I Pêtrôs 3:13-14
Trong tơm: “Dah đe pơm kơnê̆ kơ bơ̆n yua kơ bơ̆n pơm ‘lơ̆ng, noh bơ̆n rai hiôk hloh.Iĕm ‘nĕ kơ hli kơ tơdrong lu sư pơm, ‘nĕ kơ tơrơ kơ tơdrong lu sư ngơ̆r” (I Pêtrôs 3:14)
Nơ̆t jet tơchĕng pơwao:
– ’Bok Pêtrôs khan kiơ kơplah lu bơngai lui pơm ‘lơ̆ng mă-lei đe oei pơm kơnê̆?
– Nơ̆r bơtho khan ‘nâu đei tơdrong gĭt yua kiơ?
– Nơ̆r Kră Yang năr ’nâu pơlung pơdrŭt bơ̆n thoi yơ lăm tơdrong jang pơm kơdranh ră roi tơdrong Kră Yang?
Tơdrong juăt mă mĭnh noh Hưch Hanh ‘Maih Pơm ‘Lơ̆ng ‘nei pơma kơ iăp‘bơ̆t tơdrong hmă hmă noh đĕch,yua kơ kơdih ‘bok Pêtrôs păng lu bơngai lui kơplah ei sơ̆, kon pơlei Juđê hăm lu bơngai Rôm pơgơ̆r teh đak noh tŏk-bŏk oei pơm kơnê̆ kơ lu sư. Yua kơ’noh bơih na ‘bok Pêtrôs bơtho pơtrơp dơ̆ng tơdrong juăt trŏ kăl mă ‘bar: Lăp Đon Chu Iŏk Pơmat (trong 14).
‘Bok Pêtrôs pơma rơđah hơđăl khan tơdah kư̆ kơ “hưch hanh pơm ‘lơ̆ng” lei ưh kơ đei bu “pơm kơ- nê̆” kơ lu bơ̆n, mă-lei tơdah đei đe pơm kơnê̆ lei athei chu iŏk, noh “đei pŭn hiôk tơpă”. Pŭn hiôk noh nơ̆r mă Kră Yang Yêsu yua lăm Mathiơ 5:10-12, Sư khan lu bơngai chu iŏk tơdrong đe pơm kơnê̆ yua kơ Sư noh đei pŭn hiôk yua kơ lu đe ei gô iŏk tơdrong apah gĭt găl tơ kơpal plĕnh ti, na tơdrong bơ̆n pŭ iŏk pơmat noh bơ̆n wang pŭ hơdai hăm “lu bơngai pơtruh nơ̆r’Bok Kei-Dei sơ̆”. Mă loi, Hla bơar I Pêtrôs 5:10 tơbăt khan chu iŏk pơmat noh ba bơ̆n truh tơ tơdrong ‘lơ̆ng tôm mah,kơjăp khŏm khŏm, păng bơ̆n mơn đei lu tơdrong plơ̆ng ‘nao dơ̆ng, lăm Kră Yang. Tơdrong chu iŏk pơmat mă ‘bok Pêtrôs pơma ‘bơm noh ưh kơ trŏ kơ chu pơmat đêl kiơ kiơ bưh ôh, mă-lei chu pơmat “yua kơ tơdrong ‘lơ̆ng tơpăt”, yua kơ “hưch hanh pơm ‘lơ̆ng” păng yua kơ pơm kiơ̆ kơ “’Bok Kei-Dei wă”. Hmach dêh mưh lơ lu bơngai lui hơtai oei pŭ pơmat tat yua kơ đơ̆ng tơdrong yoch kơnê̆ lu sư kơdih pơm.(I Pêtrôs 3:17). Bơ̆n bơngai lui, bơ̆n ưh kơ pôm lăp đon chu iŏk pơmat ‘bơ̆t bơ̆n arih jing bơngai pơm kơdranh ră roi noh đĕch ôh, mă-lei athei chu iŏk pơmat hăm jơhngơ̆m pran kơjăp iăp kơtang, ‘nĕ kơ hli kơ lu bơngai kơnê̆ pơma pơjuă,tơhli tơan, păng ‘nĕ kơ rŭng-răng,tơrơ tăr wăr. ‘Bok Pêtrôs kư̆m mơn jơhngơ̆m sư ki sơ̆ lêl đei sơngah bơih kơ ‘Bok Thây sư (Mathiơ 26:69-75), mă-lei đơ̆ng rŏng kơ tơ’bơ̆p Kră Yang iung arih đơ̆ng lôch, na jơ ‘nâu sư băt hơđăl kơ tơdrong lôch păng tơdrong hli krê kơ lôch noh jei Kră Yang bơih, tơdrong lôch hăm tơdrong hli krê kơ lôch noh thuơ kơ Kră Yang ling-lang khŏm khŏm, lei na ‘bok Pêtrôs jing nuih kơtang kơplah sư tơ’bơ̆p pơjăng pơjăr hăm tơdrong đe hil areh pơm kơnê̆. (Tơdrong Jang 4:1-31).
Yă Mari Tu dor sư pơm pơtao dêh char Ăng-gle, đe anăn sư “Mari Rơhing ‘Maih Huch Pham” yua kơ jơhngơ̆m areh blĕk ayăt kơ lu bơngai lui Tơdrong ‘Nao ‘Lơ̆ng Kră Yang Yêsu. Yă ei đơ̆ng rŏng kơ sư tŏk pơm pơtao, lăm dêh char ei đei bre’bok ei bơngai lui ‘lơ̆ng trŏ, mă-lei sư jâu jô̆ kơ bre ‘bok âu lui chroih: ‘Bok bơtho anăn sư Hug Latimer mă oei tơ Worcester păng’Bok bơtho anăn sư Ridley mă oei tơ Luân Đôn,yua kơ Yă pơtao noh jô̆ kơ bre ‘Bok bơtho ei pơjing tơdrong lui chroih na sư soh hur lê̆ bre ‘bok ei hăm ŭnh lăm’năr 16/10/1555. Kơplah đe chô̆ bre sư ‘bơ̆t jrăng, ‘Bok bơtho anăn sư Latimer, sư hue tơ ‘Bok bơtho anăn sư Ridley păng khan: “Năr âu ba tơ̆k ŭnh jrĕnh tơ dêh char Ăng-gle khơ̆ng ling-lang ưh kơ đei la-yơ păt. Bre sư chu pŭ iŏk pơmat yua kơ Kră Yang mă-lei bre sư noh đei pŭn hiôk yua kơ sư hlôi tơplih iŏk bơih jơ phŭt chhŭr nuih pơmat tat kơđeh,hrei hrei đĕch noh wă kơ gơh tŏk tơ pơlei ‘lơ̆ng, Dêh char ‘lơ̆ng rŏ mơsêh mơyang, oei hăm ‘Bok Kei-Dei pŭn hiôk chhôk ngă ‘nă hal ling-lang ưh kơ đei la-yơ tôch. Chăl arih lu sư, tơdrong lu sư chu lôch yua kơ tơdrong lui kơ Kră Yang Yêsu noh jing tu tơm tơdrong pơlung pơdrŭt lu bơngai lui lơ lơ jơhnơr đơ̆ng sơ̆ khơ̆ kơ dang ei wă kơlui kơjăp kơplah tơ’bơ̆p tơdrong pơlong, kơplah pŭ iŏk tơdrong gleh glăn pơmat tat. Apinh Kră yang ăn kơ bơ̆n nuih kơtang hơnơ̆ng kơ hưch hanh pơm ‘lơ̆ng păng lăp đon chu iŏk pơmat kơplah chă năm bơtho ră-roi Tơdrong’Nao’Lơ̆ng Kră Yang. Tơdrong pŭn hiôk oei răp gô bơ̆n ling-lang mưh bơ̆n arih trŏ kiơ̆ thoi nơ̆r Kră Yang bơtho khan, bơ̆n đei hloi tơdrong pŭn hiôk tih ưh kơ gơh pơtŏ pơting hăm tơdrong pŭn hiôk lăm teh đak âu.
Dang ei bơ̆n hơtai oei chu iŏk gleh pơmat yua kơ đơ̆ng pơm kơdranh ră roi tơdrong Kră Yang dah pŭ pơmat yua kơ đơ̆ng tơdrong kiơ nai?
Kơkuh kơ Ih ơ Kră Yang, inh băt kơ inh gô đei tơdrong đe pơm kơnê̆, pơm anat anot kơplah inh arih pơm kơdranh ră roi tơdrong Ih. Apinh Ih ăn kơ ĭnh đei đon lui kơjăp, đei jơhngơ̆m pran kơtang, păng băt gơnang hơmĕng kơ Ih wă kơ kĕ jei đơ̆ng tôm tơdrong. Inh krao khan yua anăn Kră Yang Yêsu Krist, Amen!
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 7
Kênh Youtube BHKTHN:
