II Hơ’mon 30:10-12
“Mă-lei dah ưh kơ đei bơngai năm bơtho, thoi yơ đe gơh krao khan adrol? Ưh kơ đei bơngai năm bơtho, thoi yơ đe gơh lui adrol? Ưh kơ đei bơngai năm bơtho thoi yơ đe gơh kơtơ̆ng adrol?” (Rôm 10:14)
Nơ̆r jet tơchĕng pơwao:
– Lu bơngai năm ba hla bơar đơ̆ng pơtao Hesekia đe pơm thoi yơ kơ lu sư?
– Yua kơ đơ̆ng kiơ bơngai Juđa chu kiơ̆ nơ̆r pơtao năm truh tơ Jêrusalem?
– Bơ̆n ngăl pơm thoi yơ kơplah tơ’bơ̆p tơdrong pơgăn yua kơ pơm kơdranh gah Kră Yang?
Kơplah lu bơngai năm ba hla bơar hiong jơ năr năm ba hla bơar đơ̆ng pơtao Hesekia đơ̆ng tơring ‘nâu truh tơ tơring to krao wơ̆n lu bơngai Isơrael đơ̆ng dêh char gah yă nơ̆m brŏk tơ Jêrusalem wă akŭm pơm giĕng Năm Brih “wih brŏk bĕ tơ Kră Yang ‘Bok Kei-Dei (II Hơ’mon 30:6) lei na lu bơngai Isơrael “hiĕk ăr che bơle păng pơjăm”. Mă khan thoi noh lu sư ưh kơ lê̆ ôh, lu sư năm dơ̆ng tơ pơlei nai, păng kư̆m đei lu bơngai đơ̆ng gah yă nơ̆m mơ’nah chu iŏk đon ala păng năm truh tơ dêh Jêrusalem. Đei lu bơngai Isơrael đơ̆ng gah yă nơ̆m ưh kơ ‘maih brŏk tơ Jêrusalem wă akŭm kơ Giĕng Năm Brih yua kơ pơrŏ pơang. Đunh bơih dêh char Isơrael ưh kơ chu hăm Kră Yang păng ‘bar teh đak ‘nâu ngăl tơhil băl, ưh kơ đei pôm jơhngơ̆m đon. Dang ei dah wă brŏk tơ Jêrusalem akŭm Giĕng Năm Brih lu sư khan noh lu sư iŏk đon ala yua kơ lu sư ưh kơ chu drơ̆ng khan lu sư năm jrok trong păng kăl kơ Kră Yang mơnat.
‘Bok Kei-Dei “kŭm tơgŭm” lu bơngai Juđa tơ gah Gơal wă kơ lu sư pôm jơhngơ̆m đon chu kiơ̆ nơ̆r pơtao năm akŭm Giĕng Năm Brih tơ Jêrusalem. Lu sư băt hơđăl nơ̆r athei ‘nâu đei tơlĕch kiơ̆ kơ nơ̆r Kră Yang. Mă khan lu bơngai năm ba hla bơar ưh kơ hli kơ pơmat păng chu iŏk đe hiĕk che bơle wă krao wơ̆n lu sư wih brŏk tơ Kră Yang ‘Bok Kei-Dei, mălei ‘bôh hơđăl nơ̆r tơl tơwih đơ̆ng lu bơngai Isơrael păng tơdrong pôm jơhngơ̆m đon chu kiơ̆ nơ̆r Kră Yang athei đơ̆ng bơngai Juđa ‘noh đơ̆ng tơpang ti Kră Yang, Kră Yang tơgŭm lu sư ưh kơsĭ đơ̆ng bơngai bu nai. ‘Bok Pôl khan: “Inh pơtăm găr sư bơih, na Apôlê pruih đak, mălei ‘Bok Kei-Dei ăn kơ tơmam ‘noh gơh wơ̆ tih.” (I Kôrintô 3:6). Bơ̆n ‘nĕ pơang khan inh gơh pơm tơdrong ‘nâu tơdrong to kơ Kră Yang.
Kơplah Kră Yang wơh ‘bok Êsai bơngai khan lê̆ adrol, Jêrêmi năm bơtho nơ̆r Kră Yang wă kơ kon pơlei Kră Yang tơbral lei na Kră Yang kư̆m khan lê̆ adrol lu sư gô ưh kơ mơ̆ng kiơ̆ (Êsai 6:8-9; Jêrêmi 7:27). Mălei, Kră Yang oei wă kơ lu sư bơtho. Dang ei, kơplah chu kiơ̆ nơ̆r Kră Yang Yêsu wă bơtho Tơdrong ‘Nao ‘Lơ̆ng, đe kư̆m pơjăm kơ bơ̆n, bơngai lăm hnam dơnŏ achăng, păng pơgŏ pơđep pơm kơnê̆ tăm. Mă khan tơ’bơ̆p tơdrong pơmat kơplah pơm kơdranh gah Kră Yang, mălei bơ̆n athei chu kiơ̆ nơ̆r Kră Yang yua kơ tơdrong đei yua noh gah Kră Yang păng kư̆m đei bơngai Kră Yang tơgŭm wih brŏk tơ Sư. ‘Bok Pôl kư̆m bơtho thoi âu bu krao chă Anăn Kră Yang gơh klaih mălei dah lu sư tam mă kơtơ̆ng đe ră roi lei na liơ gơh lui păng krao chă? Păng dah ưh kơ đei bu ră roi lei liơ lu sư gơh kơtơ̆ng gah Kră Yang? (Rôm 10:13-15). Tơplih kơ tơdrong achăng lê̆ dah đe che bơle, pơjăm apinh Kră Yang tơgŭm kơ bơ̆n adrin gơnang kơ Kră Yang păng krao khan tang kơ lu bơngai mă bơ̆n ră roi kơ sư.
Kơkuh kơ Ih Kră Yang. Apinh Ih ăn kơ inh pơ̆n nuih păng tơnăp pơm kiơ̆ nơ̆r Kră Yang athei mă khan đe che bơle pơjăm wă ră roi Tơdrong ‘Nao ‘Lơ̆ng krao chă bơngai wih brŏk tơ Kră Yang na gơh klaih. Krao khan yua anăn Kră Yang Yêsu Krist, Amen!
Bơ̆n hăm hli tơrơ dah mă kơdŭn kơplah đe hiĕk che bơle păng pơjăm yua kơ ră roi Tơdrong ‘Nao ‘Lơ̆ng ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 10
Kênh Youtube BHKTHN:
