Klei Aê Diê Blŭ: II Klei Yăl Dliê 28:16-27
Êlan kliăng: “Snei Yêhôwa lač: “Tăm pah hĕ pô knang kơ mnuih, leh anăn knang kơ klei ktang mơ̆ng kđeh, ai tiê ñu klah đuĕ leh mơ̆ng Yêhôwa. Ñu jing msĕ si pum hlăm kdrăn tač, ñu amâo srăng ƀuh ôh klei jăk jĭn truh. Ñu srăng dôk hlăm anôk thu hlăm kdrăn tač, hlăm lăn čar msĭn amâo mâo mnuih dôk ôh” (Y-Yêrêmi 17:5-6)
Klei êmuh ksiêm mĭn: Hlei phung lŏ bi blah thiăm hŏng Mtao Y-Ahas? Ya bruă ñu ngă čiăng mgaih mkra klei dleh dlan? Ya jing boh kơ bruă ngă anăn? Čiăng mâo klei Khua Yang đru, ya drei srăng ngă?
Kyua klei soh Mtao Y-Ahas leh anăn klei phung ƀuôn sang kkuh mpŭ kơ rup yang kyuanăn Aê Diê mdlưh leh phung Yuđa. Leh phung Siri leh anăn phung Israel tĭng dưr kdơ̆ng blah, ară anei phung Êđôm tĭng ngŏ leh anăn phung Philistin tĭng dhŭng lĕ hriê bi blah hŏng phung Yuđa. Kyua klei kdơ̆ng blah mơ̆ng lu bĭt kiêng, Mtao Y-Ahas tiŏ arăng nao akâo mtao Asiri đru, mă prăk leh anăn mah hlăm sang Aê Diê leh anăn hlăm sang mtao mơĭt kơ mtao Asiri (II Bruă Mtao 16). Mtao Asiri hriê kơ Mtao Y-Ahas amâo mâo đru ôh ƀiădah lŏ bi knap kơ ñu.
Hlăm klei knap mñai, hrô kơ klei kmhal kơ klei soh leh anăn knang kơ Aê Diê, snăn Mtao Y-Ahas lŏ ngă klei soh hĭn hŏng Aê Diê. Ñu ngă yang kơ yang phung Siri kyuadah ñu đăo phung yang anăn ăt srăng đru ñu msĕ si đru leh mtao Siri mơh. Sĭt nik phung yang anăn amâo dưi đru ñu ôh ƀiădah knŏng ngă klei bi rai kơ ñu leh anăn kơ phung Israel. Ñu čăm bi mčah jih čhiên mngan hlăm sang Aê Diê, leh anăn kđăl hĕ ƀăng bhă sang Aê Diê, amâo lŏ kkuh mpŭ kơ Aê Diê ôh. Ñu mdơ̆ng kơ ñu pô knưl hlăm grăp kiêng hlăm ƀuôn Yêrusalem leh anăn ngă anôk dlông čiăng čuh mnơ̆ng ƀâo mngưi kơ phung yang mkăn hlăm grăp boh ƀuôn čar Yuđa.
Trăn Klei Aê Diê Blŭ anei pă blư̆ blŭ boh blŭ djŏ kơ klei đru si tô hmô “đru”, “bi ktang” (êlan 16, 20, 21, 23) ƀiădah jih jang boh blŭ anei knŏng lač kơ klei đru Mtao Y-Ahas čiăng tui duah ti êngao kơ Aê Diê. Ñu duah klei đru mơ̆ng sa čô mnuih amâo mâo klei khăp msĕ si mtao Asiri leh anăn mơ̆ng phung rup yang amâo mâo klei myang ôh. Hrô kơ duah Aê Diê, kmhal kơ klei soh leh anăn knang kơ Aê Diê snăn Mtao Y-Ahas knang kơ anôk mkăn kyuadah ñu mĭn ñu srăng mâo klei đru pral hĭn leh anăn djŏ tui si klei ñu čiăng. Kyuanăn, ñu amâo mâo sa klei đru ôh ƀiădah lŏ ngă soh hŏng Aê Diê hĭn êjai. Tơdah amâo čiăng knang kơ Aê Diê Pô Myang leh anăn Pô bŏ hŏng klei khăp ôh, arăng srăng knang kơ anak mnuih, kơ rup yang hơăi mang leh anăn knang mă kơ diñu pô. Boh jhat kơ klei knang amâo djŏ anôk jing klei dluh lĕ, amâo mâo klei đru ôh, êgao hĭn kơ anăn tơl truh kơ klei lĕ, lui wir Aê Diê leh anăn ngă soh hŏng Aê Diê.
Jing phung đăo, brei drei bi luă gŭ drei pô leh anăn knang kơ Aê Diê đru, tal êlâo hĭn hŏng klei wah lač. Tơdah wah lač, drei knang kơ klei myang dưi bi mtlaih, kơ klei khăp leh anăn klei Aê Diê ƀuăn. Drei đăo sĭt tơdah drei wah lač măng ai si jing klei lŏ wĭt lač, êlan Aê Diê mgaih mkra klei dleh dlan ăt srăng ba klei jăk hĭn kơ drei tui si klei Ñu čiăng amâo djŏ tui si klei drei pô čiăng ôh. Ƀiădah tơdah drei hngah amâo akâo klei đru mơ̆ng Aê Diê ôh, sĭt nik drei srăng mă tŭ klei jhat hĭn.
Tơdah tuôm hŏng klei knap mñai, ya klei drei ngă êlâo hĭn?
Wah lač: Ơ Khua Yang, tơdah tuôm hŏng klei dleh dlan đru kâo knŏng knang kơ Ih đuč, amâo knang kơ kâo pô ôh, kăn knang kơ rup yang amâodah kơ sa mta mnơ̆ng mkăn, amâodah kơ sa čô mnuih mkăn rei ti lăn ala anei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 23-24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
