Klei Aê Diê Blŭ: Y-Tit 1:5-9
Êlan kliăng: “Kyuadah khua pô mtô jing pô kiă kriê bruă Aê Diê, jing mnuih arăng amâo dưi ƀuah ôh. Ñu amâo jing mgao, djăl krêñ, kpiê ruă, jhŏng ƀai, amâodah kčưn kơ prăk lu ôh” (Y-Tit 1:7)
Klei êmuh ksiêm mĭn: Ya bruă klam Khua ƀĭng kna Y-Pôl jao kơ Y-Tit? Ya knuih Y-Tit dlăng čiăng ruah pô kiă Phung Sang Aê Diê ti čar Kret? Ya klei yuôm bhăn knuih anei hŏng drei hruê anei?
Khua ƀĭng kna Y-Pôl jao kơ Y-Tit dua mta bruă brei ngă ti dŭm Phung Sang Aê Diê ti čar Kret. Tal sa, “mkra klei ka leh ôh” leh anăn tal dua, “mdưm phung khua mduôn hlăm grăp boh ƀuôn” tui si klei Khua ƀĭng kna Y-Pôl mtă leh (êlan 5). Čiăng dưi kriê dlăng jăk dŭm Phung Sang Aê Diê tinei, Y-Tit brei mâo phung djăp klei thâo čiăng mă bruă. Tinei, Khua ƀĭng kna Y-Pôl mđing snăk kơ knuih “amâo mâo anôk ƀuah ôh” mơ̆ng pô kiă Phung Sang Aê Diê msĕ si sa hnơ̆ng čuăn tal êlâo kơ Y-Tit dlăng čiăng ruah phung kiă kriê bi djŏ.
Hŏng gŏ sang, khua mduôn brei jing pô arăng đăo knang, bi hmô, amâo mâo anôk ƀuah ôh. Diñu jing phung khua thŭn dưi ruah hlăm phung đăo čiăng kiă kriê Sang Aê Diê. Kyua anăn klei sĭt suôr sa ung sa mô̆ hlăm klei bi dôk ung mô̆ brei hlue ngă kjăp. Êngao anăn, khua mduôn ăt brei mâo klei mtô bi hriăm, mtă mñă kơ anak čô sĭt suôr, khăp kơ Aê Diê leh anăn amâo mâo ôh arăng dưi kčŭt jing “êgao hnơ̆ng amâodah kơ klei amâo gưt asăp”, jing hdĭp plă plia, amâo mâo klei kpĭ mjuăt (êlan 6).
Hŏng ñu pô, pô kiă Sang Aê Diê brei jing amâo mâo anôk ƀuah ôh. Hlăm bruă jing pô kiă kriê Sang Aê Diê, čiăng kriê dlăng êpul biăp Aê Diê snăn “amâo jing mgao, djăl krêñ, kpiê ruă, jhŏng ƀai, amâodah kčưn kơ prăk lu ôh” (êlan 7).
Hŏng grăp čô mnuih, brei “jing mnuih thâo jum arăng, khăp kơ klei ngă jăk, thâo mkhư̆ klei ñu pô čiăng, kpă, doh jăk, thâo dôk djŏ hnơ̆ng” (êlan 8) amâo djŏ ôh jing mnuih hiu mđĭ, mă ai pô mkăn. Anăn jing knuih siam phung đăo, mơ̆ng anăn lu mnuih srăng thâo leh anăn nao kơ Khua Yang.
Hŏng klei đăo, brei diñu “djă pioh kjăp klei blŭ sĭt tui si arăng mtô leh kơ ñu”, ƀiădah mâo klei đăo sĭt snăn ăt mâo mơh klei đăo mgưt. Pô kiă brei djă pioh kjăp klei mtô djŏ kyua anăn jing klei mtô sĭt, djŏ hŏng klei phung khua ƀĭng kna mtô leh kơ diñu hmư̆, tui hriăm. Pô kiă Phung Sang Aê Diê mâo klei đăo kjăp hlăm klei sĭt nik kơh “dưi bi hriăm arăng tui si mta klei đăo sĭt leh anăn msĕ mơh mâo klei dưi hŏng phung bi kdơ̆ng hŏng klei anăn” (êlan 9).
Dŭm knuih jăk anei amâo djŏ knŏng pioh hjăn kơ phung khua mduôn, pô kiă Phung Sang Aê Diê, jing phung pioh hjăn kơ bruă kiă Phung Sang Aê Diê ôh, ƀiădah ăt brei mâo hlăm grăp čô đăo, kyua jih jang drei jing sơăi sa hlăm pô kiă gŏ sang, amâodah kiă sa êpul, êpul điêt, khua Adŭ bruă hriăm Klei Aê Diê Blŭ knăm kjuh,… Kyua anăn, đăm ôh hriăm klei hriăm anei kơ pô mkăn ƀiădah brei hriăm kơ drei pô čiăng klei hdĭp pô tŭ dưn kơ Khua Yang.
Drei ƀuh ôh brei mbŏ thiăm ya knuih leh hriăm klei hriăm hruê anei?
Wah lač: Ơ Khua Yang, kâo bi mni lač jăk kơ Ih ruah leh kâo jing phung ƀuôn sang Ih. Akâo kơ Ih yua Klei Ih Blŭ mtô thiăm kâo kơ knuih jăk bi mơak kơ Aê Diê čiăng kơ kâo năng hŏng bruă Aê Diê jao. Akâo kơ Khua Yang yua kâo đru kơ phung mkăn dôk kjăp hlăm klei đăo. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Rôm 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
