Klei Aê Diê Blŭ: Y‑Mathiơ 27:45-54
Êlan kliăng: “Hlăm brô mông tal dua păn Yêsu ur kraih ktang, “Êloi, Êloi, lema sabaktani?” čiăng lač, “Ơ Aê Diê kâo, Ơ Aê Diê kâo, si ngă Ih lui hĕ kâo?”” (Y‑Mathiơ 27:46)
Klei êmuh ksiêm mĭn: Si klei Khua Yang Yêsu wah lač ti dlông kyâo bi kal? Si klei wĭt lač Aê Diê bi êdah? Ya klei hriăm anei mñă kơ drei brei ngă tơdah tuôm hŏng klei jhat truh, amâodah tơdah drei ngă soh hŏng Khua Yang?
Hlăm jih jang klei Khua Yang Yêsu wah lač, anei jing klei wah lač bi êdah klei Khua Yang dôk hjăn păn, ruă knap lu hĭn kơ jih jang. Klei Khua Yang ur kraih ktang êjai asei mlei tŭ klei arăng čăm, leh anăn pơ̆ng msei kđĭn brei ƀuh klei knap mñai kơ “atŏ” Khua Yang Yêsu tŭ ư čiăng bi leh ruă klam klei bi mtlaih. Ƀiădah klei ruă kjham hĭn jing klei Aê Diê Ama wir ƀô̆, “lui” Ñu, tơdah jih jang klei soh anak mnuih mđua ti dlông Khua Yang. Hlăm mmông anăn mtam, Aê Diê Anak amâo iêô kơ Aê Diê jing “Ama” Ñu khăp êdimi ôh (Y‑Mathiơ 26:39, 42), hrô kơ klei anăn, Khua Yang bi êdah Anăn knuih jing Aê Diê hŏng klei ur kwưh msĕ si mtao Y‑Đawit êjai dôk hlăm anôk knap mñai, “Ơ Aê Diê kâo, Ơ Aê Diê kâo, si ngă Ih lui kâo leh? Si ngă Ih dôk kbưi amâo đru kâo, leh anăn amâo dôk hmư̆ klei kâo krao ôh?” (Klei Mmuñ Hđăp 22:1).
Ti anăp klei Aê Diê Anak kwưh akâo hŏng jih ai tiê, năng ai lu mnuih mĭn kơ Aê Diê Ama amâo mâo pap, dôk kriêp ñăt, ƀiădah boh sĭt Ñu jing Aê Diê Ama bŏ hŏng klei pap, bŏ hŏng klei khăp. Ñu wĭt lač kơ klei Aê Diê Anak wah lač hŏng klei myang yuôm bhăn ktư̆ yơ̆ng lăn ala, čhiăm păng hlăm Sang Kkuh Mpŭ kơhiêk mdua mơ̆ng dlông truh ti gŭ, brei klei dưi kơ phung mnuih dưi bi mguôp blŭ hrăm klă anăp hŏng Ñu hŏng klei Khua Yang Yêsu săn asei mlei tŭ klei djiê hrô brei klei soh mnuih. “Lăn ktư̆ yơ̆ng”, “lu boh tâo kđang”, leh anăn “lu msat pŏk kđang” (êlan 51-52). Jih jang klei myang yuôm bhăn truh klă mngač tơl phung kahan Rôm lač kơ Khua Yang Yêsu, “Sĭt nik Mnuih anei jing Anak Aê Diê!” (êlan 54).
Si ngă drei tuôm mơ̆ ƀuh msĕ si Khua Yang dôk kbưi hŏng drei, amâodah klei drei kwưh akâo Khua Yang amâo hmư̆ ôh? Khua Yang amâo tuôm kbưi hŏng drei ôh. Yang Mngăt Jăk dôk mbĭt hŏng drei nanao leh anăn wĭt lač grăp klei phung anak ƀuôn sang Aê Diê wah lač. Brei drei hriăm mơ̆ng klei Khua Yang Yêsu bi hmô, hlăm jih jang klei truh, ăt tui duah klei ktrâo atăt, thiăm ai ktang, klei bi mtlaih mơ̆ng Aê Diê Ama. Tuôm hŏng klei jhat truh đăm êdu ai ôh, brei wah lač hŏng jih ai tiê, brei drei dôk răng čang guôn klei Khua Yang wĭt lač, tui duah klei Khua Yang čiăng hlăm klei Ñu wĭt lač. Brei drei mđing klei anei, Aê Diê jing Pô Doh Jăk amâo tŭ klei soh ôh, kyuanăn Khua Yang srăng bi kmhal, kbưi mơ̆ng mnuih soh. Ƀiădah tơdah mnuih soh thâo kmhal kơ klei soh, kwưh akâo kơ Khua Yang, snăn amâo mâo ôh klei soh Aê Diê amâo dưi pap brei. Klei soh bi kgăn klei bi mguôp Aê Diê hŏng anak mnuih, ƀiădah klei khăp Khua Yang pioh kơ drei dôk nanao hlŏng lar. Khua Yang Yêsu bi leh leh, hdră bruă bi mtlaih ti dlông kyâo bi kal. Brei drei jhŏng kmhal kơ klei soh čiăng mă tŭ klei pap brei klei soh, dưi hĭn hŏng klei soh leh anăn lŏ bi mrâo klei bi mguôp hŏng Khua Yang.
Si ngă drei kmhal kơ klei soh pô leh mơ̆? Drei wah lač hŏng jih ai tiê mơ̆ hlăm klei knap mñai?
Wah lač: Ơ KhuaYang, bi mni lač jăk kơ Khua Yang mñă kâo kơ klei jăk, klei khăp leh anăn pap brei klei soh Khua Yang pioh brei kơ kâo. Akâo kơ Ama bi kjăp klei đăo kâo, hŏng jih ai tiê tui duah klei Ama čiăng hlăm jih jang klei truh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Bruă Mtao 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
