Pajlug 22:12-14
Nqe cim:
“Tus TSWV tsomkwm tej lus tseeb, tiamsis nws rhuav tshem tej lus dag” (Pajlug 22:12)
Lus nug rau sawvdaws xav:
– Ob hom neeg twg tau hais txog hauv ntu Vajluskub hnub no?
– Nqi zog ob hom neeg no tau txais zoo li cas?
– Peb muaj tus cwjpwm li cas thaum pom tus neeg zoo raug txomnyem, tus neeg phem tau zoo?
Vajtswv yeej ib txwm tsom kwm thiab saib xyuas tus neeg txawj ntse, thiab rhuav tshem tus neeg phem tej lus. Lo lus “Tus Tswv lub qhov muag” qhia tias Vajtswv yeej ib txwm nco ntsoov saib xyuas thiab pom txhua tes haujlwm uas tibneeg ua, kom tsomkwm tau cov neeg ncaj ncees thiab rau txim rau cov neeg phem. “Tus neeg txawjntse” yog hais txog tus uas muaj kev txawjntse, kev totaub, ua neej ncaj ncees, thiab hwm Vajtswv, vim “Tus uas hwm tus TSWV, tus ntawd thiaj yog tus uas muaj kev txawj ntse. Cov neeg ruam nyiam thuam lub tswvyim thiab tsis kawm txuj kawm ci.” (Pajlug 1:7). Hais rau lwm seem, thaum uas ib tug tib neeg txais yuav thiab khaws Vajtswv Txojlus cia, tus ntawd yuav kawm tau kev txawjntse thiab tswj tau lub siab hwm Vajtswv, vim li no, nws nrhiav tau kev txawjntse hauv Vajtswv (Pajlug 2:5). Vajtswv tsom kwm tus neeg txawjntse thiab qhov tseeb yuav nyob mus ib txhis.
Tiamsis Vajtswv yuav rhuav tshem cov neeg phem. Muaj ob hom neeg phem uas hais nyob rau hauv ntu no yog tus tub nkeeg thiab tus niam ntiav(nqe 13-14). Tus uas sau siv lolus muaj zog thaum uas hais txog cov neeg tub nkeeg uas tsis xav tawm mus ua haujlwm, nws lam nrhiav kev hais tias muaj tsov ntxhuav nyob nraum zoov yuav tom. Tseeb tiag yeej tsis muaj ib tus tsov ntxhuav twg nyob hauv cov Yixalayes tej nroog li. Tus neeg tub nkeeg thiab nws tsev neeg yeej tsis raug tsov ntxhuav tom, tiamsis lawv yuav ntsib kev txomnyem thiab kev puastsuaj vim lawv txoj kev ua neej tubnkeeg. Ib qhov ntxiv, “tus niam ntiav lub qhovncauj” yog piv rau “lub qhov tob”, yog ib lub qhov cuab yog leejtwg mloog raws qab yuav mag poob rau hauv tuag. Tus niam ntiav yog tus pojniam uas tsis ncaj ncees thiab ua txhaum rau Vajtswv (Pajlug 5:20). Tsis tas li ntawd xwb, nws tseem siv nws lub qhov ncauj ua rau lwm tus ua txhaum, ces tus pojniam ntawd yuav ua cas khiav dim Vajtswv kev rau txim!
Vajtswv cov menyuam coob tus poob siab vim lawv pom cov neeg zoo ntsib ntau txoj kev txomnyem tiamsis cov neeg phem muaj kev vammeej. Vajntxwv Daviv qhia hais tias, “Koj tsis txhob ntxhov siab txog qhov uas neeg ua limhiam, tsis txhob khib cov neeg uas ua txhaum” (Ntawv Nkauj 37:1), thiab nws xaus lus hais tias: “Tus TSWV cawm cov neeg ncaj ncees thiab nws tsomkwm lawv thaum lawv raug kev txomnyem” (Phau Ntawv Nkauj 37:39). Vajtswv tus uas muaj lub siab hlub tshua pub lub sijhawm rau cov neeg txhaum kom hloov siab lees txim, tiamsis tsis txhob cia lub sijhawm dhau mus kom raug txim. Peb txhua tus cia li ruaj siab txawm yog nyob rau lub sijhawm zoo li cas los xij, txeev ceev lub neej hwm Vajtswv, ntseeg ruaj hais tias Vajtswv lub qhovmuag yeej saib ntsoov peb, Nws yeej nrog nraim pab peb kov yeej txhua yam kev nyuaj kom ua neej pub rau Nws mus ntxiv. “Tus TSWV tsomkwm tej lus tseeb, tiamsis nws rhuav tshem tej lus dag”
Thov Vajtswv:
Vajtswv, nyuam yaus ua Koj tsaug rau Koj txoj kev tsom kwm tiv thaiv nyuam yaus. Thov Vaj Ntsujplig pab kom nyuam yaus khiav deb kev txhaum, mloog Koj tej lus qhia thiab ntseeg ruaj rau txhua lub tsamthawj hauv kev ua neej. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb puas ruaj siab ntseeg Vajtswv kom Nws tsom kwm peb dim ntawm tej kev phem?
Nyeem Vajluskub hauv peb lub xyoos: Yausuas 23
Kênh Youtube BHKTHN:
