II Hơ’mon 29:4-11
Trong tơm:“Ơ lu đe kon inh ‘nĕ pă pơhiơ̆, yua kơ Kră Yang đei rơih iŏk boih lu iĕm jing đĭch đam Sư, wă kơ dơ̆ng ‘bơ̆t anăp Sư, bơ̆jang kơ Sư soh tơmam ‘bâu phu kơ Sư.” (II Hơ’mon 29:11)
Nơ̆r jet tơchĕng pơwao:
– Pơtao Hesekia krao akŭm lu ‘bok soi păng lu bơngai Lêwi wă pơma tơdrong kiơ?
– Pơtao krao akŭm lu sư wă pơm kiơ?
– Lu bơ̆n băt kơdih bơ̆n gơh đei krao wă pơm kiơ ăn kơ khul bơngai lui?
Đơ̆ng rŏng kơ pơih ‘măng hnam akŭm, pơtao Hesekia krao akŭm lu ‘bok soi păng lu bơngai Lêwi wă pơma gah tơdrong wă pơjing dơ̆ng tơdrong akŭm kơkuh. Adrol hloh, hơmet kơdih kâu mă ‘lơ̆ng rơgoh păng hơmet Hnam akŭm Kră Yang wă kơ ‘lơ̆ng rơgoh, yua kơ lu ‘bok yă lu sư đei pơm kơnê̆, achăng lê̆ Kră Yang păng ưh pă kơkuh kơ Sư. Pơtao tơ’blŏk ăn kơ lu sư tơdrong Kră Yang hil mĭl yua đơ̆ng lu sư pơm wă tơbăt kơ lu sư (trong 6-10). Jơ ‘nâu, pơtao tơbăt kơ lu sư wă kơ pơjing ming tơdrong pơgơ̆p hăm Kră Yang, pơm tơ’bôh jơhngơ̆m wă pơm tơpă lăm pơtao păng kon pơlei wă wih brŏk chă Kră Yang hăm đĭ jơhngơ̆m (II Hơ’mon 15:12), wă kơ Kră Yang huay pă hil mĭl dơ̆ng păng mă khan pơtao dơ̆ng mơ̆n. Hơtuch sư, pơtao đĭ krao pơtơm lu ‘bok soi păng bơngai Lêwi, “Ơ lu đe kon inh, ‘nĕ pă pơhiơ̆ dơ̆ng”. yua kơ Kră Yang đei rơih iŏk lu sư pơm đĭch đam Sư wă dơ̆ng ‘bơ̆t anăp Sư, bơ̆jang soi tơmam ‘bâu phu ăn kơ Sư”.
Jing minh ‘nu bơngai pơgơ̆r athei đei tơdrong hlôh băt gah bơhngol păng ‘mêm kơ Kră Yang. Pơtao Hesekia mơn chhur nuih tơdrong rơdu gah bơhngol păng yua kơ tơdrong yoch kon pơlei Kră Yang kơplah lu sư achăng lê̆ Hnam Akŭm Kră Yang, ưh pă kơkuh kơ Sư tơ noh dơ̆ng. Pơtao băt hơđăl tơdrong kăl lăm Hnam Akŭm Kră Yang na pơm tơ’bôh tơdrong tơ’bưh sơlam kon pơlei Kră Yang hăm Kră Yang păng kơ jơhngơ̆m lu sư ‘măn ăn kơ Kră Yang. Pơtao wă pơm tơdrong kiơ ‘noh wă kơ gơh tơplih tơdrong gah bơhngol kon pơlei Kră Yang, wă kơ lu sư wih brŏk chă Kră Yang păng kơkuh kơ Sư wă kơ lu sư huay pă “pơmat tat, răm ‘băm, che bơle pơjăm”. Yua thoi noh, pơtao tơ’blŏk kơ lu ‘bok soi păng lu bơngai Lêwi athei ‘blŏk kơ tơdrong Kră Yang krao lu sư, ‘nĕ pă pơhiơ̆ dơ̆ng athei jah bơ̆jang hloi wă kơ tơdrong kơkuh kơ Kră Yang lăm Hnam Akŭm jah hơmet ming dơ̆ng.
Hrei âu, bơngai lui kơ Yêsu Krist, jơ̆ kon pơlei mă Sư rơih iŏk, jơ̆ jing ‘bok soi lăm hnam pơtao wă bơtho tơ’bôh gah dôm tơdrong hlĭch chrơp mă Kră Yang Yêsu đei pơm bơih (I Pêtrôs 2:9). Ưh kơ sĭ lu ‘bok bơtho, thây bơtho đĕch ôh, mă-lei đĭ-đăng lu bơ̆n jing bơngai đĭch đam Kră Yang, gơh bơ̆jang lăm dôm tơdrong jang phara pha, wă soh tơmam ‘bâu phu kơ Sư, wă khan pơyơ̆r nơ̆r krao khan kơ Kră Yang, nơ̆r bơnê. Apinh Kră Yang ăn rim ‘nu lu bơ̆n đei jơhngơ̆m đon thoi pơtao Hesekia, gơh ‘bôh dôm tơdrong kăl yua lăm Hnam Akŭm păng wă pơm mă tơpă hloi tơdrong kiơ ‘noh kơ lu bơngai oei rơdu gah bơhngol wă kơ gơh wih brŏk tơ Kră Yang. Lu bơ̆n ‘nĕ kơ pơhơi, mă-lei “’nĕ kơ pơhiơ̆ dơ̆ng” mă athei jah pơm kơdranh kơ lu bơngai tam mă băt kơ Kră Yang, wă kơ lu sư kư̆m gơh kơkuh kơ Kră Yang, đơ̆ng noh huay pă đei tơdrong Kră Yang hil mĭl (Yôhan 3:16).
Lu bơ̆n hăm wă “pơhiơ̆” pơm pơhơi ưh kơ hiơ̆k tơdrong kăl lăm Hnam Akŭm, dah lu bơngai tam băt kơ Kră Yang mă oei tăp dăr kơ lu bơ̆n ưh?
Ơ Kră Yang Yêsu, apinh tơgŭm inh arih pơm kiơ̆ thoi Ih đei râu krao jing ‘bok soi lăm hnam pơtao wă kơ inh gơh bơ̆jang tơdrong kơkuh, pơyơ̆r kơ Ih dôm nơ̆r krao khan păng ưh kơ pơhiơ̆ lăm tơdrong chông anhăk bơngai nai wih brŏk tơ Ih, yua anăn Kră Yang Yêsu Krist, Amen.
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 13
Kênh Youtube BHKTHN:
