăk anăn mâo klei ngă mdê mdê. Wăt ka klă dưn, ƀiădah brei ƀuh mâo sa klei bi mlih prŏng hlăm ai tiê digơ̆. Akâo Khua Yang đru drei đăm lui hruê bi hdơr klei Khua Yang tŭ klei knap mñai êgao hĕ hơăi mang ôh, ƀiădah brei ai tiê drei mâo klei bi mlih sĭt čiăng jing năng hŏng klei knap mñai Khua Yang tŭ leh kyua drei.
Ya klei bi mlih mâo hlăm ai tiê drei mơ̆ng klei djiê Khua Yang Yêsu?
Wah lač: Ơ Khua Yang, lač jăk kơ Ih kyua klei Ih săn leh asei ti kyâo bi kal. Đru kâo thâo mjưh hĕ leh anăn ksiêm mĭn kơ mnĭt mmông Ih djiê, čiăng mtrŭt ai tiê kâo mâo klei hur har mă bruă kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Bruă Mtao 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
