II Xwmtxheej 28:16-27
Nqe cim:
“Tus TSWV hais tias: Kuv yuav rau txim rau tus neeg uas khiav tawm ntawm kuv mus cia siab rau neeg lub zog, thiab cia siab rau tej neeg uas txawj tuag. Nws zoo ib yam li tsob ntoo uas tuaj tom tiaj suabpuam uas loj hlob hauv tej mojsab qhua ntawm thaj av qab ntsev uas tsis muaj dabtsi tuaj li. Tsis muaj ib yam dabtsi zoo rau nws li.” (Yelemis 17:5-6)
Lug nug rau sawvdaws xav:
– Vajntxwv Ahas raug tebchaws twg tuaj tua?
– Vajntxwv ua dabtsi los daws teebmeem? Thaum kawg zoo licas?
– Xav tau tus Tswv pab cawm, peb yuav tsum ua dabtsi?
Vim vajntxwv Ahas tej kev txhaum thiab cov pejxeem kev pe mlom thiaj ua rau Vajtswv rau txim rau tebchaws Yudas. Tomqab uas raug cov Xilias thiab cov Yixalayees nyob sab qaum teb tuaj tua, nimno Yudas ho raug cov Edoos nyob sab hnub tuaj thiab cov Filitees uas nyob yav qab teb tuaj tua ntxiv. Vim raug yeebncuab tua txhua sab, vajntxwv Ahas tau txib neeg mus thov tus vajntxwv kav Axilias tuaj pab cawm, nws muab tej nyiaj kub hauv lub Tuamtsev thiab hauv nws lub loog coj mus pub rau tus vajntxwv kav Axilias (II Vajntxwv 16). Tus vajntxwv kav Axilias tuaj cuag vajntxwv Ahas, tsis yog tuaj pab, tiamsis tseem tuaj tua thiab ua rau vajntxwv Ahas raug kev kub ntxhov ntau yam.
Thaum raug txomnyem, tsimnyog lees kev txhaum thiab cia siab rau tus Tswv, tiamsis vajntxwv Ahas tseem ho ua txhaum loj heev ntxiv rau tus Tswv. Vajntxwv tua tsiaj hlawv fij rau cov Xilias tej vajtswv uas ua rau nws swb los ntawm kev ntseeg hais tias tej vajtswv no yuav pab nws ib yam twb pab tus vajntxwv kav Xilias lawm. Tiamsis tsis muaj kev pab qhov twg tuaj, tseem ua rau vajntxwv thiab tagnrho cov Yixalayees poob mus rau kev txhaum thiab. Vajntxwv muab tej khoom siv hauv lub Tuamtsev tsoo tawg tas thiab muab tus Tswv lub Tuamtsev tej qhovrooj kaw, tsis pub pehawm tus Tswv ntxiv lawm. Vajntxwv teeb tej thaj txi dab rau txhua qhov hauv lub nroog Yeluxalees, nws ua tej chaw teev dab rau txhua lub nroog hauv lub tebchaws Yudas thiab hlawv hmoov tshuaj tsw qab fij rau lwm haivneeg tej vajtswv.
Ntu Vajluskub no hais plaub zaug lo lus “pab” (nqe 16, 20, 21, 23) tiamsis tej lus no puavleej hais txog kev pab uas vajntxwv Ahas nrhiav sab nraud xwb tsis yog nrhiav ntawm tus Tswv. Vajntxwv nrhiav kev pab ntawm cov neeg tsis muaj kev hlub zoo li tus vajntxwv kav Axilias thiab tej mlom uas tsis muaj hwjchim. Tsimyog nrhiav tus Tswv, lees kev txhaum thiab cia siab rau tus Tswv, tiamsis vajntxwv ho cia siab rau lwm qhov chaw vim xav hais tias nws yuav tau pab sai sai thiab tau pab raws nws siabnyiam. Vim li ntawd, vajntxwv thiaj tsis tau txais kev pab cawm thiab tseem ua txhaum loj rau tus Tswv. Thaum tsis xav cia siab rau Vajtswv tus uas muaj kev hlub thiab muaj hwjchim, ces tibneeg yuav cia siab rau tibneeg, rau tej mlom tsis paub qabhau lossis rau tus kheej. Yam txais tau thaum cia siab yuamkev yog kev swb, tsis tau cawmdim, tseem poob rau kev dagntxias, txav deb tus Tswv thiab ua txhaum rau Nws.
Yog ib tug ntseeg, peb yuav tsum txo hwjchim thiab cia siab rau tus Tswv txojkev pab, xubthawj yog dhau ntawm kev thov Vajtswv. Thaum thov Vajtswv, peb cia siab rau tus Tswv lub hwjchim cawmdim, Nws txojkev hlub thiab Nws tej lus cogtseg. Peb ntseeg hais tias thaum thov Vajtswv ces txawm thaum kawg yuav zoo licas, los tus Tswv txojkev pab kuj ua rau peb txais tau yam zoo tshajplaws rau peb raws li tus Tswv siabnyiam, tsis yog raws peb siabnyiam. Tiamsis, yog tsis nrhiav kev pab ntawm tus Tswv ces peb yuav txais tau tej yam tsis zoo xwb.
Thov Vajtswv,
Tus Tswv, thov pab kom thaum ntsib teebmeem nyuam yaus paub cia siab rau koj, tsis txhob cia siab rau nyuam yaus tus kheej, tej mlom lossis lwm yam lossis lwm tus uas nyob hauv ntiajteb no. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Thaum ntsib teebmeem, peb ua dabtsi ua ntej?
Nyeem Vajluskub hauv peb lub xyoos: Ntawv Nkauj 23-24
Kênh Youtube BHKTHN:
