Mathais 27:45-54
Nqe cim:
“Thaum peb teev ntawd, Yexus hu nrov nrov hais tias, Elis, Elis, lemas xanpathanis?Lo lus ntawd txhais hais tias, Kuv tus Vajtswv! Kuv tus Vajtswv! Ua li cas koj tso kuv tseg lawm?” (Mathais 27:46)
Lus nug rau sawvdaws xav:
– Tswv Yexus thov Vajtswv zoo li cas saum ntoo khaublig?
– Vajtswv teb tej lus thov li cas?
– Zaj kawm no qhia kom peb ua dabtsi thaum ntsib txomnyem, nyuaj siab lossis ua txhaum rau tus Tswv?
Tagnrho Tswv Yexus cov lus thov Vajtswv, nov yog cov lus thov Vajtswv qhia paub tias Nws ib leeg tiv kev mob xwb. Tus Tswv lub suab qw nrov nrov vim Nws cev nqaij raug nplawm, thiab raug ntsia hlau ntsia, qhia paub ib feem twg txojkev txomnyem uas Tswv Yexus ris kom ua tiav txojkev cawm dim. Tiamsis qhov kev mob siab tu siab tshaj yog qhov uas Vaj Leej Txiv muab Tswv Yexus tso tseg vim ris neeg ntiajteb txojkev txhaum saum Nws lub cev. Nyob rau lub sijhawm ntawd, Leej Tub tsis muab Vajtswv hu ua “Txiv” lawm (Mathais 26:39, 42), Tswv Yexus qhia tshwm Nws tus yamntxwv Vajtswv los ntawm tej lus hais zoo ib yam li Daviv xyu thaum ntsib kev txomnyem, “Kuv tus Vajtswv, kuv tus Vajtswv, vim li cas koj tso kuv tseg lawm?” (Phau Ntawv Nkauj 22:1).
Raws li Vaj Leej Tub cov lus thov Vajtswv, yuav muaj coob leej hais tias Vaj Leej Txiv tsis nco txog, nyob ntsiag to, tiamsis qhov tseeb Vaj Leej Txiv yeej puv npo lub siab tshua, hlub. Leej Txiv teb Vaj Leej Tub tej lus thov los ntawm qhov uas ua txujci tseemceeb av qeeg, daim ntaub hauv tuamtsev ntuag rhe saud los ti nkaus hauv taw, Tswv Yexus qhov kev tuag txhiv ua txojkev rau tibneeg nrog tau Vajtswv sib raug zoo. “Lub ntiajteb ua zog koog”, “pobzeb tawg zom zaws”, “qhov ntxa qhib” (nqe 51-52). Tej txujci tseemceeb no meej tseeb ua rau cov tubrog Loos pom thiab lees hais tias Tswv Yexus “yog Vajtswv tub Tub tiag” (nqe 54).
Puas muaj ib zaug twg peb saib zoo li Vajtswv txav deb yus, lossis tej lus yus thov tus Tswv tsis teb? Vajtswv tsis txav deb peb ib zaug li. Vaj Ntsujplig niaj hnub nrog peb nyob thiab teb Vajtswv cov menyuam tej lus taij thov. Cia li kawm xyaum Tswv Yexus tus qauv, nyob rau lub tsamthawj twg los yeej thov Leej Txiv pab, ntxiv zog thiab cawm xwb. Thaum raug kev txomnyem tsis txhob poob siab, yuav tsum rau siab ntso thov Vajtswv, peb yuav tsum tos Vajtswv teb peb tej lus thov, nrhiav kev ua raws li Vajtswv lub siab nyiam los ntawm qhov uas Nws teb peb tej lus thov. Qhov uas cheemtsum paub, Vajtswv yog tus uas dawbhuv koom tsis tau kev txhaum, yog li tus Tswv yuav rau txim, tsis nrog tus neeg txhaum nyob. Tiamsis yog tus neeg txhaum paub lees txim, taij thov Vajtswv pab ces tus Tswv yeej yuav zam txim rau nws xwb. Kev txhaum ua rau Vajtswv thiab tibneeg tsis muaj kev sib raug zoo, tiamsis Vajtswv txojkev hlub pub rau peb yog nyob mus ibtxhis. Tswv Yexus ua tiav txojkev cawm dim saum tus ntoo khaublig. Cia li lees kev txhaum kom tau kev zam txim, kovyeej kev txhaum thiab rov qab tau nrog Vajtswv sib raug zoo.
Thov Vajtswv,
Vajtswv, nyuam yaus ua Koj tsaug vim Koj qhia Koj lub siab zoo, siab hlub thiab kev zam txim rau nyuam yaus. Thov Leej Txiv pub kom nyuam yaus ntseeg ruaj, rau siab nrhiav kev ua rau Leej Txiv tau ntsejmuag hauv txhua lub tsamthawj. Tuav Tswv Yexus lub npe thov, Amees.
Peb puas tau lees peb tej kev txhaum lawm tau? Peb puas kub siab lug thov Vajtswv thaum ntsib kev txomnyem?
Nyeem Vajluskub hauv peb lub xyoo: I Vajntxwv 4
Kênh Youtube BHKTHN:
