Titus 1:5-9
Nqe cim:
“Tus thawjcoj uas saib xyuas Vajtswv tes haujlwm hauv pawg ntseeg, yuav tsum yog tus uas tsis tau ua ib yam dabtsi rau luag thuam li. Nws tsis khavtheeb, tsis chim sai, tsis quav cawv, tsis muaj lub siab heev thiab tsis ntshaw luag tug.” (Titus 1:7)
Lug nug rau sawvdaws xav:
– Timthawj Paulus muab tes haujlwm twg cob rau Titus?
– Titus yuav tsum saib tej cwjpwm twg los xaiv tus thawjcoj rau Pawg Ntseeg Kaletes?
– Tej cwjpwm no muaj lub ntsiab licas rau peb niaj hnub nimno?
Timthawj Paulus muab ob tes haujlwm cob rau Titus ua rau cov Pawg Ntseeg hauv koog povtxwv Kaletes. Thib ib, ua tes haujlwm uas Timthawj Paulus “tseem ua tsis tau tas ntawd kom tiav”, thiab thib ob, “tsa ib co txwjlaug saib xyuas” txhua lub nroog uas muaj cov ntseeg nyob raws li Timthawj Paulus taw qhia (nqe 5). Yuav saib xyuas tau zoo cov Pawg Ntseeg ntawm no, Titus cheemtsum cov neeg muaj txaus peevxwm los ua haujlwm. Nyob ntawm no, Timthawj Paulus hais txog tej cwjpwm “tsis muaj leejtwg thuam” ntawm tus thawjcoj Pawg Ntseeg zoo li ib txojcai kom Titus saib mus rau qhov ntawd xaiv cov thawjcoj kom phim.
Hais txog lub cuabyig, txwjlaug yuav tsum yog tus txaus ntseeg, ua qauv zoo, tsis muaj dabtsi thuam tau. Nws yog tus neeg muaj hnub nyoog tau xaiv tawm los coj Pawg Ntseeg. Vim li ntawd kev ua ncaj ncees ib tug niam ib tug txiv hauv kev txijnkawm yuav tsum coj kom zoo. Tsis tas li ntawd xwb, txwjlaug kuj yuav tsum qhuab ntuas, qhia tej menyuam mob siab ntseeg, hlub tus Tswv thiab ua kom “tsis muaj leejtwg thuam hais tias yog neeg lojleeb thiab tawv ncauj”, txhais hais tias yuav tsum tsis ua neej ywj siab thiab yuav tsum coj cai (nqe 6).
Hais txog tus kheej, tus thawjcoj yuav tsum “tsis tau ua ib yam dabtsi rau luag thuam li”. Nyob hauv lub meejmom saibxyuas Vajtswv tes haujlwm hauv Pawg Ntseeg, tu tus Tswv pab yaj, tus thawjcoj yuav tsum “tsis khavtheeb, tsis chim sai, tsis quav cawv, tsis muaj lub siab heev thiab tsis ntshaw luag tug” (nqe 7).
Hais txog kev ua rau lwm tus, nws yuav tsum “nyiam qhua, nyiam qhov zoo, nws tswj tau nws lub siab, nws ua ncaj ncees, nws ua lub neej dawbhuv thiab xyaum ua lub neej zoo” (nqe 8), tsis ua phoojywg nrog cov neeg hais lus yuav siab, npuab tshob. Ntawd yog yam zoo ntawm tus ntseeg, los ntawm tej ntawd coob tug yuav paub thiab tig los cuag tus Tswv.
Hais txog kev ntseeg, nws yuav tsum “muab siab npuab Vajtswv tej lus uas nws twb kawm los lawm”, muaj kev ntseeg tseeb ces kuj muaj kev ntseeg cuav. Tus thawjcoj yuav tsum tuav ruaj tej kevcai ntseeg tseeb vim ntawd yog tej lus qhia tseeb meej, raws nraim li tej lus uas lawv tau hnov cov Timthawj qhia los lawm. Tus thawjcoj Pawg Ntseeg muaj kev ntseeg ruaj khov hauv tej kevcai ntseeg tseeb thiaj yuav “txhawb tau cov uas mloog lub zog, thiab yuav muab cov neeg uas tawmtsam tej lus hais txhaum nthuav rau sawvdaws paub” (nqe 9).
Tej cwjpwm hais saum no tsis yog tsuas siv rau cov txwjlaug, thawjcoj, yog cov uas tau xaiv tshwjxeeb los ua tes haujlwm coj Pawg Ntseeg xwb, tiamsis kuj yuav tsum muaj nyob hauv txhua tus ntseeg, vim peb txhua tus puavleej yog ib tug thawjcoj hauv lub cuabyig, lossis coj ib pab pawg, ib pab kawm Hnub Kaj,… Vim li ntawd, txhob cia ib tug twg nyeem zaj kawm no rau lwm tus mloog xwb tiamsis yuav tsum kawm rau tus kheej kom ua tau lubneej muaj nqis rau tus Tswv.
Thov Vajtswv,
Tus Tswv, nyuam yaus thov ua tsaug vim Koj xaiv nyuam yaus ua Koj menyuam. Thov siv Koj Txojlus pub nyuam yaus muaj ntxiv tej cwjpwm zoo haum Koj siab kom nyuam yaus phim rau tes haujlwm Koj muab cob. Thov siv nyuam yaus los pab lwm tus sawv ruaj hauv txojkev ntseeg. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb xam pom tus kheej yuav tsum txhim kho tus cwjpwm twg tomqab kawm zaj no?
Nyeem Vajluskub hauv peb lub xyoos: Loos 12
Kênh Youtube BHKTHN:
