2 Xwmtxheej Vajntxwv 27:1-9
Nqe cim:
“Tsis txhob mus rau tej qhov chaw uas cov neeg ua phem mus. Tsis txhob xyaum ua raws li tej neeg siab phem tus yamntxwv” (Pajlug 4:14)
Lus nug rau sawvdaws xav:
– Yauthas txiv thiab yawg yog cov vajntxwv uas zoo li cas?
– Los qhov twg los vajntxwv Yauthas tau Vajtswv pub muaj kev vammeej?
– Yuav ua li cas kom tej kev coj tsis zoo sab nraum thiaj tsis cuam tshuam peb?
Vajntxwv Yauthas ua vajntxwv thaum nws hnub nyoog muaj nees nkaum tsib xyoos. Vim Vajntxwv Uxiyas uas yog Yauthas txiv mob ruas, Yauthas thiaj hloov nws txiv chaw tswj ib ntu sijhawm mus txog thaum nws txiv tuag. Ua ntej ntawd Vajntxwv Uxiyas yog ib tug neeg hwm vajtswv, tiam sis thaum nws vammeej lawm nws muaj lub siab khav theeb heev, nws cia li nkag mus rau hauv Tuamtsev thiab hlawv hmoov tshuaj tsw qab. Vim li ntawd, vajntxwv thiaj raug Vajtswv rau txim mob ruas. Yauthas yawg Amaxiyas kuj yog ib tug vajntxwv uas zoo kawg nkaus thaum xub thawj, tiamsis thaum uas vammeej lawm ces nws txawm pe thiab hlawv hmoov tshuaj tsw qab fij rau cov Edoo tej mlom, ces nws thiaj li raug puastsuaj thiab raug cov neeg ntxeev siab muab nws tua pov tseg(2 Xwmtxheej Vajntxwv 25:14). Yauthas yawg koob Yau‑ase kuj yog ib tug vajntxwv zoo thiab muaj kev vammeej thaum xub thawj, tiamsis tom qab ntawd nws mus pehawm mlom, ces nws thiaj raug yeebncuab tuaj txeeb tau, thiab raug nws cov tub txib muab nws tua tuag saum nws lub txaj (2 Xwmtxheej Vajntxwv 24:23-25).
Tsis zoo li nws txiv thiab nws yawg, Vajntxwv Yauthas thaum Vajtswv pub vammeej lawm nws yeej tsis ua kev phem. Yauthas ua lub neej raws li tus TSWV lub siab nyiam ib yam li nws txiv ua; tiamsis nws tsis ua txhaum li nws txiv uas yog mus hlawv hmoov tshuaj tsw qab hauv lub Tuamtsev, rau qhov vajntxwv tsis xav rov ua nws txiv tej kev txhaum. Txawm li ntawd los cov pejxeem tseem pheej mus ua kev txhaum raws li txhua tiam vajntxwv dhau los tiamsis vajntxwv Yauthas tsis ua li ntawd.
Vajntxwv Yauthas dhau los vammeej heev vim nws ua raws li Vajtswv tej kevcai (nqe 6). Vim li ntawd, vajntxwv tau Vajtswv foom koob hmoov rau hauv tej kev tsim tsa lub teb chaws. Vajntxwv ua ntau lub nroog rau saum tej roob hauv tebchaws Yudas, yog tias nws txiv tau ua tej chaw tsomfaj rau hauv Yeluxalees thiab tom tej roob moj sab qhua ces zaum no Yauthas nws ua tau ntau lub chaw fajxwm thiab chaw tsomfaj rau hauv tej havzoov. Vajtswv kuj pub rau vajntxwv kov yeej, tua Amoos swb thiab yuam Amoos yuav tsum them se txog peb lub xyoos. Vajntxwv Yauthas tau Vajtswv foom koob hmoov rau nws mus tas nws sim neej.
Niaj hnub nimno, peb kuj nyob rau hauv ib lub tebchaws uas tibneeg nyiam ua neej li yus siab nyiam, feem coob yog cov hluas nyiam xyaum ua raws li lwm tus ua phem. Lawv txaus siab rau lawv tus kheej hais tias lawv ua neej raws feem coob. Zaj kawm ntawm vajntxwv Yauthas ntuas peb hais tias tsis yog luag lwm tus ua phem ua qias ces peb txawm xyaum ua li ntawd ces yuav raug Vajtswv rau txim. Peb yuavtsum vamkhom Vajtswv Txojlus ci rau peb kom ua neej txawjntse ib yam li vajntxwv Yauthas hnub thaud, “muab lub siab npuab tus TSWV uas yog nws tus Vajtswv.” Kawm thiab ua raws li Vajtswv Txojlus qhia kom peb thiaj li tsis mus ua phem ua qias li neeg ntiajteb ua.
Thov Vajtswv:
Tus Tswv, thov cawm nyuam yaus dim ntawm kev xyaum ua li neeg ntiajteb ua thiab cov neeg uas tsis hwm Vajtswv ua. Tiamsis thov pab kom nyuam yaus muaj tus yam ntxwv zoo rau lwm tus xyaum kom txawj ua neej kom haum Vajtswv siab. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb tabtom ua neej raws li neeg ntiajteb ua lossis ua raws Vajtswv Txojlus qhia?
Nyeem Vajluskub hauv peb lub xyoos: Yausua 24
Kênh Youtube BHKTHN:
