Tĭt 2:6-8
“Păng ih kơdih athei pơm ‘lơ̆ng tơpăt lăm tôm tơdrong wă kơ lu bơngai lui pơm kiơ̆ thoi ih. Ih bơtho đe mă trŏ pơm mă khuơ̆ khuơ̆ wă kơ đe lăng bơ̆n bơtho tơpă.” (Tĭt 2:7)
Nơ̆r jet tơchĕng pơwao:
– Pôl bơtho Tĭt wă kơ bơtho tơ’bôh dơ̆ng kơ lu bơngai oei moh tơdrong kiơ?
– Pôl kăl kơ tơ’bôh tơdrong arih pơm kơmĭl ‘lơ̆ng thoi yơ?
– Lu bơ̆n đei pơm kơmĭl kơ lu bơngai oei moh mă lăm hnam dơnŏ dah khul bơngai thoi yơ?
Pôl bơtho Tĭt oei pŭ iŏk bơtho tơ’bôh kơ lu bơngai oei moh lăm khul bơngai lui pơjuăt arih kĕ gơh gơ̆t, ‘nâu bơih minh tơdrong mă đei lăm plei Yang Bơhngol ‘Lơ̆ng. Sơnăm oei adruh tơdăm ling lang tơ’bơ̆p tơdrong pơhlŭ tih đơ̆ng lu bôl buăl, lăm teh đak, thoi noh kăl kơ gơnang kơ Yang Bơhngol ‘Lơ̆ng tơgŭm wei tơdrong arih gơh gơ̆t kơdih akâu, gơh hơgei, gơh tơng lăm tôm tơdrong wă kơ đei tơdrong arih pơm kơ Kră Yang lăp đon.
Lăm trong 7-8, Pôl lăng gĭt kăl dêh bơtho Tĭt arih pơm kơmĭl. Jơ̆ minh ‘nu bơngai chông anhăk gah bơhngol, Tĭt kăl kơ pơm kơmĭl ‘lơ̆ng kơ bơngai lui “păng ih kơdih athei pơm ‘lơ̆ng tơpăt lăm tôm tơdrong wă kơ lu bơngai lui pơm kiơ̆ thoi ih. Ih bơtho đe mă trŏ pơm mă khuơ̆ khuơ̆ wă kơ đe lăng bơ̆n bơtho tơpă.” (trong 7 BTTHĐ). Bơngai tơblang nơ̆r ‘Bok Kei-Dei John MacAthur chih: “sư ưh kơsĭ bơtho tơdrong lui kơ đe hăm nơ̆r pơma đĕch sơmă hăm tơdrong arih wă kơ mă trŏ thoi nơ̆r sư đei pơma. Phŏ lăp hăm nơ̆r bơtho tơ’bôh pran jăng păng nơ̆r pơtrŭt hloh noh nhen thoi tuh đak tơ hla ‘bum dah bơngai mă bơtho tơ’bôh noh ưh kơ arih trŏ thoi nơ̆r sư pơma.” Kră Yang Yêsu chrih khan kơ lu bơngai Pharisi pơma gah pơm ‘lơ̆ng đĕch mă ưh kơ pơm kiơ̆ noh thoi bơngai hơlĕnh ưh kơ tơpă. Kơplah Pôl bơtho Tĭt tơdrong âu, lăm kơdih akâu sư pơ̆n pơma hăm bơngai lui Kôrintô “Na iĕm pơm kiơ̆ inh, thoi inh pơm kiơ̆ Yêsu Krist.” (I Kôrintô 11:1).
Gah nơ̆r pơma, Tĭt gơh đei bơtho “Dah ih bơtho trŏ đe ưh kơ gơh bâu roi ih ôh. Thoi noh na lu bơngai mă ayăt kơ bơ̆n, sư wă bâu roi pơjăm bơ̆n ră mă sư ưh kơ pơ̆n kơlih kơ bơ̆n tơpăt. Dah sư bâu roi bơ̆n mă bơ̆n ưh kơ đei pơm tơdrong yoch kiơ, noh sư mơlâu kơ đe hơ’măng.” (trong 8 BTTHĐ). Mă ưh kơ sĭ Tĭt pơm kơmĭl lăm tơdrong pơm ‘lơ̆ng đĕch ôh mă kư̆m pơm kơmĭl lăm nơ̆r pơma. Dôm tơdrong kiơ sư pơma noh jing nơ̆r pơma trŏ ngăl, ‘lơ̆ng ngăl, lăp đon tơproh ‘lơ̆ng, ưh pă gơh bâu roi pơm kơ lu bơngai ayăt jing mơlâu, ưh kơ gơh wă pơm tơdrong kơnê̆ kiơ dơ̆ng. Tơdrong arih tơpăt păng nơ̆r pơma trŏ ưh kơ pơm kơmĭl ‘lơ̆ng đĕch, chĭt pơ ŏm ‘bơ̆r lu ayăt, gơh weh kơ tơdrong pơjah pơjăng, jing pơm pơchrang hơdah anăn Kră Yang.
Đĭ đăng lu bơ̆n jing mĕ ‘bă, yă ‘bok, mih ma duch nă mă đei pơgơ̆r lăm hnam dơnŏ, lu bơ̆n kăl kơ pơm kơmĭl gah tơdrong pơm ‘lơ̆ng, lăm tơdrong bơtho, lăm tơdrong arih sa, pơma dơnuh păng đĭ lăm tơdrong arih đon lui… wă kơ kon sâu arik rok kiơ̆, lăm khul bơngai lui, ‘nguaih kơ bơngai bơtho wei lăng tơm hnam akŭm đei lu kră hnam yang, lu thây cô bơtho rim khŭl păng lu bơngai bơ̆jang đei pŭ iŏk chông anhăk minh khul triu, Kră Yang păng Khul Bơngai Lui oei lăng hơmĕng đơ̆ng đĭ đăng lu bơ̆n đei tơdrong arih pơm kơmĭl. Apinh Kră Yang ăn kơ lu bơ̆n ling lang pơ’lơ̆ng lăm tơdrong arih wă pơm kơmĭl ‘lơ̆ng kơ hnam dơnŏ păng Khul Bơngai Lui.
Kơkuh kơ Ih ơ ‘Bă mă ‘mêm mơnat, bơnê kơ Kră Yang mă ‘mêm păng dŏng pơklaih inh hlôi đơ̆ng hlŭt tơdrong yoch, ăn kơ inh gơh jing kon Kră Yang mă oei tơ plĕnh ti. Apinh Yang Bơhngol ‘Lơ̆ng tơgŭm inh, gơnang kơ tơdrong pran đơ̆ng ih wă pơjuăt gơh arih pơm kơmĭl ‘lơ̆ng đơ̆ng đon lui, tơdrong tơchĕng, nơ̆r pơma, pơm ‘lơ̆ng đơ̆ng lăm hnam dơnŏ păng Khul Bơngai Lui, yua Anăn Kră Yang Yêsu Krist, Amen!
Lu bơngai oei moh lăng tơdrong arih lu bơ̆n gô ‘bôh kơmĭl ‘lơ̆ng dah kơnê̆ wă rok kiơ̆?
Đŏk Sơ̆p Hla bơar ‘Bok Kei-Dei lăm pêng sơnăm: Luka 23
Kênh Youtube BHKTHN:
