Nêhêmi 4:1-5, 9
“Ơ Kră Yang ‘Bok Kei-Dei lu nhôn ơi! Mơ̆ng bĕ; yua kơ lu nhôn đe pơjăm, apinh Ih tuh bĕ tơdrong ưh kơ hiôk lu sư tơ kơpal kơ̆l lu sư; păng jao ăn bĕ kơ lu sư pơm bơnă kơ teh đak đe.” (Nêhêmi 4:4)
Nơ̆r jet tơchĕng pơwao:
– Dơ̆ng ‘bơ̆t anăp lu ayăt areh, pơm kơnê̆ kơ lu sư, ‘bok Nêhêmi hlôi pơm kiơ?
– Bơ̆n tơchĕng thoi yơ gah nơ̆r ‘bok Nêhêmi krao khan rŏ kơ trăp trĭn dêh noh?
– Bơ̆n rok kơmĭl ‘bok Nêhêmi gah tơdrong kiơ?
‘Bok Nêhêmi sư kon bơngai, sư kư̆m jĭ jơhngơ̆m ưh kơ hiôk kơ nơ̆r lu ayăt che bơle, pơjăm, sư hlôi roi ăn kơ Kră Yang: “lu nhôn âu đe pơdê pơjăm”. Sư ưh kơ pơm tơwih kơ lu yăt, mă-lei sư tơkan tơ Kră Yang, krao khan roi hơlăng kơ Kră Yang jơhngơ̆m sư blĕk ưh kơ hiôk kơ lu ayăt pơm kơnê̆ thoi yơ noh hloi. Krao khan ưh kơ tôch ‘bơ̆t tơdong kơ̆m giĕng dah tôch ‘bơ̆t nơ̆r pơhrôp đĕch ôh,mă-lei krao khan noh bơih jơ mă rim ‘nu kơ bơ̆n gơh pơdah roi tơpăt hơlăng jơhngơ̆m bơ̆n ‘bơ̆t anăp Kră Yang. Jơhngơ̆m ưh kơ hiôk dah blĕk ơh noh kon bơngai bơ̆n đei ngăl ưh kơ đei bu gơh weh wer, mă-lei bơ̆n ‘nĕ kơ ăn jơhngơ̆m blĕk ơh‘noh hei chông bơ̆n truh bơ̆n pơm kơnê̆. Bơ̆n blĕk ơh kơ bơngai bu, dah bơ̆n tơl tơwih hloi jơ ‘noh, lơ ’măng pơm kơ bơ̆n glăi lăm nơ̆r pơma, glăi lăm tơdrong bơ̆n pơm, đơ̆ng lăp bơ̆n ră jing glăi bơ̆n dơ̆ng, đơ̆ng đe pơm kơ bơ̆n ưh kơ hiôk jing đơ̆ng bơ̆n pơm kơ đe ưh kơ hiôk dơ̆ng. Mưh tơ’bơ̆p lu tơdrong anat anot, đe hil areh, pơm kơnê̆, mă loi lu nơ̆r đe pơma pơm kơ bơ̆n ưh kơ hiôk noh. Wă hơmet tơdrong bơ̆n ưh kơ hiôk noh mĭnh tơdrong krao khan bơih adrol hloh, yua kơ tơdrong krao khan noh gô tơgŭm bơ̆n huay kơ tơl tơwih glăi hăm bơngai mă pơm kơ bơ̆n ưh kơ hiôk noh, tơdrong krao khan kư̆m tơgŭm bơ̆n đei Kră Yang chông anhăk, păng tơgŭm bơ̆n đei jơhngơ̆m kĕ pran đơ̆ng Kră Yang. ’Bok Nêhêmi hlôi krao khan kơ Kră Yang hăm đĭ jơhngơ̆m bơih yua kơ sư lăng tơdrong krao khan ‘nâu chă tơdrong mơsêh pran đơ̆ng Kră Yang.‘Bok Nêhêmi lăng tơdrong krao khan ‘nâu ưh kơ thoi tơdrong kơ̆m giĕng,yua kơ đe juăt kơ jang pơkeh tơdrong kơ̆m giĕng noh adrol kơ iung pơm kiơ̆ kơdih wă. Bơ̆n bơngai lui athei lui tơpă kơ tơdrong krao khan noh bơih anih bơ̆n tơblah,tơm kăl lăm tơdrong bơ̆n tơblah, anih mă pơm kơ bơ̆n blah ayăt jei bơ̆n.
Tơdah trong 4-5 ‘nâu nơ̆r krao khan kơdih mĭnh ‘nu, lei trong 9 ‘noh ‘bok Nêhêmi khan: “Lu nhôn krao khan kơ‘Bok Kei-Dei lu nhôn”,‘noh‘bok Nêhêmi păng kon pơlei Kră Yang băt kơnăl kơ tơdrong krao khan ‘nâu kăl dêh. Pôm jơhngơ̆m đon krao khan noh ba ăn lu bơngai lui jơhngơ̆m pran kơtang,tơ gŭm tơiung dih băl, ba đĭ-đăng bơngai lui đei tơdrong rĕng kơnhăm hơbĭ, păng tơgŭm lu bơngai đêl kơnam dih băl, ưh kơ tơjê̆ dih băl jing tơhiôk dih băl,tơjê̆ dih băl.
Minh tơdrong anat đei dan tơ âu pơting hăm nơ̆r Kră Yang Yêsu bơtho athei ‘nĕ kơ jô̆ yo dih băl (Mathiơ 5:44; 6:12), nơ̆r ’bok Nêhêmi krao khan nhen thoi trăp trĭn dêh,sư krao apĭnh Kră Yang phak, apĭnh Kră Yang hiap pơtê̆ tuh kơpal kơ̆l lu ayăt. Mă khan lei ră, bơ̆n athei tơchĕng, ‘bok Nêhêmi blĕk ơh ưh kơ yua kơ đe hơtŭt jơhngơ̆m sư kơdih ôh,mă-lei yua kơ đe hơtŭt anăn Kră Yang păng kon pơlei Kră Yang. Nơ̆r ‘bok Nêhêmi krao khan ‘nâu apĭnh Kră Yang ‘Bok Kei-Dei bơwei tơdrong tơpăt hơnơ̆ng Sư păng bơwei Anăn Sư hăm tơdrong phak lu bơngai hơlĕnh pơdăr păng pơma blông. Mă khan nơ̆r‘bok Nêhêmi krao khan‘nâu băt mă ưh trŏ mơ̆n ră,mă-lei tơ’bôh jơhngơ̆m sư kuă kơ pơm ‘mong kơ lu ayăt,sư jao kơ Kră Yang, mơ̆ng kơ Kră Yang phak lu sư. (Rôm 12:19) Sơ̆p Hlabơar’Bok Kei-Dei chih roi tơpăt đêl nơ̆r ‘bok Nêhêmi krao khan, bơ̆n rok ‘bok Nêhêmi krao khan, bơ̆n rok jơhngơ̆m sư krao khan noh, ưh kơ rok nơ̆r sư krao khan noh ôh.
Kơkuh kơ Ih Kră Yang,apinh Ih ăn kơ inh tơdrong gơh hơgei ‘bôh băt kơplah inh ưh kơ hiôk đơ̆ng lu nơ̆r đe che bơle, pơjăm pơjuă, păng đe jâu inh kơnê̆. Apĭnh Ih ăn kơ inh ling-lang lui gơnang kơ Ih lăm tôm tơdrong păng jao kơ Ih tôm tơdrong tơ’bơ̆p ‘bơ̆t anăp ĭnh. Inh krao khan yua anăn Kră Yang Yêsu Krist, Amen!
Bơ̆n ngăl juăt kơ pơm kiơ kơplah tơ’bơ̆p tơdrong đe che bơle pơjăm, jâu bơ̆n kơnê̆?
Đŏk Sơ̆p Hla bơar ‘Bok Kei-Dei lăm pêng sơnăm: Luka 5
Kênh Youtube BHKTHN:
