Klei Aê Diê Blŭ: Klei Yap 11:7-23
Êlan kliăng: “Kâo dưi ngă jih jang klei hlăm Krist, Pô bi ktang kâo.” (Philip 4:13)
Klei êmuh ksiêm mĭn: Si klei Y-Môis wĭt ngă ti anăp klei khăng ai tiê phung ƀuôn sang? Tinei si ih thâo săng kơ bruă khua kiă kriê klei hdĭp mngăt? Ya klei drei dưi ngă čiăng đru bruă digơ̆ leh anăn klei hdĭp digơ̆?
Klei soh mâo klei dưi ngă bi tưp lar. Klei khăng ai tiê phung ƀuôn sang leh anăn klei ktrŏ hlăm bruă ñu klam ngă kơ Y-Môis “ênguôt” leh anăn akâo kơ Khua Yang bi mdjiê hĕ ñu. Ñu êmuh Khua Yang: “Si ngă Ih ngă dleh hŏng dĭng buăl Ih?” Blŭ mdê hĭn jing, ñu blŭ dŭñ dŭñ hŏng Khua Yang: “kâo lui jih jang klei, gưt tui hlue klei Ih iêô, ƀiădah si ngă Ih amâo pap kơ kâo, amâo brei bruă klam kâo êlưih ƀiă ôh…?” Y-Môis thâo săng čhuai leh kơ klei mă bruă. Ñu dôk guôn sa bruă êlưih leh anăn jăk găl hĭn (Y-Mathiơ 16:24). Ya mta klei khua kiă kriê klei hdĭp mngăt dôk čang guôn tơdah mă bruă kơ Aê Diê: Djŏ mơ̆ čiăng kơ Aê Diê hơêč hmưi kơ klei hdĭp kđeh amâodah klei mpŭ mơ̆ng phung biăp? Leh anăn si ngă khua kiă kriê êdu ai mơ̆ kyua amâo mă tŭ ôh jih mta klei anăn?
Lŏ tui tluôn mbĭt, klei ktrŏ hlăm bruă ngă kơ Y-Môis amâo lŏ dlăng kơ phung ƀuôn sang hŏng klei khăp ôh, ƀiădah knŏng ƀuh ti anăp ală bruă knuă đuč yơh (êlan 12). Ñu thâo săng čhuai kơ hdră êlan ngă bruă klam leh anăn amâo kral ôh bruă kiă kriê klei hdĭp mngăt brei mâo klei săn asei mlei (Y-Yôhan 10:11). Tuôm mâo mơ̆ khua kiă kriê dlăng hŏng klei năng pap kơ phung mnuih drei dôk ngă bruă? Tuôm mơ̆ klei diñu blŭ leh anăn klei diñu ngă bi êka ai tiê, ngă kơ khua kiă kriê wơr bĭt hĕ diñu jing phung mnuih ăt čiăng mâo klei khăp leh anăn klei pap brei mơh?
Leh anăn Y-Môis ăt soh čhuai mơh kyuadah dlăng kơ ñu pô lu đei tơl wơr bĭt hĕ klei ktang myang Aê Diê (êlan 13-14). Ñu hrăm mbĭt hŏng phung ƀuôn sang duñ mana grăp aguah, ƀiădah si ngă hlăm mông anei ñu wơr bĭt hĕ klei ktang myang Aê Diê? Ñu wơr bĭt hĕ Aê Diê yơh jing Pô brei kơ ñu klei dưi, klei ktang leh anăn đru kơ bruă klam ñu (Klei Mmuñ Hđăp 121:1-2).
Tĭng sa nah mkăn, Y-Môis ngă soh leh, kyuadah ñu blŭ dŭñ dŭñ msĕ si phung ƀuôn sang mơh, ƀiădah lĕ, sa tĭng mkăn, ñu čiăng mâo klei thâo săng brei kơ ñu, kyuanăn yơh ñu ba ai tiê êka ñu kơ Aê Diê. Mơ̆ng klei anei, drei dưi ƀuh, klei jăk hĭn kơ phung đăo dưi đru khua kiă kriê diñu, anăn jing klei diñu đĭ hriê kơ prŏng yơh (Y-Philêmôn 4-7). Amâo mâo klei mkăn ôh brei kơ pô mă bruă Aê Diê hơ̆k mơak leh anăn mâo klei mđĭ ai hĭn, mdrăng hŏng klei ƀuh phung đăo khăp kơ Klei Aê Diê Blŭ, sĭt suôr kkuh mpŭ leh anăn mă bruă kơ Aê Diê, dôk hdĭp hdơ̆ng pô hŏng klei bi khăp leh anăn luă gŭ. Ăt brei hdơr nanao mơh snei, khua pô mtô leh anăn phung khua kiă kriê ăt jing mnuih mơh, mâo klei êdu awăt, klei klam ktrŏ čiăng dưi thâo săng brei msĕ mơh, leh anăn boh nik nak čiăng kơ klei wah lač brei (I Têsalônik 5:25).
Aê Diê mgaih mkra klei dleh dlan hŏng klei brei thiăm mnuih đru bruă kơ Y-Môis (êlan 16-17). Hlăk mphŭn dô ăt msĕ hŏng hruê anei mơh, khua kiă kriê klei hdĭp mngăt ăt čiăng mâo lu mnuih dôk ti djiêô, čiăng đru klam mbĭt bruă, mă bruă kơ Aê Diê leh anăn mă bruă kơ phung biăp.
Si ngă drei mâo klei thâo săng brei leh anăn wah lač brei kơ phung khua kiă kriê mơ̆?
Wah lač: Ơ Khua Yang, brei kâo dôk kjăp ai tiê mă bruă kơ Aê Diê hlăm jih jang klei truh. Brei kâo thâo khăp, thâo săng brei, leh anăn wah lač brei kơ khua kiă kriê nanao, leh anăn đru digơ̆ hlăm klei mă bruă. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
